Savali a le Au Peresitene Sili
Pipiimau Pea Mo Sina Taimi
O se tasi o lesona tumau o le vaitaimi o Katelani o le manaomia lea o le fafagaina e le aunoa o o tatou agaga. E manaomia ona tatou faalatalata i le Alii i aso uma pe a fai tatou te mananao ia sao mai puapuaga ia e tatau ona tatou fetaiai.
I le taumafanafana talu ai na ma aveina ai ma lo’u toalua le masaga tama a le ma fanau i Katelani, Ohio. O se avanoa faapitoa ma le taua e faaalu ai lo ma taimi ma i la’ua a o le’i o ia la’ua misiona.
I le taimi o la matou asiasiga iina, sa matou aoao ai e faaleleia atili lo matou malamalama i tulaga na i ai le Perofeta o Iosefa Samita ma le Au Paia sa nonofo ai i Katelani. O lena vaitau o le talafaasolopito o le Ekalesia, sa lauiloa o se taimi o tofotofoga matautia ae o ni faamanuiaga silisili foi.
O Katelani na faaee mai ai e le Alii nisi o faaaliga aupito ofoofogia faalelagi ma meaalofa faaleagaga ua iloa e le lalolagi. E onosefulu lima vaega o le Mataupu Faavae ma Feagaiga na tauaaoina i Katelani ma vaega taulalata ane—o faaaliga na aumaia ai le malamalama fou ma le atamai e uiga i autu e pei o le Afio Mai Faalua, tausiga o e le tagolima, o le ata o le faaolataga, pule o le perisitua, o le Upu o le Poto, sefuluai, o le malumalu, ma le tulafono o le faapaiaga.1
O se vaitau o le tuputupu ae faaleagaga e le mafaatusalia. E moni lava, o le Agaga o le Atua ua pei o se afi mumu. O Mose, Elia, ma le tele o isi avefeau faalelagi sa faaali mai i lena taimi, e aofia ai lo tatou Tama Faalelagi ma Lona Alo, le Faaola o le lalolagi, o Iesu Keriso.2
O se tasi o le mau faaaliga na tauaaoina e Iosefa i Katelani o se faaaliga lea na ia ta’ua o le “lau olive … na fati mai i se Laau o le Parataiso, ma le savali a le Alii o le filemu mo i tatou” (faatomuaga i le MFF 88). O lenei faaaliga ofoofogia o loo aofia ai le valaaulia faagaeetia loto, “Ia faalatalata mai ia te au ona ou faalatalata atu ai lea ia te outou; ia saili ia te au ma le filifiliga ona outou maua ai lea o au” (MFF 88:63). A o faalatalata atu le Au Paia i Katelani i le Alii, sa Ia faalatalata moni atu lava ia te i latou, ma liligi atu faamanuiaga o le lagi i luga o ulu o e faamaoni.
O Uaga Faaleagaga
Atonu o le faatumutumuga o nei faaaliga faaleagaga na tutupu i le taimi o le faapaiaga o le Malumalu o Katelani i le aso 27 o Mati, 1836. O se tasi o i latou sa i ai iina o William Draper, e 28 tausaga le matua, o le sa faamatalaina lea aso o se “aso o le Penetekoso.” Na ia tusia: “Sa i ai se taimi o le to faaua mai o le Agaga o le Alii, ua le gafatia ai e la’u peni ona tusia uma pe faamatalaina foi e lo’u laulaufaiva. Ae o le a ou faapea atu, sa liligi mai le Agaga ma na oo mai e pei o se matagi ua pesi mai ma ua faatumulia ai le fale, ma o le toatele sa i ai na latou fetautalatalaai i gagana eseese ma sa i ai ni faaaliga vaaia, ma sa latou vaai i agelu ma vavalo mai, ma sa maua se taimi e olioli ai, ma e lei i ai lava se mea faapea i lenei augatupulaga.”3
O nei faaaliga faaleagaga sa le mo na o i latou sa i totonu o le malumalu, aua “sa taufetuli faatasi mai tagata o nuu tuaoi (ina ua latou faalogo i se leo uiga ese i totonu, ma vaaia se malamalama susulu e pei o se afi faaniutu i luga o le Malumalu) ma sa latou taufaiofo i le mea sa tupu.”4
O Lorenzo Snow (1814–1901), lea na avea mulimuli ane ma Peresitene o le Ekalesia, sa nofo i Katelani i lena vaitau maoae. Sa ia matauina, “E ono manatu se tasi a uma ona maua o nei faaaliga ofoofogia ona leai lea o se tofotofoga e mafai ona faatoilaloina le Au Paia.”5
Ae, o le mea moni, o aafiaga sili faaleagaga e le tuusaunoaina ai i tatou ma mea faafeagai ma tofotofoga. E na o ni nai masina talu ona uma le faapaiaga o le malumalu, ae luluina le Iunaite Setete i se pagatia tele o le tamaoaiga, ma sa matua lagonaina ai aafiaga i Katelani. Sa gau faletupe, ma tuua ai le toatele i faigata tautupe. O le mea e sili ona leaga, o le toatele o le Au Paia na malaga atu i Katelani, sa na o ni nai meatotino lava na latou o ma ave, aua sa latou le iloa po o le a le mea e fai pe a taunuu, ae pe faapefea foi ona latou ola.
E lei umi, ae tulai mai sauaga ma tagata e faasagatau i le Au Paia. O tagata o le Ekalesia—e oo lava i nisi o i latou sa aupito latalata i le Perofeta, o le toatele foi sa i ai i le faapaiaga o le malumalu—sa liliuese ma latou tausalaina Iosefa fai mai o se perofeta e le taulia.
A o ou savalivali i autafa o le Malumalu o Katelani faatasi ma lo’u toalua ma atalii o la’u fanau, sa ou mafaufau loloto i le matautia ona sa le mafai e nisi ona tumau i le faamaoni, ina ua mavae faaaliga faaleagaga ia sa latou molimauina. E maeu se faanoanoaga tele ona o le lē mafai ona latou onosaia tauemuga ma faitioga a ē le talitonu. E maeu le faanoanoa, aua ina ua latou fetaiai ma faigata tautupe po o isi tauiviga, sa le mafai ona latou aapa ifo i o latou lava loto ma maua ai le malosiaga e tumau faamaoni ai. Paga lea, ua galo ia i latou le seleselega faaleagaga faavavega i le faapaiaga o le malumalu.
O Lesona
O le a se mea e mafai ona tatou aoao mai i lenei vaitau ofoofogia i le talafaasolopito o le Ekalesia?
O se tasi o lesona tumau o le vaitaimi o Katelani o le manaomia lea o le fafagaina e le aunoa o o tatou agaga. Faapei ona aoao mai Peresitene Harold B. Lee (1899–1973): “O le molimau e le o se mea e te mauaina nei ma e teuina lava pea. O le molimau o le a tuputupu ae pea lava pea i le tulaga malamalama o le mautinoa, pe o le a faaitiitia seia i’u ina leai, e faamoemoe lava i le mea o le a tatou faia i ai. Ou te faapea atu, o le molimau lea tatou te faafouina i lea aso ma lea aso o le mea lea e faasaoina i tatou mai mailei a le fili.”2 E manaomia ona tatou faalatalata i le Alii i aso uma pe afai tatou te mananao ia sao mai mafatiaga ia e tatau ona tatou feagai.
I se isi itu e talitutusa lava lo tatou lalolagi i le taimi nei ma Katelani o le 1830. Ua tatou ola foi i taimi o faigata tautupe. E i ai i latou e faasaua ma tetee malosi i le Ekalesia ma ona tagata. O nisi taimi e foliga ua matua lofituina tofotofoga mo tagata taitoatasi ma faapotopotoga.
O iina tatou te matua manaomia ai le faalatalata atu i le Alii. A tatou faia lena mea, o le a tatou iloa ai le uiga o le faalatalata mai o le Alii ia i tatou. A tatou saili atu ia te Ia ma le maelega atili, o le a mautinoa tatou te maua o Ia. O le a tatou vaai manino ai e le lafoaiina lava e le Alii Lana Ekalesia po o Ana Au Paia faamaoni. O le a pupula o tatou mata, ma o le a tatou vaai atu ia te Ia o tatala mai pupuni o le lagi ma liligi atili mai Lona malamalama mo i tatou. O le a tatou maua le malosi faaleagaga e ola ai e oo lava i taimi aupito pogisa.
E ui ina sa galo i nisi o le Au Paia i Katelani o latou aafiaga faaleagaga sa i ai, ae o le toatele lava sa tumau. O le toatele lava, e aofia ai William Draper, sa pipiimau i le atamai faaleagaga na avatu e le Atua ia te i latou ma sa faaauau ai ona mulimuli i le Perofeta. Sa latou fetaiai i le ala ma nisi tofotofoga e sili ona matuitui ae sa latou tuputupu ae atili foi faaleagaga, seia oo lava i le faaiuga, o i latou na tumau e oo i le iuga na “talia i latou … i le fiafia e le iu” (Mosaea 2:41).
E Mafai Ona E Pipiimau Pea
Afai e faaosoosoina oe ina ia e faavaivai pe lafoai lou faatuatua, ia e manatua na Au Paia faamaoni i Katelani, sa tumau le faamaoni. Pipiimau Pea Mo Sina Taimi E mafai ona e faia lena mea! O oe o se vaega o se augatupulaga faapitoa. Na saunia oe ma faapolopolo e te ola ai i lenei taimi taua i lo tatou paneta matagofie o le lalolagi. E i ai sou gafa faaselesitila ma o lea ua i ai ia te oe taleni uma e tatau ai e fai ai lou olaga o se tala faamanuiaina e faavavau.
Ua faamanuiaina oe e le Alii i se molimau o le upumoni. Ua e lagonaina Lana uunaiga ma molimauina Lona mana. Ma afai foi e te faaauau pea ona sailia o Ia, o le a Ia toina mai pea lava pea ia te oe ni aafiaga paia. O na aafiaga faaleagaga faatasi ai ma isi meaalofa faaleagaga, e le gata o le a mafai ai ona suia lou lava olaga mo le lelei, ae o le a faamanuiaina ai o outou aiga, uarota po o paranesi, nuu, aai, setete, ma malo i lo outou lelei.
Atonu e faigata ona vaaia lena mea i nisi taimi, ae pipiimau pea i ai mo sina taimi, aua “o mea e lei vaaia e mata, e lei lagona foi e taliga, e lei oo foi i le loto o se tagata, o mea ia ua saunia e le Atua mo i latou o e alolofa ia te ia” ma faatalitali mo Ia (1 Korinito 2:9; tagai foi MFF 76:10; 133:45).
Ou te molimau atu i le moni o le talalelei toefuataiina a Iesu Keriso ma le moni o Lana Ekalesia. Ou te molimau atu ma lo’u loto ma lo’u agaga atoa o loo soifua le Atua, o Iesu Keriso o Lona Alo ma o loo taiulu o Ia i lenei Ekalesia maoae. Ua toe i ai foi so tatou perofeta i le lalolagi, o Peresitene Thomas S. Monson.
Ia tatou manatua e le aunoa le lesona o Katelani ma pipiimau pea i ai mo sina taimi— tusa lava pe foliga mai ua pagatia. Ia iloa ma manatua le mea lenei: e alofa le Alii ia te outou. Na te manatuaina outou. Ma o le Ia lagolagoina i latou o e “tumau pea i le faatuatua e oo i le iuga” (MFF 20:25).
Na Afio Ifo le Alii i le Malumalu i Katelani, saunia e Del Parson; ata pue na tusia e Christina Smith
Agavale: ata pue na tusia e Craig Dimond; ata na tusia e Steve Kropp; taumatau: ata pue na tusia e Matthew Reier
Ata o le Malumalu o Katelani na pueina e Welden C. Andersen; ata na saunia e Robert Casey