Auaunaga i le Ekalesia

O Ai, O Au? Aoao Atu?

Ma i le taimi lenei o le a tuuina atu loa le taimi ia [faatumu lou igoa] mo la tatou lesona.” Afai e te faalogo i nei upu i le lotu i le Aso Sa o le a sosoo ai, mata e te lagonaina le fefe po o le mautinoa?

E le o toe mamao po o se taimi mulimuli ane, o tagata uma o le Ekalesia o le a avea o se faiaoga. E ono tupu i le Peraimeri, i le Aualofa po o se korama a perisitua, i faiaoga asiasi po o faiaoga o aiga, po o afiafi faaleaiga. Mo le toatele o tagata o loo fou i le Ekalesia, o le tofi faiaoga atonu e le masani ai. E oo lava ia i latou ua tele taimi o faiaoga ai, e ono fesili pe faapefea ona avea i latou ma ē mautinoa ma lelei i le aapa atu i olaga mo le lelei.

O nisi nei o manatu faigofie e mafai ona fesoasoani ia i tatou taitoatasi e faataunuu ai o tatou tofiga faafaiaoga:

1. O le tatalo o se meafaigaluega taua faafaiaoga. Ia amata vaega taitasi o le sauniuniga o lau lesona e ala i le tatalo ma le lotomaualalo mo le taitaiga a le Agaga. Ia faalagolago i le folafolaga a le Alii i faiaoga uma: “O le a tuuina atu foi le Agaga ia te outou i le tatalo i le faatuatua” (MFF 42:14).

2. Toetoe lava o lesona uma e tele atu mea o i ai i le tusi lesona nai lo mea o le a mafai ona e faaaogaina i le vasega. Faitau le lesona, ma i le agaga tatalo filifili se mataupu faavae autu se tasi po o se lua e te lagona e sili mo lau vasega.

3. Suesue ma le agaga tatalo se mau e faatatau i lau lesona, ma faaaoga e aumai ai ni faataitaiga ma mataupu faavae. O le afioga a le Atua e mafai ona i ai se “aoga sili i manatu o le nuu nai lo … se tasi mea ua oo atu ia te i latou” (Alema 31:5).

4. Ia e maua le mafanafana i le iloaina e le manaomia ona e iloa mea uma e uiga i le lesona e avea ai ma se faiaoga tauaogaina. Fuafua ni nai fesili faigofie o le a mafai ai e lau vasega ona faasoa mai ni o latou aafiaga ma malamalamaaga. E mafai ona avea lea ma se vaega pito i faamomoi loto ma manatua pea o lau lesona.

5. I le avea ai o se faiaoga, ua valaauina oe ina ia e aoao foi. O le aoao atu o le talalelei “e manaomia ai a outou taumafaiga maelega ina ia faateleina ai lo outou malamalama ma faaleleia ai o outou tomai, i le iloaina lea o le a faalauteleina e le Alii o outou tomai e aoao atu ai i le ala ua Ia poloai mai ai.”¹

Mo nisi manatu faaleaoaoga, tagai i le O Le Aoao Atu, E Leai Se Isi Valaauga E Sili Ai.

Faamatalaga

1. O Le Aoao Atu, E Leai Se Isi Valaauga E Sili Ai (1999), 4.

Manatu Faaletaitai

A e i ai i se au peresitene, ia mautinoa e te auai pe a vaetofia faiaoga ma isi e galulue i la outou faalapotopotoga. Ona faatulaga lea o se taimi e mafai ona outou feiloai ai e:

1. Faamalamalama atu tiutetauave o le valaauga fou.

2. Avatu i ai tusi lesona po o mea mo taitaiga.

3. Ofo atu le lagolagosua ma nisi aoaoga.

4. Faailoa atu lou fiafia ma le faatuatua i le sui fou na tofia.

Pe Afai o le a Ou Aoao Atu

“Ou te faitau ma amata tatalo e uiga i lena lesona i le Aso Sa o i luma mai. E atoa lelei le vaiaso ou te tatalo ai, sailia musumusuga, mafaufau ai, e faitau ai ma matau tulaga moni o le olaga e faaaoga ai, ia o le a lagolago malosi ai la’u savali. O le a le vave tamau ai le lesona, ae o le a e ofo i le tele o mea e oo mai ia te oe i le gasologa o le vaiaso, le tele o mea e avatu e le Atua ia te oe—o mea o le a e lagona e faaaoga pe a tamau pe faamae’a lau sauniuniga.”

Elder Jeffrey R. Holland o le Korama a Aposetolo e Toasefululua, “Aoao Atu ma le Aoaoina Mai i le Ekalesia” (fonotaga faaleaoaoga a taitai i le lalolagi atoa, Fep. 10, 2007), Liahona, Iuni 2007, 58–59.