O Tala ia Iesu
O Ieova ma le Fuafuaga Matagofie a lo Tatou Tama Faalelagi
Ao lei i ai se la, se masina, e oo lava i le mutia e nofo ai i luga, sa tatou nonofo uma lava i le lagi ma o tatou matua faalelagi. O i tatou o a la’ua fanau agaga, ma e lei i ai ni o tatou tino faaletino i le taimi lea.
Sa tatou alolofa i le Tama Faalelagi. Ma sa Ia matua alofa lava ia i tatou o lea na Ia finagalo ai ia tatou ola ae e pei o Ia ma nonofo faatasi ma Ia e faavavau. Na finagalo o Ia ia tatou iloa mea uma lava na Ia silafia. Ae pe faapefea la ona tatou aoaoina na mea uma?
Sa i ai se fuafuaga matagofie lava a le Tama Faalelagi. Sa Ia faapotopotoina faatasi uma lava i tatou ma tau mai ia i tatou Lana fuafuaga. O le a Ia foafoaina se lalolagi matagofie lava e i ai vaitafe, mauga, fugalaau, ma manu. Ona Ia tuuina mai lea ia i tatou taitoatasi o se avanoa e o mai ai i le lalolagi ma maua ai se tino faaletino. O le a mafai ona tatou uuina ni oneone mafanafana i o tatou lima ma lagonaina le mutia malu i lalo o o tatou vae.
O le a i ai ni o tatou aiga i le lalolagi. O le a mafai ona latou fafagaina, puipuia, ma alolofa ia i tatou.
I le lalolagi o le a le mafai ona tatou manatuaina le Tama Faalelagi, o lea e manaomia ai lo tatou aoao e uiga ia te Ia. O tusitusiga paia, o perofeta, ma o tatou matua e mafai ona aoaoina i tatou e uiga ia te Ia. O le a faaosoosoina i tatou ia lē usiusitai, ma o nisi taimi o le a tatou faia ai ni mea sese. O nisi taimi o le a tatou mamai, ma i le iuga e tatau ai ona tatou oti uma.
O Ieova o le ulumatua lea o fanau a le Tama Faalelagi. Sa usitai e le aunoa o Ia i lona Tama. Sa pei lava o Ia o le Tama Faalelagi. Sa Ia taliaina le fuafuaga a le Tama Faalelagi. O se tasi o fanau agaga a le Tama Faalelagi, o Lusifelo, na tetee i le fuafuaga. Na ia fai mai e le tatau ona tatou fililfili i le va o le lelei ma le leaga.
Na fetalai mai le Tama Faalelagi, ina ia manuia lana fuafuaga, e manaomia se tasi e sau i le lalolagi e fesoasoani ia tatou iloa le ala e toe foi atu ai i le lagi.
Sa manaomia se tasi e faasino mai ia i tatou le ala e mulimuli ai i le Tama Faalelagi. O ai sa lava lona usiusitai e faia ai lenei mea?
Sa manaomia se tasi e togiola mo a tatou agasala ina ia mafai ona tatou salamo pe a tatou faia ni mea sese. O ai sa lava lona lelei e faia lenei mea?
Sa manaomia se tasi e maliu ma toetu mai ina ia mafai ona tatou toe tutu uma ma toe foi atu i le lagi. O ai sa lava lona toa ma lona alofa e faia lenei mea?
Pe sa i ai se tasi na naunau e fai nei mea uma mo i tatou?
E toatasi le tagata na i ai. O lo tatou uso matua, o Ieova, na fetalai mai, “O Au lenei, auina atu au” (Aperaamo 3:27).
Tatou te matuai alolofa lava ia te Ia mo lena mea.
Ina ua afio mai Ieova i le lalolagi, sa avea o Ia ma o tatou Faaola. Sa taua o Ia o Iesu Keriso.
Tauagavale: auiliiliga mai le Keriso ma le Talavou Mauoa, saunia e Heinrich Hofmann, faaaloaloga mai ia C. Harrison Conroy Co.; vaaiga i tua atu © Nova Development; Taimi o tala i Kalilaia, saunia e Del Parson; ogatotonu: ata tusi a Sam Lawlor; taumatau: ata pue © Getty Images; ata na tusia e Beth M. Whittaker