Feagai ma Luitau ma le Lototele
Pe sa e popole ea e uiga i le faataunuuina atoatoa o se galuega? Mafaufau i lagona atonu na oo ia Iosua ina ua ia suitulaga i le perofeta maoae o Mose. O le matafaioi mamafatu e taitai le nuu o Isaraelu i le nuu o le folafolaga na pau ia Iosua. Manatua o le nuu o le folafolaga na nofoia e le tele o tagata i atunuu eseese o Kanana, ma o le toatele o i latou e foliga taufaafefe ma saua. E mafai ona e manatunatu i lagona le mautonu na ono oo ia Iosua e uiga i ona tomai e faataunuu ai se galuega matautia, pe na oo foi i ai le fefe?
I totonu o fuaiupu e fa o le mataupu muamua o le Iosua, na poloaiina ai e le Alii Iosua ina ia faamalosi ma loto tele—na faatolu [ona poloaiina ai]! (tagai i fuaiupu 6–9). Ona folafola lea e le Alii ia Iosua o le a ia manumalo i le aumaia o Isaraelu i lo latou nuu o le tofi, o le a oo mai le malosi ma le lototele ia te ia ona o lona usiusitai i tulafono uma, ma—le mea aupito taua—o le a faatasi le Alii ma ia i mea uma e alu i ai.
O le autu o le Mutuale 2010 o le faataitaiga lona tolu lea o le valaau a le Alii ia Iosua ina “ia faamalosi ma lototele” (Iosua 1:9). O le valaau lava lena e tasi mo oe ina ia lototele. Ma o folafolaga foi lava na mo oe. Faatasi ai ma le fesoasoani a le Faaola, o le a e manuia foi i ou valaauga ma lou ola. O le a e maua le malosi e teena ai ni faaosoosoga pe a e usitaia poloaiga ma tausisia tulaga faatonuina o loo maua i le Mo Le Malosi o le Autalavou. Ao e faamamaluina le perisitua ma faafou i vaiaso uma feagaiga na e osia i le papatisoga, o le a mafai ona ia te oe pea le Agaga o le Faaola—e le aunoa.
E tele mea e le’i mailoa na feagai ma Iosua. Na te lei iloa pe faapefea ona ia auina atu le fanauga a Isaraelu i le nuu o le folafolaga, ae sa ia faatuatua i le Alii. E feagai oe ma luitau i lou olaga. Atonu o oe o se tasi o nai tagata laiti o le Ekalesia i la outou aoga po o lou aiga foi. E te ono lagona le faaesea po o le lotovaivai po o le fefe. E te ono lagona le le mautonu e uiga i lou lumanai i nei taimi faigata. Ae ia e lototele. E faatasi le Alii ma oe. E mafai ona e faatuatua ia te Ia. O le a Ia fesoasoani ina ia e manumalo.
O lenei faamanatu matagofie o loo maua i le Faataoto 3:5: “Ia e faatuatua ia Ieova ma lou loto atoa; ae aua le faalagolago i lou lava atamai.” A o matou galulue i o matou valaauga, ua matou tautino atu matou te faatuatua i le Alii. Matou te faamalosiau atu ia te outou ia outou faia foi lena mea. Matou te alolofa ia te outou. Matou te faatuatuaina outou. O outou o se vaega o le tupulaga filifilia o alii talavou malolosi ma le totoa.