IA LOTOTETELE: Taitai Atu le Ala i Tulaga o le Mama!
Pe na i ai ea se taimi na e manao ai e fai se eseesega i le lalolagi ae e te lei iloa po o fea le mea e amata ai? Pe na e manao ea e te tu atu mo se mea sa’o ae e te lei maua le lototele ona nei avea lena ma auala e ono ulagia ai oe e au uo? O le tausaga lenei e avea ai oe ma taitai lea na auina mai ai oe i le lalolagi. I le taimi nei, e sili atu nai lo le mea na i ai, ua manaomia ai e le lalolagi lou malamalamama ma lau taitaiga. E mafai ona e faia se eseesega.
O le autu o le 2010 ua valaauina ai i tatou “ia faamalosi ma loto tele” (Iosua 1:9). O le malosi ma le lototele o uiga ia o taitai. I le avea ai o se tagata o le Ekalesia, o oe o se taitai i tulaga o le mama ma le amiotonu.
O lo tatou perofeta, Peresitene Thomas S. Monson, ua valaau mai ia i tatou ia lototetele:
“O le a manaomia le lototele maoae ao e tumau ai i le amiotonu ma le amio mama i le lotolotoi o manatu ua taliaina i aso nei.
“I le vaaiga a le lalolagi i aso nei, e laitiiti lava se manatu o le a tumau pea alii ma tamaitai talavou i le ola mama ma le le pona ao lei faaipoipo. Po ua talia ai ea la amioga le mama? E matua leai lava!”1
O lou lototele e taitai o le a oo mai pe a e ola i tulaga faatonuina, faia filifiliga sa’o, ma mulimuli i le perofeta. O le a oo mai lou malosi a o e tauivi i aso uma e faateleina lau molimau i le Faaola e ala i le tatalo ma faitau i le Tusi a Mamona. O lou malosi e taitai ai isi o le a oo mai a o e ola ai i tulaga faatonuina o loo maua i le tamai tusi Mo Le Malosi o le Autalavou. Pe a e faia ia mea, o le a e maua ni lagona lelei e uiga ia te oe lava. O le a ia te oe le mautinoa, ma o le a e tuputupu ae i le malosi faaleagaga.
Ma aua nei galo le ‘ata’ata! Ia i ai se uiga lelei. “Ia tatou faia ma le fiafia mea uma o loo i ai i lo tatou mana; ona mafai ai lea i tatou ona tumau lava, ma le mautinoa mausali, e vaavaai atu i le faaolataga a le Atua” (MFF 123:17). O le iloaina o le sa’o ma le sese e mafaia lava (tagai Moronae 7:16), ma ua folafola atu o le a ta’uina atu ia te outou e le Agaga Paia “mea uma e tatau ona outou faia” (2 Nifae 32:5). A o e suesue, faalogo mo le taitaiga a le leo lemu ma le itiiti. Ua ia te outou le folafolaga mautinoa “o le mana foi o le Agaga Paia tou te iloa ai le tonu i mea uma” (Moronae 10:5).
Po o a lava ou tulaga, na e fanau mai e te taitai i lou aiga, i lau aoga, ma i lou nuu. O lenei la tausaga, ia e faamalosi, lototele, ma faia se eseesega i le lalolagi! E le o tuulafoaiina oe. O le a faafofoga le Tama Faalelagi ma tali mai i au tatalo ma taitai au gaoioiga pe a e tumau i le mama ma agavaa i le mafutaga faifai pea ma le Agaga Paia.
O outou o afafine o lo tatou Tama Faalelagi, o Le alofa ia te outou. O outou aso nei. Matou te alolofa ia te outou ma tatalo ina ia outou faamalolosi ma lototetele i le ola ai i tulaga faatonuina ma taitai le ala i tulaga o le mama. O la outou faataitaiga amiotonu o le a faia ai se eseesega!