Suia o le Lalolagi Tasi le Tamaitai Amio Mama i Taimi
Ia Aperila 2008, na tutū ai le au peresitene aoao faatoa tofia o Tamaitai Talavou o—Elaine S. Dalton, Mary N. Cook, ma Ann M. Dibb—i le tumutumu o le mauga o Ensign Peak i le itu i matū o le Aai o Sate Leki ma vaavaai ifo i le vanu.
Na iloa lelei mai i le mea na latou tutū ai le iila atu o le agelu o Moronae i luga o le Malumalu o Sate Leki, ma latou iloa ai le mea na finagalo ai le Alii mo tamaitai talavou o le Ekalesia.
Na u’uina i luga e nei tamaitai e toatolu se to’oto’o na agiagia ai se pulupulu auro mai Peru—la latou fu’a ma le tagavai mo atunuu, o se valaau mo se toe foi i le mama.
“E lē mafai ona matou talanoa i lenei tulaga faatāuaina fou o le mama e aunoa ma lo matou fai atu o le mafuaaga o lenei tulaga faatauaina o le malumalu,” na saunoa ai Sister Dalton. “Ma o le malumalu o le mafuaaga lea o mea uma o loo matou faia mo Tamaitai Talavou, aua o le a fesoasoani lena i nei tamaitai talavou ia o mai ia Keriso.”
Na faaopoopo aloaia le mama i tulaga faatāuaina a Tamaitai Talavou ia Novema 2008. O loo faamanino mai i le tusi o le Alualu i Luma o le Tagata lava ia “o se mamanu o mafaufauga ma amioga e faavae i tulaga maualuluga faatulagaina lelei. E aofia ai le lēgaviā ma le ola mama” (tusi, o le Alualu i Luma o le Tagata lava ia a Tamaitai Talavou 2009, 58)
E tulaga ese lava lenei tulaga faatauaina ona e manaomia aafiaga uma ma galuega faatino, nai lo isi tulaga faatauaina lea e saoloto ai tamaitai talavou ia latou filifiliga. E le gata i lea, mo le taimi muamua, na valaaulia ai tina latou te faamae’aina le polokalama lenei o le Alualu i luma o le Tagata lava ia ma a latou fanau teine ma maua ai a latou lava pine.
I le tausaga na te’a nei, na tali atu ai le anoanoa’i o tamaitai talavou ma isi i le lalolagi atoa i le valaau e toe foi i le mama, lea na faatumulia ai le ofisa o Tamaitai Talavou i tusi ma ata mai ia i latou na tali atu i le valaau. E toatele na a’ea mauga ma faaagiagia ai a latou lava fu’a.
O se tasi vaega o tamaitai talavou i Hannibal, Misuri, ISA, o e na mananao e faia se ta’utinoga e amio mama mai se mea maualuga ma lē mafai ona latou maua se mauga latalata ane, na feaei i se olo simā e 36 fogafale le maualuga, faaagiagia la latou fu’a, ma ta’utino mai o le a ola i se olaga mama.
I Mekisikō, o le igoa Aloaiaina o le Tulaga Faatamaitai Talavou e faaliliuina o le “O Le Taui o le Tamaitai Talavou o le Mama” O tamaitai talavou i Mekisiko na fiafia i le faaopoopo atu o le mama e avea o se tulaga faatauaina, na saunoa ai Sister Dalton—o se tulaga faatauaina ua latou masani ai.
“O le valaau mo le mama na taliaina ma le fiafia tele, mai vaega taitasi uma, i totonu ma fafo atu o le Ekalesia,” na saunoa ai Sister Cook. “E fiafia tele i ai taitai; e faamamafaina tele e taitai perisitua; na matua faafetaia e tina ma tina matutua.”
O galuega faatino mo le tulaga faatauaina o le mamā o le mulimuli lea i le apoapoaiga a le Faaola ina ia iloa o Ia (tagai MFF 19:23) e ala i le faitauina atoa o le Tusi a Mamona ma tusia e le aunoa manatu i se api o talaaga.
E i ai se i-meli mai se uso i Egelani mo le au peresitene o Tamaitai Talavou e faitauina faapea: “Ma te faatoese atu, ma le faanoanoa. O le a le mafai ona ma faamae’aina lena mea i le vave e pei ona sa ma mananao ai. O le mafuaaga, o loo ma suesue ma la’u tama teine i le Tusi a Mamona i se auala ma te lei faia muamua. O se aafiaga suamalie tele, ua ma manana’o ai e faato’ato’a lelei.”
O loo aoao mai le Tusi a Mamona i nuu sa manuia ma fiafia a o amio mama ma atoatoa, ae na aveesea lena ina ua lē toe amio mama, na saunoa ai Sister Dibb.
Sa tutusa le sagisagi fiafia o alii ma tamaitai e uiga i le tulaga faatauaina fou, na saunoa ai le au peresitene o Tamaitai Talavou, a o latou faailoa mai faata’ita’iga a vaega uma o alii talavou ma uarota taitasi ia na galulue faatasi i le tulaga faatauaina.
Na faamamafa mai e Sister Dibb e tatau ona tulimata’i atu alii ma tamaitai uma i le mama ina ia maua ai faamanuiaga aupito silisili. “E leai se mana po o se malosi o i alii e faaaoga ai le perisitua ua latou maua pe afai e le o ola mama,” na ia saunoa ai. “Ma e maua e tamaitai lena mana ma le malosi e faataunuu ai o latou valaauga faalelagi o le avea ai ma ni ava, tina, ma tamaitai a o latou faatinoina le mama.”
Na saunoa Sister Dibb e talitonu o ia o le tulaga faatauaina o le mama na teuina mo le taimi lenei, o se taimi ua faia ai e le lalolagi mea uma vagana ai le faalauiloaina o le mama.
“O se mea uiga ese ia i matou le tele naua o tamaitai i lenei lalolagi e mafai ona galo lo latou faasinomaga o ni afafine o le Atua,” na saunoa ai Sister Cook. “Ua na ona matou faamanatu ia i latou lena mea, ma le mea moni afai ua e faia se mea sese, e mafai ona e salamo.”
O le tautinoga e tumau i le amio mama ma le atoatoa e mafai, ona o le mana faaola o le Togiola a le Faaola, na saunoa ai Sister Dibb. O le aafiaga o le tulaga faatauaina lona fa e taulai lava i le salamo.
I le tausaga ua te’a, e toatele tamaitai—o e matutua ma e talavou—ua latou faaalia se manaoga e toe foi e avea ma tamaitai amio mama. “[O le faaopoopo i ai o le mama] ua maua ai se fiafiaga mo tamaitai o e na faia ni filifiliga sese. E toatele ua fai mai, ‘E mafai ona toe avea a’u ma tamaitai amio mama. … E mafai mo au,’” na saunoa ai Sister Cook.
O le toatele o e ua mananao e toe amio mama, ua tau mafaufau po o fea e mafai ona latou amata ai. Ua faasoa atu ia i latou e le au peresitene o Tamaitai Talavou le auala lenei: Tatalo i le po ma le taeao. Faitau i le Tusi a Mamona mo le lima minute po o le sili atu i aso uma. Ma ataata.
“Pe a na faia e tamaitai uma o le Ekalesia ma le lalolagi lenei mea, mafaufau i le mea o le a oo i ai le lalolagi i le isi lima tausaga,” na saunoa ai Sister Dalton. “Matou te talitonu o tamaitai talavou amio mama e taitaia e le Agaga e mafai ona latou suia le lalolagi.”
O tamaitai talavou i le Siteki a Santo Domingo Dominican Republic Independencia na latou aea Cambita Garabito, o se mauga i le Ripapelika Tominika, lea na latou faaagiagia ai la latou lava fu’a o le mama ia Aokuso 2009.
Ata pueina i faaaloaloga a Iván Heredia.