Na fesili au uo le lolotu pe aisea e tatou te faia ai sui papatisoga mo e ua maliliu. E manatu i latou o se mea uiga ese. Pe faapefea ona ou tali atu ia i latou?

Sa aoao mai Iesu, “Afai e le fanau se tasi i le vai ma le agaga, e le mafai ona sao o ia i le malo o le Atua” (Ioane 3:5). O lona uiga ina ia mauaina le ola faavavau—le faamoemoega o lo tatou i ai iinei—e ao ona papatisoina le tagata ma maua le Agaga Paia.

E ui ina tatau ona papatiso, ae e i ai ni mafuaaga e mafua ai ona le papatiso le toatele o tagata. Sa ola nisi e aunoa ma le iloa o le talalelei, a o isi na papatiso e aunoa ma le pule tonu.

Ona o lo tatou Tama Faalelagi e alofa tele ma amiotonu, Na te le mafai ona ia teena Lana fanau o e latou te lei maua le avanoa e papatiso ai a o soifua. Ina ia maua e nei tagata ua maliliu le avanoa e maua ai le ola faavavau, ua faia ai sui papatisoga mo i latou e tagata agavaa o le Ekalesia i malumalu (tagai 1 Korinito 15:29; MFF 124:29–36; 128:18).

O tagata ua maliliu, o e o i le lalolagi o agaga, e filifili i latou i le taliaina po o le teenaina o le talalelei ma sauniga ua faia mo i latou (tagai MFF 138:58–59).

O le faia o sui papatisoga mo e ua maliliu, ua e tuuina atu ai le avanoa i le tele o fanau a le Tama Faalelagi e maua ai Ana faamanuiaga uma.