O Le Mana o se Fesili
Sa fesili mai lau uo pe aisea ma te le o atu ai ma lou tuagane i vasega faalelotu. O lena fesili na ou maua ai le avanoa e tau atu ai ia te ia le talalelei.
Na amata le ma faauoga ma Kerstin ina ua 14 ou tausaga. Sa ma aooga i le aoga e tasi. Na ou masani ia te ia mo se taimi umi lava, ae sa ou le malamalama lelei i lona tagata aua foi e 12 ona tausaga.
Na amata ona ma masani lelei ina ua ma taumafai mo se vaega o le tala faatino a le aoga. Na vave lava ona avea maua ma uo lelei, e ui lava e lua tausaga ma te eseese ai. E lei umi ae amata ona ma feiloai faatasi i aoauli mo ni savalivaliga ma talatalanoaga. I se tasi o aoauli o le tautotogo, i se tasi o a ma savalivaliga, sa ia fesili mai ai i se mea lea na suia ai lona olaga e faavavau.
Sa taumanatunatu Kerstin pe aisea ma te le auai atu ai ma lou tuagane i le vasega faalelotu a le aoga e pei o le tele o tamaiti aoga i Austria. Sa ou tau atu ia te ia e uiga i le talalelei a Iesu Keriso ma faapea foi ma le Ekalesia a Iesu Keriso o le Au Paia o Aso e Gata ai. Ona ou tuuina atu lea o lau molimau ma valaaulia o ia e sau i se gaoioiga a le autalavou. Mulimuli ane sa ou tuuina atu ia te ia se kopi o le Tusi a Mamona ma le Liahona.
Talu mai lava lena taimi sa auai mai Kerstin i gaoioiga uma lava a le Ekalesia ma e auai mai i sauniga lotu i Aso Sa taitasi. Sa auai mai foi o ia e oo lava i le konafesi a le autalavou. Soo se taimi lava ma te mafaia ai, ma te savalivali ai i se tamai vaitafe e lata ane e faitau a ma tusitusiga paia ma galulue i le Tusi o le Alualu i Luma a Tamaitai Talavou.
O le mea e faanoanoa ai, e le mafai ona papatisoina Kerstin seiloga e atoa lona 18 tausaga. E le mananao ona matua e faatupuina ni fefinauaiga ma tagata o lona aiga lautele. E ui lava i lenei faafitauli, sa mafai lava e Kerstin ona tauanau lona tina e sau i le lotu.
E galulue foi Kerstin faatasi ma faifeautalai. E talanoa lava ia e uiga i le Ekalesia i so o se tagata lava e feiloai i ai ma sa fesoasoani e faafiafia mai lona tama i le polokalama o le talafaasolopito o aiga, e ui lava e le fiafia o ia [lona tama] i mea tau lotu.
O Kerstin o se faataitaiga ia te au i le faigofie ona talanoa atu i isi e uiga i le talalelei ma le auala e sauniaina ai e le Tama Faalelagi tagata e faalogo i Lana upu. Pau lava le mea e manaomia e i tatou o le tatala o o tatou gutu ma ia i ai le faatuatua. O le vaega o totoe o le a faia lava e ia.
ata na tusia e Amy Thompson