Sauniuniga mo le Perisitua
Sa matua fiafia lava Hansen Prabhudas e sefulu tasi tausaga o le Paranesi a Bangalore Lua, i le Itumalo o Bangalore i Initia. Pe a tuua le lotu o le a aoaoina o ia e tama matutua o le paranesi i le auala e saunia ai, faamanuia, ma tufa ai le faamanatuga.
Muamua lava, sa faasino atu e tama o loo avea ma aoao i le Perisitua Arona ia Hansen le auala e saunia ai fata o falaoa ma faatutumu ipu i vai.
Sosoo ai lea, o le faitauina e ositaulaga o le tatalo o le faamanatuga ma faamalamalama atu ia te ia le auala latou te gaugau ai ie laulau.
Na mulimuli lava, ona faasino atu e tiakono le mea latou te tutu ai, le auala e tufa atu ai le faamanatuga i le aulotu, ma le auala e fesoasoani atu ai i tagata uma ia faaaloalo.
“E taua le Perisitua Arona,” o le tala lea a Hansen. “E tele mea e tatau ona ou faia e saunia ai ina ia mauaina.”
E faatasi ai ma le aoaoina e uiga i le faamanatuga, o loo faitauina e Hansen ia tusitusiga paia ma taumafai e tausi poloaiga ma usitai i ona matua. O loo ia aoao foi e uiga i le Ekalesia i le Peraimeri ma tuuina atu se faataitaiga lelei mo lona uso e iva tausaga, o Kiteona.
Faamanuiaga o le Perisitua
O loo aoaoina e Hansen ni mea se tele e uiga i le perisitua mai lona tama, o lē o loo umiaina le Perisitua Mekisateko ma o loo auauna atu i le au peresitene o le korama a toeaina. “Na papatisoina au e Tama ma, mulimuli ane ai, Kiteona” o le tala lea a Hansen. “A ma’i Tina, e fesoasoani atu o ia e tuuina atu faamanuiaga o le perisitua ina ia mafai ona malosi o ia.”
Faamamaina le Avega
E fesoasoani atu foi le tama o Hansen ia tina i le faiga o faatauga ma le kukaina o meaai. “Na te faia mea uma na te mafaia e fesoasoani mai ai ia te i matou,” o le tala lea a Hansen. Ma e fesoasoani uma ona matua i le tele o tagata, ae maise lava i totonu o le Ekalesia.
E masani lava ona pisi le tina o Hansen i lona valaauga o se peresitene o le Peraimeri o le paranesi. E faamamaina e Hansen le avega a lona tina i lona alu atu lea e faatau mai fualaau faisua po o le fufuluina o ipu.
“Ou te alofa i ou matua,” o le tala lea a Hansen. “E faia a matou afiafi faaleaiga i vaiaso taitasi, matou te faitauina tusitusiga paia o se aiga, ma e faia a matou tatalo faaleaiga faatasi.”
Auaunaga i le Olaga Atoa
Pe a fai e 11 ou tausaga, e tele mea e te sauniuni i ai. “E tatau ona ou aoao ia matua sili atu ona faalogo lelei i le Agaga Paia,” sa fai mai ai Hansen. “O le a ia taialaina au ao ou aoaoina le talalelei i lau korama o le perisitua, i Alii Talavou, ma mulimuli ane i le seminare. O na mea uma o le a fesoasoani ia te au e saunia ai e avea ma se faifeautalai. Ma e tatau ona ou aoao e fesoasoani atu i e matitiva ma tuuina atu se auaunaga sili atu,” o le tala lea a Hansen. “E tatau ona ou saunia mo se auaunaga mo le olaga atoa, aua o le perisitua o lona uiga o le auauna atu i isi faapei ona faia e Iesu Keriso pe ana iinei o Ia.”
O le tala faatusipaia e sili ona fiafia i ai Hansen o le tala ia Noa. “Ou te fiafia i le ala na usitai ai manu ia te ia ina ua oo i le taimi e o i le vaa.” Na ia iloa e tele mea e tatau ona fai e Noa e saunia ai mo le lumanai, e pei lava ona tele mea e tatau ona fai e Hansen e saunia ai mo le perisitua.
Gaoioiga e Fiafia i ai Hansen
Taaloga: o le taaloga e sili ona fiafia i ai Hansen o le badminton [e pei lava o le voli ae faaaoga ia lake], ae fiafia foi i le kirikiti, soka, pe na o se tuuga tamoe lava ma lona uso ma le la uo e nofo i lalo atu i se tasi o magaala. “Pe tou te taaalo i le badminton, kirikiti, po o le soka, e taua lo outou taaalo o se au,” na fai mai ai Hansen. “E pei lava o le perisitua, aua i le korama a le perisitua e tatau foi ona outou galulue o se au”
Tausiaina o i’a: E faafaileleina e Hansen tamai i’a auro i se pakete vaitimu na te teuina i tua o lo latou fale mautotogi. Ona ia tuuina atu lea o nei i’a i se faatanoa vai laititi. “Ou te fiafia i le tele o lanu matagofie ma le ala e taaalo faatasi ai i’a,” o lana tala lea.
Pesepesega: “O Loo Tautalagia le Alofa Iinei” (Tusipese a Tamaiti, 102) o le pese Peraimeri e sili ona fiafia i ai Hansen. E fiafia o ia la te usuina ma Kiteona a la pese e uiga ia Iesu, ae maise lava pese lotu. “O pese lotu e fesoasoani lea ia i tatou e faatumauina ai le alofa i totonu o o tatou aiga,”o le tala lea a Hansen.
O Gafea o le Lalolagi e i ai Bangalore, Initia?
Initia
Bangalore
Ata pue na saunia e Richard M. Romney; faafanua na saunia e le Mountain High Maps, © 1993, Digital Wisdom, Inc.
O loo aoao Hansen e uiga i le tuuina atu o se faataitaiga lelei i tulaga eseese: faatasi ma e o umia le Perisitua Arona i lana paranesi, i taimi o afiafi faaleaiga, taaloga lakapi, ma lo la’ua sauniaina ma lona uso laitiiti o Kiteona, o meaai.