E Le’i I Ai Sa’u Pepa Faataga o le Malumalu

Anne-Mette Howland, Iuta, ISA

Ao 17 ou tausaga, sa ia te au se naunau malosi e fia vaai i se malumalu o le Au Paia o Aso e Gata Ai. Sa ou nofo i Tenimaka ma lou aiga, ma i lena taimi sa leai se malumalu. Mo le Au Paia o loo nonofo i Tenimaka, o malumalu pito i lalata atu sa i Suetena ma Egelani. Sa ou le iloa se tasi i na atunuu, o lea la o le malaga atu i na atunuu na o au sa le mafaufauina.

Peitai ona sa i ai o’u aiga i Iuta, sa ou filifili loa e teuina se tupe ina ia ou asiasi atu ai ma faia papatisoga mo e ua maliliu i le Malumalu o Sate Leki. Sa ou tusi atu i ou tausoga ma lo latou tina i Iuta pe i ai se afaina pe a ou alu atu mo se asiasiga. Sa matuai fiafia i latou e faalogo i au fuafuaga.

I le tausaga mulimuli ane sa mafai ai loa ona lava la’u tupe lea na teuina mo lau malaga ua leva ona ou tatalia. E lei leva ona ou taunuu i Iuta, ae ave au e le [tina o ou tausoga] i le Malumalu o Sate Leki. Sa ou matuai fiafia lava e vaai tino atu i ai ma naunau e faia papatisoga mo e ua maliliu. Peitai, ina ua ou taunuu atu i le faitotoa e ulufale ai i totonu, sa fesili mai se tasi o le aufaigaluega a le malumalu e fia vaai i la’u pepa faataga o le malumalu. E lei ta’u mai lava e se tasi ia te au e uiga i se pepa faataga o le malumalu! Sa faamatala mai ma le agalelei e le tagata faigaluega o le malumalu le mea e ta’u o le pepa faataga o le malumalu ma fai mai ia te au e mafai ona ou mauaina mai i lo’u epikopo.

Sa tau pe lo’u fatu. Sa tatau ona malie lo’u loto i le na o le asiasi i aiga ma vaavaai atu i le malumalu mai fafo.

I le taimi o le sauniga anapogi ma molimu i le Aso Sa na sosoo ai, sa ou lagonaina le manaomia e faasoa atu la’u molimau, e ta’u atu ai i le faapotopotoga le faamanuiaina o i latou i le nonofo latalata i se malumalu. Sa ou ta’u atu foi semanu ou te fiafia pe ana ou alu i totonu ae e lei mafai aua sa leai sa’u pepa faataga, e ui lava sa aoaoina pea au ia ola agavaa. Sa faaiuina la’u molimau i le uunaia o le au paia ia auai atu soo i le malumalu pe a talafeagai ai.

Ina ua maea le lotu, sa oo mai le epikopo a lo’u aiga ma fai mai o le a ia taumafai e fesoasoani ia te au ia maua se pepa faataga o le malumalu, ma na ia faatulagaina loa le faatalanoaga. Sa ia fesili mai ia te au i le taimi o le faatalanoaga, pe tautala faaPeretania lo’u epikopo. Sa ou fai atu e leai. Ona ia tali mai lea, “Ou te le tautala foi i le gagana Tanisi.” Sa toe tau pe foi lo’u fatu.

Peitai na fai mai le epikopo, “Ua e oo mai i lenei mea mamao; aua ta te fiu gofie. Ou te iloa o le a fesoasoani mai le Alii ia i ta’ua. E tatau lava ona i ai lo ta faatuatua.”

Ona ia fesili mai lea i le numera o le telefoni o la’u epikopo i Tenimaka, lea na i ai ia te au. Sa ou tei i le faalogo atu i le atalii o lo’u epikopo o loo taliina mai le telefoni. Sa fai mai e lei leva ona toe foi mai lana misiona i Egelani. Ina ua ou tauina atu i le epikopo Amerika, na ia fai mai, “Lelei tele. E mafai ona ia faaliliu mo i ta’ua.”

E lei leva ae matou talanoa toafa i le telefoni—o lo’u epikopo o loo tuuina mai ia te au se faatalanoaga mo se pepa faataga, o lona atalii o loo faaliliuina mo le epikopo Amerika. E lei umi ae ou mauaina loa la’u pepa faataga ma sa mafai ai loa ona ou ulufale atu i le malumalu! Sa le mafai ona ou faamatalaina i upu le fiafia sa ou lagonaina i le iloaina lea sa tatalaina e le Alii le auala mo au.

Sa ou faaipoipo mulimuli ane i le malumalu ma ua faamanuiaina i se fanau aulelei e toafa. Ou te matuai faafetaia le Tama Faalelagi i le tuuina mai ia i tatou o malumalu, ma ou te faafetai i le iloaina ua faamauina au i lou aiga ma, pe afai tatou te ola amiotonu, e mafai ona tatou faatasi e faavavau.