Mo Tamaiti Laiti
Aoaoina o le Faiaoga a Tana
“Ou te manao ia avea o se faifeautalai i le taimi nei. Ou te le fia faatali sei ou matua” (“Ou Te Fia Faifeautalai Nei,” Tusipese A Tamaiti, 90).
1. I se tasi aso na maua ai e Tana se ata o Iesu. Sa fiafia o ia i le ata. Na manao o ia e faasoa atu le ata i se isi. Na ia iloa e le o tagata uma lava e iloa se mea e uiga ia Iesu.
2. “Tina, e mafai ona ou tuuina atu lau ata o Iesu i se isi?” O le fesili lea a Tana.
“Ioe,” o le tali lea a Tina. “O ai o le a e aveina i ai?”.
“O le a ou tuuina atu i lou faiaoga, o Mrs. Young. Ou te fiafia ia te ia aua na te faitau maia ia te au le tele o tala.”
“O se manatu manaia tele lena,” na fai mai ai Tina. “Ua ou mitamita lava ia oe.”
3. Ina ua taunuu atu Tana i le aoga faataitai, sa ia tuuina atu le ata ia Mrs. Young. Sa fiafia o ia ina ua mauaina se ata o Iesu. Sa fiafia Tana ona sa fiafia lona faiaoga i le ata.
4. I ni nai aso mulimuli ane, sa faia ai e Tana ma lona aiga se tusi e foliga i papatusi auro o le Tusi a Mamona. Ona latou tusiaina lea o a latou molimau i totonu o le tusi.
“Tina, e mafai ona ou aveina la tatou tusi i le aoga e faaali ia Mrs. Young?” O le fesili lea a Tana.
“Ioe, e te mafaia,”o le tali lea a Tina.
5. O le aso na sosoo ai, sa alu ai Tana i le aoga ma amo se ato faafafa o loo i ai i totonu papatusi auro a lona aiga. Sa ia faamatala atu ia Mrs. Young e uiga i le tusi na faia e lona aiga. Sa matua fiafia le faiaoga a Tana.
6. Ina ua alu atu Tina e aumai Tana mai le aoga i lena aso, sa alu ane lona faiaoga e talanoa ma le tina oTana.
“Na aumai ananei e Tana se mea matuai mataina lava,” o le tala lea a Mrs. Young. “E mafai ona e faamatala maia nisi mea?”
“Mata e mafai ona oulua o mai ma lou toalua tatou te faiaiga i lo matou fale?” Na fesili ai Tina. “E mafai ona tatou talanoa atili ai iina.”
“E manaia lena,” o le tali mai lea a Mrs. Young.
7. I ni nai masina mulimuli ane, sa o atu ai Tana ma lona tina i le papatisoga o Mrs. Young ma lona toalua.
“Ua ou fiafia lava ina ua ou faasoa atu lau ata o Iesu i lou faiaoga,” o le tala lea a Tana.
“Ou te iloa ua fiafia foi o ia [lou faiaoga],” fai mai ai Tina. “O oe le mafuaaga moni lava ua mafua ai ona papatiso Mrs. Young ma lona toalua i le aso.”
8. Sa maua e Tana se lagona fiafia ao ia vaavaai atu o papatisoina Mrs. Young. Sa ataata o ia a o soso atu Tina ma musumusu atu, “O tamaiti tai-fa-tausaga o ni faifeautalai maoae!”
Tauagavale: ata na tusia e Elise Black