O Le A Se Mea E Tatau Ona Tatou Faia Pe Afai Tatou Te Le Iloa Le Mea e Fai?

Saunia e Elder Stanley G. Ellis

O Le Fitugafulu

O loo faamoemoe le Alii ia i tatou e fesili, suesue, ma faatino e tusa lava pe tatou te le mauaina le malamalama atoa.

Ina ua mavae taumafaiga faifai pea lē faamanuiaina a Nifae ma ona uso e aumai papatusi apamemea mai ia Lapana, na alu atu ai loa Nifae e faia se taumafaiga mulimuli, “ua le muai iloa mea [ou] te faia” (1 Nifae 4:6).

O le tele o perofeta i le aluga o tausaga na oo foi i se luitau faapea e manaomia ai le galue e ala i le faatuatua. Na poloaiina Atamu e osi atu taulaga e aunoa ma le iloa pe aisea (tagai i le Mose 5:5–6). Na tuua e Aperaamo lona nuu ae malaga atu i se laueleele fou o le tofi e aunoa ma le iloa po o fea o i ai (tagai i le Eperu 11:8; Aperaamo 2:3, 6). Na malaga Paulo i Ierusalema e aunoa ma le iloa po o le a se mea o le a tupu ia te ia pe a taunuu atu (tagai i le Galuega 20:22). Na tootuli Iosefa Samita i le togavao e aunoa ma le iloa po o fea o ekalesia e tatau ona ia auai (tagai i le Talafaasolopito a—Iosefa Samita 2:19).

Tatou te oo foi i tulaga ia e manaomia ai i tatou e galulue e aunoa ma le iloaina po o le a le mea e fai. E faafetaia ai, ia aafiaga na taua i luga o loo aoao ai i tatou i auala tatou te agai ai i luma e ui lava i le le mautonu.

Na faamalosiau atu Nifae i ona uso ia faamaoni i le tausiga o poloaiga a le Alii (tagai i le 1 Nifae 4:1). Ona ia galue loa lea e ala i lena faatuatua. Na ia “tolotolo atu i le aai ma alu e agai atu i le fale o Lapana,” a o “taitaiina e le Agaga” (1 Nifae 4:5–17). Na tau atu e le Agaga ia te ia e le na o le mea e fai ae faapea foi ma le taua na te faia ai (tagai i le 1 Nifae 4:12–14).

Na tali atu Atamu e ala i le “usiusitai i poloaiga a le Alii” (Mose 5:5). Sa galue Aperaamo i le faatuatua ma, o se taunuuga na, “aumau ai o ia i le nuu na folafolaina” (Eperu 11:9). Na filifili ia Paulo o le a le fefe i “noanoaga ma puapuaga”ae ia faaiu le galuega na ia “maua mai le Alii o Iesu” (Galuega 20:23–24). Na mafaufau loloto ia Iosefa Samita i tusitusiga paia ma naunautai e mulimuli i le valaaulia ia “ole atu i le Atua” (Talafaasolopito a—Iosefa Samita 2:13).

O Lo Tatou Tiutetauave e Faatino

O loo lapatai mai tusitusiga paia o le lē iloa e le o se ’alofaga lea o le le faia. Na mafaufau Nifae i lona loto i “mea na ia fia iloa na vaaia e [lona] tama,” ma na aveeseina o ia i le Agaga o le Atua” (1 Nifae 11:1). Na faaaluina e Lamana ma Lemuelu lo la taimi e “fefinauai ai o le tasi i le isi e uiga i mea na fai atu ai [Liae] ia i laua” (1 Nifae 15:2).

O loo faamoemoe le Alii ia tatou ole atu, suesue, ma faia loa—e ui lava o loo i ai nisi mea i lenei olaga tatou te le mailoa lava. O se tasi o nei mea o le itu aso o Lona Afio Mai Faalua. Na ia faapea mai, “O lea, ia outou mataala ai, auā tou te le iloa po o le fea itu aso e sau ai lo outou Alii” (Mataio 24:42). Ona o lenei le mautonu, na fautuaina ai e Peresitene Uilifoti Uitilafi (1807–98) ia tagata o le Ekalesia ia saunia, ae na ia folafola mai o le a ia totoina pea ia laau vine suamalie.¹

“Pe a outou ola agavaa ma o a outou filifiliga e ogatasi ma aoaoga a le Faaola ma e manaomia tou te faatinoina, ia faia loa ma le faatuatua,” o le saunoaga lea a Elder Richard G. Scott o le Korama a Aposetolo e Toasefululua. Afai tatou te nofouta i musumusuga a le Agaga, na faaopoopo mai ai ia Elder Scott, “a lē o le oo mai o le pogisa o le mafaufau, e faailoa mai ai se filifiliga le talafeagai, po o le lagonaina o le filemu po o le mu i totonu o le loto, e faamautinoa mai ai e sa’o lau filifiliga [tagai MFF 9:8–9]. Pe a e ola amiotonu ma o loo galue ma le faatuatua, o le a le tuuina outou e le Atua e agai ese mamao atu e aunoa ma se uunaiga o le lapataiga pe a fai na outou faia ni filifiliga sese.”²

Tofotofo i le Alii

E lua ni aafiaga mai lo’u olaga—lea na ou le mautinoa ai le mea e tatau ona fai—e faapupula ai le taua o le usitaia o poloaiga ma mulimuli i perofeta soifua. I le kolisi sa leai sa’u tupe, o lea sa ou sueina ai se galuega le-tumau. Ina ua ou mauaina lau siaki muamua, sa ou le iloa pe e lava ou te aulia ai le isi ou totogi. Peitai na ou manatuaina le folafolaga a le Alii e uiga i le sefuluai: “Tofotofo mai ia ia te au i lenei mea … pe ou te le toina pupuni o le lagi mo outou, ma sasaa atu le manuia mo outou” (Malaki 3:10).

Sa tonu ia te au e tofotofo i le Alii. Sa ou totogia muamua lau sefuluai, ma Na ia faamanuia au ia ou ola. I lena tulaga na ou aoao ai e faatuatua i Ana folafolaga.

I tausaga mulimuli ane, ina ua i ai le ma fanau laiti ma Sister Ellis ma na ou amataina se tomai faigaluega fou, na suia le fuafuaga o le inisua o togafitiga tau faafomai. O le a faagata le fuafuaga tuai i le aso 1 o Iuni ao le fuafuaga fou e amata i le aso 1 o Iulai, o le a leai so matou inisiua mo le masina e tasi. Sa matou le iloa le mea e fai, peitai i lena lava taimi na matou manatuaina ai se saunoaga a Peresitene N. Eldon Tanner (1898–1982) lea na ia fautuaina ai tagata e tatau lava ona i ai pea i taimi uma ia inisiua o togafitiga tau faafomai.³

Sa ou talanoa ma le kamupani, ma matou feutagai i se konekarate ia mautinoa ai o loo faaauau pea le inisiua i le masina o Iuni. I le aso 28 o Iuni na pau mai ai le ma tama ulumatua o Mataio, mai le laupapa e puna mai ai mai le vaitaele a le matou tuaoi ma tau i le sima pito i lalo [o le vaitaele]. Na lavea lona ulu ma na afaina ai lona faiai. Na aveina atu faavave o ia e le helikopa i le falemai, lea na togafitia ai o ia e fomai faapitoa. Na matuai taugata ia le tau [o ona togafitiga] ma semanu e afaina ai i matou i mea tautupe. O le mea na lelei ai, na totogi e le inisiua le tele o ona togafitiga.

O Le a Se Mea E Tatau Ona Tatou Faia?

Ia o le a la le mea e tatau ona tatou fai pe a tatou le iloa le mea e fai? E le manaomia ona tatou saili i fafo atu o perofeta, tusitusiga paia, ma le Faaola mo se tali. O nei faapogai taua o loo aoaoina ai i tatou ia:

Saili ia tali e ala i le suesue ma le tatalo.
Usiusitai i poloaiga.
Faatuatua i le Alii ma i Ana folafolaga.
Mulimuli i le perofeta.
Ia Agai i luma i le faatuatua, aua le fefe.
Faataunuu la tatou misiona.

Ma i nei sitepu taitasi, ia tatou mulimuli i fautuaga a Peresitene Boyd K. Packer, Peresitene o le Korama o Aposetolo e Toasefululua: “Ia mulimuli pea lava pea i musumusuga a le Agaga.”⁴

Ata na saunia e Matthew Reier

Na tuua e Aperaamo lona nuu ae malaga i le laueleele fou o le tofi e aunoa ma lona iloaina po o fea e i ai. Na ia faatinoina i le faatuatua ma, o se taunuuga na, “aumau ai o ia i le nuu na folafolaina.”

E le manaomia ona tatou saili i fafo atu o perofeta, tusitusiga paia, ma le Faaola mo se tali.

Tauagavale: Ua Tuua e Aperaamo ia Arana, saunia e G. Bernard Benton; taumatau: ata tusi na saunia e Gregg Thorkelson