O Le Tusi Lesona Fou o Mataupu Faavae o le Talalelei
O lenei tusi matagofie o le a avea ma se faaopoopoga maoae i soo se faletusi i totonu o maota ma laoa faapea foi i potuaoga a le Ekalesia.
Mai le 1998 o tusi lesona mo vasega a le Perisitua Mekisateko ma le Aualofa o voluma o Aoaoga a Peresitene o le Ekalesia (o le a ta’ua nei voluma o Aoaoga). O tusi lesona taitasi e taulai atu i le soifuaga ma aoaoga a se tasi o o tatou perofeta pele. O nei tusi matagofie ua fofoaina mai ai ni punaoa ua matuai aoga mo au paia i le salafa o le lalolagi ina ia latou iloa ai ma alolofa i nei tamalii maoae ma mataupu faavae ofoofogia na latou aoao mai. O a latou fautuaga e musuia ma taua i nei vaitaimi e pei ona muai tuuina mai i saunoaga a le Usoga o loo aofia i na tusi. Matou te faamoemoe o le a faaauau pea ona tou faaaogaina tusitusiga musuia a nei auauna faamaoni a le Alii. O a latou aoaoga e leai se taimi faatapulaa.
E amata atu i le 2010 o le a tatou malolo mo le lua-tausaga mai le suesueina o tusi lesona o lenei voluma. O le a suitulaga ai la, i le taimi o vasega a le au Perisitua Mekisateko ma le Aualofa i Aso Sa lona lua ma le lona tolu i masina taitasi, o le a tatou suesueina ai le tusi lesona ua toe faafouina O Mataupu Faavae o le Talalelei. E masani lava, atonu e taumanatunatu tagata pe aisea ua faia ai lea suiga ma pe o le a faapefea ona aafia ai i latou. O nisi nei o fesili e ono oo atu i o latou mafaufau faatasi ai ma ni tali.
Aisea ua i ai le Suiga i Mataupu Aoaoina?
Talu ona tatou amata faaaogaina ia Aoaoga, e faitau miliona tagata ua liliu mai i le Ekalesia. O le toatele o i latou e maaleale a latou molimau ma, i le le lava ai o le tomai i le Ekalesia, o le a matuai faamanuiaina i latou e ala i le taulai atu i faavae autu o le talalelei. E le gata i lea, o tagata uma o le Ekalesia o le a faamanuiaina e ala i le toe foi i faavae autu. I le taimi nei o le suesueina ma le faaeteete o mataupu faavae autu e pei ona tuuina mai i le tusi lesona fou ua toe faaleleia atili O Mataupu Faavae o le Talalelei o le a fesoasoani lea i tagata o au paia e faamalolosia lo latou malamalamaaga i aoaoga faavae o le talalelei.
O tusi lesona o Aoaoga na avea ma mataupu aoaoina matagofie mo a tatou vasega ma faaopoopoga taua i o tatou lava faletusi. I le 2012 o le a toe amata ai ona tatou suesue i aoaoga a o tatou Peresitene maoae.
Pe Faapefea Ona Aafia Au I Lenei Mea?
O le tusi lesona O Mataupu Faavae o le Talalelei o le a faaaoga lea o se mataupu o suesuega mo Aso Sa lona lua ma le tolu a vasega a le au Perisitua Mekisateko ma le Aualofa. O le a faaaoga foi o se tusi lesona mo le vasega o Mataupu Faavae o le Talalelei o le Aoga Sa mo tagata fou faatoa liliu mai, tagata sailiili, ma tagata o loo toe faatoaagaina mai. Ona o lenei, o nisi o outou e ono manatu pe o le a leai se tulaga o le toe faia foi. Ioe o le a i ai! Pe le matagofie ea le mafai ona tatou mauaina lea faamanuiaga faaopoopo o le fai ma saga fai. E oo lava i le Faaola sa faatele ona ia aoaoina mai se aoaoga faavae e tasi ina ia faamautu ai ni manatu faavae. Mafaufau pe faafia ona Ia aoao mai i tatou e ala i tusitusiga paia ia talitonu ma ia papatisoina (tagai, mo se faataitaiga, 3 Nifae 11:23–38)!
I le iloaina lea e manaomia ona tatou aoaoina ia mataupu faavae i lea fuaiupu ma lea fuaiupu, o lea mataupu ma lea mataupu, e fai faafia mai e le Alii le tele o manatu faavae ina ia aua lava nei o tatou misia (tagai i le Isaia 28:10, 13; 2 Nifae 28:30; MFF 98:12; 128:21). O nei faatonuga, e taulimaina e faiaoga alofa o e amanaiaina le soifua solo lelei o tagata o le vasega, o le a fesoasoani ai e faateleina le faatuatua i le Alii o Iesu Keriso.
Peitai, i le faatinoina o le a leai se eseesega tele nai lo le mea e ono manatu ai se tasi. I le tulaga masani lava o le a faaaoga e vasega a le au Perisitua Mekisateko ma le Aualofa ia le tusi lesona i vaiaso e lua o le masina, i Aso Sa lona lua ma le tolu, e pei lava ona sa faaaogaina ai tusi lesona o Aoaoga. O le a mulimuli lesona i se faasologa lelei lea o le a mae’a ai le tusi lesona O Mataupu Faavae o le Talalelei i le lua tausaga. I le taimi nei, o faiaoga o loo sauniuni mo le vasega o Mataupu Faavae o le Talalelei i le Aoga Sa, o le a faafetauia a latou lesona i vaiaso taitasi i manaoga o e auai i a latou vasega. I se tulaga lautele, o tagata ua faatoa liliu mai, tagata sailiili, ma tagata ua toefaatoaaga mai o le a auai i le vasega O Mataupu Faavae o le Talalelei mo se vaitaimi e fuafua lava e i latou ma o latou epikopo po o peresitene o paranesi, ma pe a maea ai lena taimi ona latou auai atu lea i le vasega o le Aoga Sa o Aoaoga Faavae o le Talalelei.
Ae mo tusi lesona o Aoaoga o le a leai se tau e totogia e soo se tasi e tuuina atu i ai nei tusi lesona. O uarota ma paranesi taitasi o le a tuuina atu tusi lesona e manaomia mo o latou lava au paia.
I nisi vaega o le lalolagi, o vasega a le au Perisitua Mekisateko ma le Aualofa sa faaaogaina lava ia tusi o Tiute ma Faamanuiaga o le Perisitua ma le O Le Tamaitai o le Au Paia o Aso e Gata Ai ae le o Aoaoga. Ua lolomiina i gagana e 45, le lomiga fou o le Mataupu Faavae o le Talalelei o le a maua atu mo nisi o nei iunite i le aluga o tausaga 2010 ma le 2011. Peitai, i vaega e le o maua ai ia tusi lesona fou, ia faaaoga pea ia lomiga tuai o le tusi lesona O Mataupu Faavae o le Talalelei.
Pe Na Faapefea ona Suia le Tusi Lesona O Mataupu Faavae o le Talalelei?
O la tatou tusi lesona tulaga maoae O Mataupu Faavae o le Talalelei na muai lolomiina i le silia ma le 30 tausaga talu ai. Sa fiafia le lautele i le faaaogaina i le Ekalesia o se tusi lesona mo lesona o Aoga Sa, mo le aoaoina o tagata faatoa liliu mai e uiga i mataupu faavae autu o le talalelei, ma o se punaoa taua i le aiga. Peitai, na lagona e le Usoga e mafai ona tatou faaleleia le tusi lesona o loo i ai, ma manava atu i ai se ola fou. O le taunuuga o se tusi matagofie lea o le a avea o se faaopoopoga maoae i soo se potutusi i totonu o maota ma laoa faapea foi i potuaoga a le Ekalesia.
O le lomiga fou e i ai nai vaega taua i lona mamanu ma le anotusi:
1. Mamanu
O le lomiga fou o le a faatelē ma o le a i ai sona faavaa fou e tutusa ma tusi o Aoaoga. Ua matou faafouina foi le mamanu o le anotusi ina ia faigofie ona faitauina. O le a lanu ata ma mea faitino. O nei mea uma o le a aumaia ai se aafiaga faamalieloto o mea faitino lea o le a faaleleia ai suesuega patino.
2. Anotusi
O anotusi ua toe faafou ina ia avea ai le tusi lesona ma tulaga sili ona faamanuiaina mo suesuega patino, sauniuniga a le faiaoga, ma talanoaga a vasega. Ina ia fesoasoani i suesuega patino, o le tele o upusii ma punaoa o faamatalaga ua faafouina ina ia fesootai ai lenei tusi ma voluma o Aoaoga lea na lolomiina muamua. O le a maua ai e tagata taitasi le avanoa e aoao atili ai mai perofeta o loo ta’ua i le tusi lesona O Mataupu Faavae o le Talalelei. O le tuufaatasia o nei tusi lesona o le a faaleleia ai suesuega i totonu o potuaoga ma i le aiga.
3. Fautuaga mo le Aoao Atu ma le Aoaoina Mai
O loo i ai manatu i mataupu taitasi o le a fesoasoani i faiaoga e faaleleia atili ai lo latou aoao atu. O manatu o loo faavae i mataupu faavae ‘anoa faafaiaoga O Le Aoao Atu, E Leai Se Isi Valaauga E Sili Ai, o punaoa ia a le Ekalesia mo le faaleleia atili o faiaoga. O manatu ua faamoemoe e fesoasoani ai i faiaoga ia alolofa i e latou te aoaoina, valaaulia le suesue ma le maelega, ma aoao atu ia aoaoga faavae i le Agaga.
E le gata i lea, o fesili ia e amata ai vaega taitasi i se mataupu o le a fesoasoani e uunaia talanoaga ma taitaiina ai tagata o le vasega i anotusi i totonu o se vaega. O fesili ia e mulimuli atu i vaega taitasi, o le a fesoasoani i tagata o le vasega ia mafaufau loloto ai, talatalanoa, ma faaaoga mea na latou faitauina.
O se Tusi e Leai se Taimi Faatapulaa
E i ai lo matou faamoemoe o le a tuuina e le tusi lesona fou O Mataupu Faavae o le Talalelei se nofoaga iloga i totonu o aiga ma i olaga uma o le Au Paia o Aso e Gata Ai. O le lomiga fou o le a musuia le aoao atu ma faalautele ia suesuega patino. Uso e ma tuafafine, o le toe faamalosia o a outou suesuega o aoaoga faavae autu o le talalelei a Iesu Keriso, o le a tutupu ae ai a outou molimau, o le a faateleina lo outou fiafia, ma o le a outou mauaina ai ni faamanuiaga e sili ona tele a le Alii i o outou olaga.
O le tusi lesona fou O Mataupu Faavae o le Talalelei o loo faaalia ai atapu’e lanu ma ata tusi.
O vaega taitasi e amata i ni fesili faatupu-manatu po o fuaitau o le a fesoasoani i suesuega a tagata taitoatasi ma uunaia ai talanoaga i totonu o le potuaoga.
O fautuaga faafaiaoga i mataupu taitasi o le a fesoasoani lea i faiaoga e valaaulia le aoaoina mai ma le aoao atu i le Agaga.
Ata na tusia e Robert Casey