Faatupuina o Mauga
O Faataoto o le Taiala o Mauga ma le Mauga
I le avea ai ma se taiala faaliliu i le Yushan National Park i Taiuani, o Chén Yù Chuàn (Risati) e masani lava ona tofia e faafeaoa malo taua e asiasi atu i le paka. E masani lava i le tele o taimi pe a ia fesili atu i ana malo po o le a se mea latou te mananao e maimoa i ai, e mananao lava i latou e o atu i le tumutumu o le Yushan (Jade Mauga), o le mauga maualuga lea i matu sasae o Asia e 12,966 futu (3,952m).
O Risati e i ai lona naunau mo mea faanatura ma e fiafia i le matagofie ma le malualii o le Yushan. Peitai i se mea na oo ia te ia na ia aoao mai ai se vaega taua lea na ia taumafai e faasoa atu i ana malo: o le vaaiga maoae mai luga [o le mauga] e mauaina lona tulaga taua moni lava pe a e mauaina le poto masani i mea o i lalo ifo.
O le asiasi atu i le mauga, ma ona auala na taina e tagata ma vaaiga matagofie, o se aafiaga maoae, peitai na taumafai Risati e faamatala atu le sili ona tele o mea e aoaoina mai ma mea natia matagofie e maua i vaega e faigata ona uia e tau atu ai i vaitafe ma va o papa lea e i lalo ifo.
“Ina ia faatauaina ia mea maualuluga, e tatau ona e maua se poto masani i vaega i lalo ifo,” o lana tala lea. “E le mafai ona e fiafia i le faaiuga e aunoa ma le malamalama i le faagasologa.”
O nisi o ana malo na mafai ona gauai mai; peitai, o le tele lava na o le mananao e oo i le tumutumu—ma na latou mananao i le auala pito i faigofie e oo ai iina.
Na vaai Risati i ni faatusa faaleagaga i o latou uiga. E pei ona ia faamatalaina, o le sini autu o aafiaga o le olaga o le mafai lea ona toe foi atu i le afioaga o le Atua (tagai i le Alema 12:24). E ui lava o le toatele e iloaina le taua o lena sini, o nisi e le iloa o le faatasi atu ma Ia, e tatau ona tatou avea faapei o Ia (tagai i le 1 Ioane 3:2; 3 Nifae 27:27; Moronae 7:48). Ma e leai se ala vave ma faigofie i lena mauga [sini].
O Le Taiala Moni
E le’i manao Risati e ave ana malo mo na o sina savaliga; na ia manao e tuuina atu ia i latou se aafiaga. Peitai e faatapulaa le mea e mafai ona ia aoao atu ia i latou ona o le maualuga o lo latou manao.
“E mafai ona ou aveina atu i latou o e mananao e tofo i le siosiomaga faalenatura i nofoaga e seasea ona vaai i ai nisi,” o lana tala lea. “O o latou aafiaga e ono sili ona faigata, peitai e matuai faamauoaina lava.”
Sa lagona e Risati e leai lava se eseesega mai le olaga, ma i ona aafiaga patino na atagia mai ai lenei mataupu faavae. A o aoga o ia i le iunivesite, na amataina e Risati se sailiga mo se faamoemoega moni i le olaga. Sa ia asia le tele o ekalesia e aunoa ma le mauaina o mea sa ia sailia—seia oo ina ua ia feiloai atu i faifeautalai.
Peitai, o ona matua, na matuai tetee lava i lona auai atu i le Ekalesia. Sa la popole i le tulaga o le tuua o lo la faatuatuaga e le la tama tama lava e toatasi. Sa la popole foi e uiga po o le a se mea o le a oo ia i laua [pe a mavae lenei olaga]. O le toatele i la latou aganuu e talitonu, o lo latou tulaga i le olaga pe a mavae le oti e faamoemoe lava i tapuaiga e ofoina atu mo i latou e a latou fanau o loo soifua.
E ui lava na tauivi o ia ma le tetee a ona matua, na maua lava e Risati se molimau i le Faaola ma le manaoga e mulimuli ia te Ia.
“O Iesu Keriso o le ala,” o le tala lea a Risati. “O Ia o le Taiala Moni i le Tama” (tagai i le Ioane 14:6).
Na ia filifili e mulimuli i le Faaola ma papatisoina, ma faatuatua o le a taitaiina o ia e le Alii i le ala sao e ui lava ina sa foliga e matuai faigata.
Ina ua mavae le vaiaso talu ona maea lona papatisoga, sa faamanuiaina o ia i se galuega lelei e avea o se tagata faasalalau o talafou i se leitio mo se kamupani faasalalau pito i tele i Taiuani. O le mauaina o lana galuega na faafiafiaina ai ona matua, ma e tusa ai ma le suiga mo le lelei na la vaaia ia te ia, na fesoasoani lea i le foia o tiga mai feteenaiga ma i laua. Na faamalosia ai foi lona faatuatua ma aoaoina ai o ia i se lesona taua.
“Afai tatou te le mulimuli ia Iesu Keriso, o lana tala lea, o le a tatou misia le tele o aafiaga taua tatou te manaomia.” O nei aafiaga e ono sili atu ona faigata, peitai e manaomia mo lo tatou lelei (tagai i le 2 Nifae 2:2; MFF 122:7).
Auala o loo Faatupuina Ai Mauga
Soo se tasi lava e mulimuli atu ia Risati i ona auala ma vanu faigata faapelepele, o le a matuai aoaoina lava, o atumauga o Taiuani ma ona vaega maualuluga i le talafatai i sasae, na foafoaina i le fetoai o lapa e lua o le pa’u o le [paneta] o le lalolagi. O le aasa ma le feomai na mafua mai i le uunai malosi lea e muamua liu ai vaega o papa ele i papa amu, ma toe liu maamora ai ma ua lauiloa ai le talafatai i sasae. O lena lava mana lē mavaaia na tetete ai ma soloia ai le laueleele, ma iu ai lava ina aveina atu ai ia vaega o mauga ua tu maualuluga e faasaga atu i le lagi.
Pe e i Yushan po o Taroko National Park, po o le mea na ia galue muamua ai, e fiafia lava Risati e faasino atu ia le faamaoniga o le ala na fofoaina ai e le malosiaga faanatura ia Taiuani mai le pito i lalo e oo atu i luga.
“O loo i ai faailoga galugalu i papa maualuluga, ma o loo i ai mea o le sami na i ai muamua ma isi faamaoniga o mea o loo i luga sa i ai muamua i le pito i lalo,” o le tala lea a Risati. “Afai e te manao e malamalama i le tumutumu, e tatau ona e malamalama i le vaega maualalo, aua o iina e amata ai le mauga.”
E talitonu Risati e taua lenei mea aua e ogatasi ma le faamoemoega o le olaga. I taimi o faigata e mafai ona foliga mai ai e le na o ni tagata asiasi atu i tatou i le mauga ae e pei ai lava o le mauga, e oloia pea lava e malosiaga ma atuatuvalega lea e faafoliga ai ma tuleia i tatou e agai atu i le lagi pe a fai tatou te tauaveina i le onosai ma le faatuatua (tagai i le Mosaea 23:21–22; MFF 121:7–8).
Faatupuina o Mauga ia i Tatou
Mai ona lava aafiaga, na aoaoina ai e Risati e le mafai ona tatou tula’i a’e mai le lalolagi e ausia o tatou gafatia maualuluga e aunoa ma le oo atu i ni aafiaga le lagomalie, ma o nisi o taimi e matuai tiga lava.
I le avea ai o se tagata faasalalau o le leitio na galue ai Risati i lalo o le tele o tauiviga e aofia ai se vaega lautele o autu i taimi pupuu faatapulaa. Na vave ona ia aoaoina o inuga faa-aga fesootai na avea o se auala taua na maua ai e le tele o tagata faasalalau ia ni faamatalaga. Na matuai faateleina le faigata o le galuega aua sa ia teena le auai atu i inuga.
O le manatu e sailia se galuega fou na faanofogofie ai lona mafaufau ae le o ona luitau. O lana galuega i le leitio na fesoasoani e faatoafilemu ai ona matua ina ua maea ona ia auai i le Ekalesia. O lea ina ua ia tuua le galuega tumau, totogi-maualuga, taua, mo se galuega faakonekarate lē tumau o se taiala, sa le fiafia ona matua mo sina taimi.
Sa avea o se tasi o ala faigata na ia filifilia, peitai na te le salamo mai ai aua ua ia iloa ina ia “faaeaina i le mea maualuga” (tagai i le MFF 121:7–8), e tatau ona tatou muamua tofo i le vaega maualalo (tagai i le MFF 122:5–7).
“O nisi o taimi tatou te faatapulaa ai mea e mafai e le Atua ona faia mo i tatou ona tatou te le mananao e tofoina faatasi le leaga ma le lelei a, o lana tala lea.
O le mulimuli atu i le Alii na taitaiina o ia i se galuega na ia fiafia i ai. Na taitaiina o ia e auauna atu i se misiona. Na faailoa atu ai o ia i lona toalua i le lumanai, lea e i ai lana fanau aulelei e toafa. E ui lava i faigata, ae lei muta lava ia faamanuiaga.
Pe a taitaiina atu i tulaga tau soo e ala atu “i le ala o le vanu maulalo” (2 Nifae 4:32) ma e ui atu “i le vanu o le ata o le oti” (Salamo 23:4) ma agai atu i “lē o loo afio i luga” (MFF 1:1), e maua ai e Risati le toa i le folafolaga lea “e faapea lava [ona] aveina i tatou i le afioga a Keriso i tala atu o le vanu o le puapuaga, i le nuu e sili ona lelei ua folafolaina, pe a tatou savavali i lona ala” (Alema 37:45)—lea e atili faamautu ai ia te ia, pe a mavae ona tofo i luitai o le olaga o le a saunia ai i tatou e fiafia i le mauga.
Ina ia talisapaia le tumutumu, e tatau i se tagata ona i ai se poto masani i vanu, na ta’ua ai e Richard Chén (tauagavale, i le Baiyang Waterfall i le Taroko National Park). O Brother Chén o se taimua faasinoala i le Yushan National Park, e i Jade Mountain (luga ae).
O i latou e mulimuli atu ia Brother Chén e ala atu i le vanu e aoaoina e uiga i malosiaga faanatura lea e avea ai mauga—o se vaega e ogatasi ma le faamamaina lea e tatau ona onosaia e se tasi ina ia toe foi atu ai i le afioaga o le Atua. Luga ae: O Richard o loo maimoa atu i le tafe atu o le Vaitafe o Liwu. Taumatau: O puipui maamora ua lolo’u o le Vanu Matautia ua iloga ona o malosiaga faalenatura.
Taiuani
Taipei
Yushan National Park
Ata na pueina e Adam C. Olson, vagana ua faamatalaina; taumatau: ata na pueina o le Jade Mountain © Fotosearch