Suesueina o le Galuega a le Aualofa
E taitaiina i tatou e le au peresitene o le Aualofa i le Aso Sa muamua o le masina i le talanoaina lea o ni auala e mafai ai ona tatou faataunuuina o tatou tiute paia i le avea ai o se usoga a le Aualofa.
Ina ua faatoa tofia le matou au pulega [a le aualofa], na tuuina mai ia i matou ni faamatalaga e uiga i le talafaasolopito o le Aualofa, lea na faaputuputu i le aluga o tausaga. Sa matou suesueina ma le agaga tatalo nei mea, ma le manao ia iloa le faamoemoega o le Aualofa ma po o le a se mea e finagalo le Alii matou te faia i le taimi o la matou pulega.
A o matou suesueina ma le faaeteete lena talafaasolopito, na matou iloa ai o le faamoemoega o le Aualofa e pei ona faavaeina ai e le Alii o le faatulaga lelei, aoao atu, ma uunaia Ona afafine ia saunia i latou mo faamanuiaga o le ola e faavavau. O le Aualofa e faatatau i vaega uma o le olaga o se tamaitai o le Au Paia o Aso e Gata Ai. O loo aoaoina ma uunaia le usoga e ala i faiaoga asiasi, auaunaga, ma lesona a le Aualofa. O la tatou sini i le Aualofa i Aso Sa taitasi o le suesue lea o mataupu ma aoaoga faavae e mafai ona fesoasoani ia i tatou ia ausia o tatou faamoemoega. O se taunuuga o a tatou lesona i Aso Sa, e tatau ona mafai ai e le usoga ona ola ai i le talalelei ma le talitonuga maoae sili atu i totonu o o latou aiga ma auaiga.
O Le Aso Sa Muamua E Ese
O Aso Sa lona lua, tolu, ma le fa o le masina, tatou te suesue ai i Mataupu Faavae o le Talalelei ma aoaoga mai konafesi aoao o se auala e taitaiina atu ai i tatou i faamanuiaga o le ola e faavavau. Peitai, o le Aso Sa muamua o le masina, e aoao ai i tatou e se sui o le au peresitene o le Aualofa ma taitaiina i tatou i se talanoaga i ni auala e mafai ona tatou faataunuu ai o tatou tiutetauave paia o ni sui o le Aualofa.
I le avea ai o ni tamaitai o le Au Paia o Aso e Gata Ai ua ia i tatou le talalelei toefuataiina a Iesu Keriso ma ni molimau i le ata o le faaolataga. Ua ia i tatou le matafaioi mo tamaitai o lena fuafuaga. E le mafai ona faamatuu atu i nisi. Tatou te tali atu i luma o le Alii mo le faataunuuina o o tatou tiute. Ma o le Aso Sa muamua o le masina o le meaalofa lea o taimi a le Alii mo i tatou i le avea ai o se usoga a le Aualofa e aoao ai i auala e faataunuu ai o tatou tiutetauave.
Ou te faamoemoe o le a tatou faaaogaina lena meaalofa o taimi e faataunuu ai o tatou tiutetauave e tolu o le olaga atoa o ni sui o le Aualofa: (1) faateleina le faatuatua ma le amiotonu patino, (2) faamalolosia aiga ma auaiga, ma le (3) sailia ma fesoasoani ia i latou e manaomia le fesoasoani.
Ou te faamoemoe o le a tatou liliu atu i tusitusiga paia ma punaoa faamaonia a le Ekalesia mo ni faataitaiga, aoaoga faavae, ma mataupu faavae o le a fesoasoani lea ia i tatou e faataunuu nei tiutetauave ma aoaoina auala e foia ai luitau o aso e gata ai. Na ta’uina atu ia Ema Hale Samita, lo tatou peresitene muamua o le Aualofa ia “faamatala atu tusitusiga paia ma ia apoapoai atu i le ekalesia, e pei ona tuuina atu ia te oe e lo’u Agaga” (MFF 25:7). E mafai ona tatou mulimuli i ana faataitaiga.
Pe afai o le a ou faia lenei mea i le Aso Sa-muamua o le sauniga a le Aualofa, ou te amata i le filifiliina ma le agaga tatalo o mea e tatau ona tatou aoaoina. Ona ou sueina lea i tusitusiga paia e iloa ai le mea e tatau ona latou aoao ai i tatou i lena autu. O le a ou iloa ai mea na aoao mai e perofeta ma taitai o le Ekalesia. Ona ou tatalo lea mo le taitaiga a le Agaga a o ou tusia i lalo nisi o fesili e talanoaina e mafai ona tatou faaaogaina a o tatou suesue faatasi i la tatou sauniga o le Aso Sa-muamua. Ou te faamoemoe o le a o tina ma tamaitai i aiga ma le malosi faateleina ma faaaoga lenei lava mamanu e tasi e suesue ai i o latou fale ma aoao o latou aiga.
Faateleina le Faatuatua ma le Amiotonu Patino
O lou tina matua o Isabelle Bawden Bangerter, sa iloga o ia o se tamaitai e maoae le faatuatua. Sa ia mauaina lona faatuatua a o laitiiti ma sa galue ai e faalauteleina i lona olaga atoa. Sa faiaoga o ia i le Aualofa mo le tele o tausaga, ma i totonu o le usoga a le Aualofa sa iloga ai o ia o se tagata malosi i le talalelei, o se tamaitai na iloa lelei le talalelei ma e mafai ona ia aoao atu mai tusitusiga paia. Sa ia faaauau pea ona suesueina tusitusiga paia e oo i le taimi na maliu ai i le 97 o ona tausaga. O tinamatua Bangerter sa avea ma se tamaitai na mautinoa lelei ana matafaioi ma tiutetauave faavavau. A o avea au o se tina laitiiti, sa ou fesili atu ia te ia pe mafai ona tausiaina se fanau amiotonu i se lalolagi ua tumu i le amioleaga. Sa ia nofo mai i luga, ma faasino mai ia te au, ma fai mai ma le malosi, “Ioe! E tatau! O le mea lena ua e i ai iinei [lalolagi]!” O ana aoaoga na musuia ai au ia atili mataala ai e uiga i o’u tiutetauave ma taulima le olaga ma le faatuatua faateleina. E mafai ona mauaina na ituaiga o aoaoga tuusao ma musuia i le Aualofa i vaiaso uma.
E i ai lava pea fesili a tina ma tamaitai e uiga i auala e mafai ona ola ai i aafiaga o lenei olaga faitino i se auala e tumu-i-le-faatuatua. O le Aso Sa muamua o le masina e maua ai e i tatou le avanoa e aumai faatasi ai le faatuatua ua tuufaatasia o loo i ai i Aualofa taitasi. O le malamalama o i latou uma o loo auai e mafai ona fesoasoani i le taliina o fesili moni ma aumaia ni tali musuia.
O nisi nei o faataitaiga o loo taua i lalo o ni mea e mafai ona tatou suesue ai i le Aso Sa muamua e fesoasoani ai ia i tatou e faateleina lo tatou faatuatua ma le amiotonu patino:
-
Osia ma le tausiaina o feagaiga.
-
Agavaa mo se pepa faataga o le malumalu ma tapuai ai i malumalu.
-
Agavaa mo, le iloaina, ma mulimuli i musumusuga a le Agaga Paia.
-
Aoao atu ma puipuia le talalelei a Iesu Keriso.
-
Faia o tatalo faamaoni a le tagata lava ia ma le aiga.
-
Faia o afiafi faaleaiga.
-
Faaaogaina o mataupu faavae o le faalagolago o le tagata ia te ia lava ma le ola faautauta.
Faamalolosia o Auaiga ma Aiga
A o avea au o se uso talavou o le Aualofa, sa faia se matou vasega o le aoaoga-faatina e faatasi i le masina. E ui lava sa i ai sou tina matagofie ma le talenia, ae sa ou aoao mai pea i ou faiaoga i le Aualofa i auala e avea ai ma se tina e sili ona lelei ma auala e faaleleia ai lo’u fale. Na matou aoaoina mataupu faavae o le tausiaiga ma tomai, na matou aoaoina auala e avea ai o ni matua e sili ona lelei, ma na matou aoaoina auala e faamalosia ai a matou faaipoipoga.
E tele lava ina fesili mai ia te au tina talavou pe mafai lava ona toe faia ia aoaoga faatina i le Aualofa. O la’u tali o le ioe. E mafai ona aoaoina i tatou e lagolago, fafaga, ma puipui aiga i le Aso Sa muamua o le masina.
O loo taua i lalo nisi o faataitaiga o mea e mafai ona tatou suesue i ai i Aso Sa muamua e fesoasoani ia i tatou i le faamalolosia o auaiga ma aiga:
-
Malamalamaaga ma le puipuia o matafaioi paia a tamaitai.
-
Taliaina o faamanuiaga o le perisitua.
-
Faatuina o aiga e faavavau.
-
Faatumauina o faaipoipoga malolosi.
-
Fanauina ma le tausiaina o fanau
-
Faaalia o le alofa mo tagata o le aiga ma faafaileleina i latou.
-
Taliaina o le tiutetauave e saunia ai le tupulaga fai a’e amiotonu o le Au Paia o Aso e Gata Ai.
-
O le iloaina, ola ai, ma le puipuia o aoaoga faavae o le aiga.
-
Sueina o tagata ua maliliu o le aiga ma faia sauniga o le malumalu mo i latou.
Sailia ma Fesoasoani ia i Latou e Manaomia le Fesoasoani
O lesona o Aso Sa-Muamua o lo tatou avanoa lea e fefaamalosiau ai le tasi i le tasi ma maua tali i faafitauli o le olaga. I soo se taimi lava, e toatele ia tamaitai i Aualofa taitasi o loo aafia i ni faigata ma faanoanoaga. Na ta’ua e Peresitene Boyd K. Packer, Peresitene o le Korama o Aposetolo e Toasefululua, o Aualofa taitasi o se “li’o o le usoga faatamaitai”. Na Ia saunoa:
“O tamaitai taitoatasi, e tusa lava po o fea le mea o loo ia tu ai i lena lio, e mafai ona vaai i ona itu uma ma lagona le agaga o musumusuga ua toe oo mai pe a ia tuu atu lima agaalofa i itu uma. …
“… O le a outou auauna atu i la outou faalapotopotoga, o lo outou faamoemoega—o le Aualofa—o lenei lio maoae o le usoga faatamaitai. O le a faataunuuina ou manaoga uma i le taimi nei ma le faavavau; o tulaga le amanaia uma o le a tafiesea; o faataumaoi taitasi o le a faasa’oina. O nei mea uma e mafai ona oo mai ia te oe, ma oo vave mai, pe a e tuuto atu oe lava i le Aualofa.”1
Sa ou iloaina lava mai aafiaga, o Aualofa i uarota taitasi e i ai le tomai e avatu ai i isi le lagolagosua o loo manaomia. Afai tatou te sailia ma mauaina le fesoasoani a le Agaga Paia, o tali uma lava o le a mafai ona maua i lio taitasi o le usoga faatamaitai.
Ua ia i tatou le tiutetauave e tuuina atu ai le laveai—laveai i le le tagolima, ma’i, le mautonu, valea, ma mea uma e taofiofia mai ai le fiafia ma le alualu i luma o tamaitai. E punouai e le aunoa le Aualofa i le tuuina atu o le fesoasoani i isi.
Ua tatou iloa ona o loo tatou ola i aso e gata ai, o i tatou o ni tagata taitoatasi ma aiga o loo feagai ma le tele o luitau faigata. O nei luitau e aofia ai le faasauaina, o mea ua fai ma vaisu, paie, aitalafu, faanoanoa, le usiusitai, leai se galuega, fevaevaeai o le aiga, ma’i, sauaga, mativa, ma le femisaai. E foliga tutusa lava lenei ma mea na folafola mai e le Aposetolo o Paulo i le 2 Timoteo 3:1–7, 13. Peitai, e le tatau ona tatou fefefe. Ua ia i tatou le talalelei a Iesu Keriso. Na tuuina mai ia i tatou e le Aposetolo o Paulo le tali:
“A o oe, ia e tumau i mea ua aoaoina ai oe, ma ua mautinoa ia te oe, ina ua e iloa o ia na aoao atu ai ia te oe;
“Talu foi ina o e tama itiiti ua e iloa Tusi Paia, e mafaia ona faapoto ai ia te oe e iu ai i le ola i le faatuatua ua ia Keriso Iesu.
“O tusi paia uma lava e mai le Agaga o le Atua ia, e aoga foi ia e aoao ai, e aoai ai, e faatonu ai, e faapoto ai foi i le amiotonu” (2 Timoteo 3:14–16).
I le Aso Sa muamua, e mafai e se tasi o le au peresitene o le Aualofa ona faatatau ia te ia lava ia galuega a le Aualofa. E mafai ona ia taulai atu i galuega alofa o ni tali o ni manaoga e faapitoa lava i se uarota po o se paranesi. E mafai ona ia aoaoina ia tamaitai e avea o ni faiaoga asiasi o i latou ia e faaleo maia ia manaoga o isi pe a latou maua. Ma pe a talafeagai ai, e mafai ona ia faia ni tofiga e fesoasoani ai i tagata faapitoa e manaomia le fesoasoani.
Faaaogaina o le Aso Sa Muamua
Ou te talitonu a sailia e taitai o le Aualofa le fesoasoani a le Agaga Paia, o le a musuia i latou i mea e tatau ona suesue ma aoao atu ai i le taimi o le sauniga o le Aso Sa-muamua o le Aualofa. Ou te iloa o le a faaauau pea ona agai i luma le galuega a le Alii i le salafa o le lalolagi ma o le a faamanuiaina i vaega tetele ona o le a faia e tamaitai lelei o le Ekalesia mea uma latou te mafaia e faalautele ai lena galuega, muamua i totonu o o latou lava aiga ma auaiga ma i totonu o o latou lava li’o o fefaauoaiga ma masaniga.
1 Faateleina le Faatuatua ma le Amiotonu Patino. O le lesona o le Aso Sa muamua e aumaia ai ia i tatou le avanoa e liliu atu ai i tusitusiga paia mo mataupu faavae lea e fesoasoani ia i tatou e faafetaiaia ai luitau o aso e gata ai.
2 Faamalosia o Aiga ma Auaiga. I le Aso Sa muamua o le masina, e mafai ona tatou aoao i auala e siitia ai, tausia, ma puipuia ai aiga.
3 Sailia ma Fesoasoani ia i Latou e Manaomia le Fesoasoani. Ua ia i tatou le tiutetauave e tuuina atu ai le laveai—laveai i le le tagolima, ma’i, le mautonu, valea, ma mea uma e taofiofia mai ai le fiafia ma le alualu i luma o tamaitai.
Ata na saunia e Robert Casey; ata o Sister Beck na pueina e le Busath Photography
Ata pue o Sister Thompson ma Sister Allred na saunia e Busath Photography; ata o aiga na saunia e Christina Smith.
Tauagavale: ata na saunia e Craig Dimond