Pe Mafai Ona Ou Tapunia La’u Pisinisi i le Aso Sa?

Gerardo Adrián García Romero, Veracruz, Mekisiko

E tolu vaiaso talu ona mavae atu lo’u tatalaina o lo’u loto, ua ou maua le talalelei, ma faia se faaiuga taua ia ou papatiso i le 2001, sa ou auai atu ai i se vasega o le Aoga Sa lea na matou talanoaina ai le taua o le tausia o le aso Sapati.

I le avea ai o se tagata pule faipisinisi faamanuiaina ma se aofaiga toatele o tagata faigaluega, sa ou faigaluega i Aso Sa mo le silia ma le 20 tausaga. Ae peitai ina ua amata ona manino mai ia te au le taua o lenei aso, sa ou filifili loa e ta’u atu i pule e toatolu o a’u faleoloa o le a le toe tatalaina lava a matou [faleoloa] i Aso Sa.

Sa ou faalauiloa atu la’u faaiuga i ni nai vaiaso mulimuli ane, ae na tau mai e nei pule e toatolu o nisi o le au faatau tumau, e tele lava i faiaoga, na fesiligia pe ono mafai ona tatala o matou faleoloa i le Aso Sa a sau. Sa ou galue i le pisinisi fai lole i Papantla, ma na manaomia e tagata e faatau ia lole ma piñatas e saunia mo le El Día del Niño (Aso o Tamaiti), lea o le a faamanatuina i le Aso Gafua e sosoo ai. I le Aso o Tamaiti, lea e faia i le aso 30 o Aperila i Mekisiko, e faia ai pati ma taaloga a aoga, ma e maua ai lole a tamaiti.

“O taeao, i le Aso Toonai, o le a ou faailoa atu ai ia te outou,” sa ou ta’u atu i au pule.

Ina ua ou taunuu atu i le fale, sa ou ta’uina atu i lou toalua le mea na tupu. Sa ou mafaufauina o le a ia faapea mai, “Tatala pea. Aua, ua na o se Aso Sa lava e tasi.” Peitai e le o lana tali lena.

Ma i lona leo le maluelue, sa ia ta’u mai ia te au, o a’u o le ulu o le aiga ma o a’u e faia le faaiuga. Peitai ona ia fesili mai lea ia te au, “Afai e ta’u atu e se tasi o lenei Aso Sa e mafai ona e mauaina se taui tele i mea tautupe pe mafai foi ona e maua ai lou Tama i le Lagi, o fea o nei mea o le a e filifilia?

O lana fesili na fesoasoani ia te au e iloa ai le taua o le mauaina o le Alii i Aso Sa uma, ma na ou iloa ai e tatau ona ou tumau i au faaiuga. O le faamamaluina o le Alii o se mea sili ona taua e mafai ona tatou faia i Aso Sa, ma talu mai lena taimi ou te lei misia lava se avanoa ou te faia ai lena mea.

Afai tatou te faamuamua mea a le Alii mai mea a tagata, o le a tatou mauaina se molimau o le aso Sapati. Mo lo matou tausiaina o le aso Sapati, ua matua faamanuiaina lava au ma lo’u aiga, faapea foi ma la’u pisinisi. Ia tatou mauaina uma ia faamanuiaga o le faamamaluina o le aso o le Alii.