Tala Faamamai o le Talalelei
O Le Foiaina o Faafitauli Faalelagona i le Ala a le Alii Lava Ia
O lenei fasi fuaitau na aumai mai se saunoaga i le konafesi aoao na faia ia Aperila 1978. Ua faalaugatasia faailoga; ua faaopoopo soā-autu. O le anotusi atoa e mafai ona maua i le liahona.lds.org.
O loo feagai o tatou epikopo ma le tele o valaaulia ina ia fautuaina tagata o le au paia o loo i ai faafitauli i manaoga faalelagona nai lo manaoga mo meaai po o lavalava po o fale.
O lea la, o la’u savali, e faatatau i le mataupu lea: foiaina o faafitauli faalelagona i ala a le Alii lava Ia.
O le mea e lelei ai, o mataupu faavae o le uelefea faaletino e faatatau foi i faafitauli faalelagona. …
O Mataupu Faavae o le Faalagolago o le Tagata Ia te Ia Lava
Ua aoao mai e le tusitaulima o le uelefea: “[E tatau ona tatou] faamaoni i le aoao atu ma uunaia tagata o le Ekalesia ia faalagolago le tagata ia te ia lava i le tulaga atoa o lo latou malosiaga. E leai se tagata moni o le Au Paia o Aso e Gata Ai … na te tuu ese atu mai ia te ia le tiute o le tausiga o ia lava. A mafai lava e ia, i lalo o musumusuga a le Silisili Ese ma i ana lava galuega, o le a ia sapalaia o ia lava i mea e manaomia o le olaga” ([1952], 2). …
Ua matuai faamanuiaina lava i tatou i le aoaoina atu o le Au Paia o Aso e Gata Ai e tatau ona latou tausia o latou lava manaoga faaletagata ona latou saofaga atu lea i le uelefea a i latou e le mafai ona latou maua ni mea mo i latou lava.
Afai e le mafai e se tasi o le au paia ona tausia o ia lava, ona ia valaau atu lea i se tasi o lona lava aiga, ona sosoo ai lea ma le Ekalesia, i lena lava faasologa. …
Pe a fai e mafai e tagata ae e le mananao e tausia i latou lava, ua ia i tatou le tiute e faaaoga ai le poloaiga a le Alii, o le paie e lē ’ai i le areto a lē galue. (Tagai i le MFF 42:42.)
O le tulafono faigofie o le tausia lea e le tagata o ia lava. O lenei solo puupuu o le upumoni sa avea pea o se faataitaiga: “Ai ia uma, ofu seia pala, fai pe a i ai, po o le aua le faia pe a leai.”
Ina ua faatoa faalauiloa mai i le 1936 le polokalama o le uelefea a le Ekalesia na saunoa mai le Au Peresitene Sili:
“… O le faamoemoe o le Ekalesia o le fesoasoani atu lea i tagata ina ia fesoasoani ia i latou lava” (i le Conference Report, Oke. 1936, 3; faaopoopo le faatusilima). …
O se faiga e fesoasoani ai le tagata ia te ia lava, ae le o se faiga e tuulima atu ai faatopetope. E manaomia ai le faaeteete ona faia se lisi o punaoa uma a le tagata lava ia ma le aiga, lea e tatau ona faia e tagata uma a o lei faaopoopoina se mea mai fafo atu.
E le o se epikopo lē alofa ma le leai o ni lagona lea e talosagaina se tagata o le au paia e galue i lona malosi na te mafaia, mo mea na te mauaina mai mai le uelefea a le Ekalesia.
E le tatau ona i ai sina lagona matamuli i soo se tasi o le au paia e fesoasoani atu i ai le Ekalesia. Pe a faapea lena ua ia saofagā atu mea uma na te mafaia. …
O le autu o le mea ou te manao e ta’u atu o lenei: O le mataupu faavae lava e tasi—faalagolago o le tagata ia te ia lava—e i ai lona faatatauga i le faaleagaga ma i le faalelagona. …
Seiloga tatou te faaaogaina le faautauta, ua tatou i ai i le tulaga o le faia ia i tatou lava faalelagona (ma, o lea la, faaleagaga) ia mea na tatou galulue ai ma le malosi mo augatupulaga ina ia aloese mai mea faalelalolagi.
Fautuaina
E foliga mai o loo tatou atiina ae se faamai pipisi o le “talosagaina e le aunoa o ni fautuaga” lea e faaaoga uma ai le malosi faaleagaga mai le Ekalesia e pei o le fulū masani lea e toesea le tele o le malosi o le tagata soifua nai lo se isi lava faamai. …
I le talanoa atu faalemafaufau, o le tele o epikopo latou te tuuina i luga o le tulimanu o a latou kesi se faaputuga o fomu o oka, mo se fesoasoani faalelagona.
A oo atu se tasi ma se faafitauli, paga lea, e aunoa ma se fesili, e pasi atu ai e le epikopo [ia oka o laveai faalelagona] e aunoa ma le faatali se’i mafaufau po o le a le mea o loo ia faia i ona tagata. …
O le tutoatasi faaleagaga ma le faalagolago o le tagata ia te ia lava o se mana tausi lea i le Ekalesia. Afai tatou te faoa lena mea mai tagata o le au paia, e mafai faapefea ona latou mauaina ni faaaliga mo i latou lava? Pe faapefea ona latou iloa o loo i ai se perofeta a le Atua? E mafai faapefea ona latou mauaina tali o tatalo? E mafai faapefea ona latou mautinoa mo i latou lava? …
Faatatauga i Aiga
… E i ai i tama le tiutetauave o le pulefaamalumalu i o latou aiga.
O nisi o taimi, ma ni faamoemoega lelei uma, tatou te soona manaomia ai mai fanau ma le tamā mea e le mafai ona ia faia.
Afai e manao lo’u atalii i se fautuaga, epikopo, e tatau ona avea ma o’u tiutetauave muamua, a o oe e lona lua.
Afai e manao lo’u atalii i se gaoioiga, epikopo, e tatau ona ou tuuina atu ia te ia muamua, a o oe e lona lua.
Afai e manao lo’u atalii i se faasa’oga, e tatau ona avea muamua ma o’u tiutetauave, a o oe e lona lua.
Afai ua ou toilalo o se tamā, fesoasoani muamua mai ia te au, ae lona lua la’u fanau.
Aua nei vave tele lou aveeseina mai ia te au le galuega o le tausiaina o la’u fanau.
Aua nei vave tele lou fautuaina o i latou ma foia faafitauli uma. Ia faaaofia ai a’u. O la’u galuega.
Ua tatou ola i se taimi lea o loo faailoa mai ai e le tiapolo i soo se avanoa le filosofia o le faamalieina vave o manaoga ma tuinanau. E foliga mai tatou te mananao i mea uma i se tulaga faanatinati, e aofia ai tali faanatinati i a tatou faafitauli. …
Sa fuafuaina lava o le olaga o le a avea o se luitau. Ina ia tofo i tiga o le popolevale, tulaga faavaivai loto, lagona le fiafia, e oo foi lava i le toilalo lea o le a foliga mai lava e lelei atoatoa.
Aoao o tatou tagata pe afai latou te mauaina se aso faalēlelei tele i nisi taimi, pe faalausosoo foi, ina ia tutu mausali ma faafetaia’ia. O le a i’u lava ina lelei.
E i ai se faamoemoega maoae i la tatou tauiviga i lenei olaga.
O le mataupu faavae o le faalagolago o le tagata ia te ia lava po o le tutoatasi patino o se autu faavae lea i le ola fiafia.