Pe Faapefea Ona Totogi Lo Ma Fale Mautotogi?

Douglas Arévalo, Costa Rica

Ina ua mavae le tausaga ma le afa talu ona ma faaipoipo ma lou toalua o Repeka, sa tapunia le kamupani sa ou faigaluega ai. Sa faafuasei ona ou iloa ua ou le faigaluega.

Nai lo le saili pe faafaigaluegaina au e se isi tagata, sa ou lagonaina le uunaiga ia amata sa’u lava kamupani. Sa ou iloa e ono avea ma se mea faigata lenei luitau, o lea sa ou liliu atu ai i le Tama Faalelagi e faamautu mai le lagona sa ou lagonaina. Sa avea le tatalo ma se vaega taua i lena filifiliga muamua ma sa faaauau ai pea i taimi faigata na sosoo ai.

Ia Aokuso i le 2003 na amataina ai lau lava kamupani o le vali fale, fai togalaau, faatulagaina laau i laufanua, ma galuega faakamuta. E le foliga faigofie pea mea uma pe a fai sau lava kamupani, aemaise lava pe a faatoa amata. I le amataga o se tasi masina, na manaomia ai e i ma’ua ma Repeka ona totogi lo ma fale e mautotogi ai. Sa matuai leai lava se ma tupe. I se tasi la taeao na ma tatalo ai ina ia maua lava se tupe o loo ma manaomia. I se taimi mulimuli ane i lena lava aso na manaomia ai la’u auaunaga mo se galuega sa lava ma totoe e totogi ai lo ma fale mautotogi.

Ina ua mavae le masina talu ona amata la’u kamupani, sa talosaga mai le peresitene o le siteki ia te au e fia feiloai ia te au. E lei leva ae tofia au e avea ma epikopo o la matou uarota. Sa ou iloaina ua tatalaina e le Tama Faalelagi se auala mo au ia ou talia ai ma faataunuuina lenei valaauga. Ma i le isi au galuega, semanu ou te le mauaina le taimi e manaomia mo tagata o le uarota ma mo lo’u lava aiga. Peitai ona o lava la’u kamupani, o lea e fetuutuunai ai lava le faagasologa o ou taimi faigaluega. Sa ou i ai i le fale mo vaega taua i le olaga o lo’u aiga, e pei o le taimi na fananau mai ai la’u fanau ma amata ona savavali ma tautatala ai. E le gata i lea, sa mafai ona ma auauna atu ma lo’u toalua i le Malumalu o San José Costa Rica. O nei avanoa, na oo mai ona sa ma tali atu i uunaiga ma sailia le taitaiga i le tatalo, ma na fusia faatasi ai i matou.

E lei leva nei ona toe faaauau au aoaoga i le iunivesite. Ina ua oo mai le uunaiga e toe foi i le aoga, sa ou popole pe faapefea ona ou tausia lo’u aiga. E lua aso o le vaiaso ou te i ai i le potuaoga, ae le o le galuega. Pe faapefea ona ausia e lo’u aiga o matou manaoga tautupe?

Sa toe avea foi e i maua ma lou toalua lenei luitau o se vaega o le tatalo, ma na tali mai le Alii. Sa amata ona ou mauaina konekarate tumau, ma o lea na faigofie ai ona ou faatutumua aso faigaluega lea sa ou misia ao ou i le aoga.

I nei aafiaga uma, ua matou vaaia le tausia pea e le Alii o Ana folafolaga: “Ole atu, ona outou maua ai lea” (3 Nifae 27:29). O le tatalo sa matuai taua i le atiina ae ma le faaleleia o lo matou aiga. Sa matou vaaia ma lagonaina ina ua matou liliu atu i le Alii, na Ia faamanuiaina i matou. Ma te iloa Na te silafia i tatou i o tatou igoa, ma e mafai ona tatou ole atu ia te Ia mo soo se mea tatou te manaomia.