Fesoasoani mai ia te Au!
Tiffany Lewis, Texas, ISA
I lo’u po lona lua ao ou i ai i aoaoga i fafo i St Petersburg, Rusia, sa ou feiloai ai i a’u uo i le taulaga mo se taaloga lakapi faaAmerika. Ina ua mae’a le taaloga sa ou filifili e faataitai e pu’e le pasi ou te alu ai i le fale. Ou te lei alu lava i se pasi i Rusia, ae sa ta’u mai e lo’u tina sa ou faamautu ai o le pasi 7 po o le pasi 1 e avea au i le fale. Ina ua taunuu la le pasi 7, sa ou oso loa i luga.
Ao faagasolo le matou faigamalaga, sa ou autilo atu i faleoloa ma matamata i tagata o tafafao i luga o le auala savali. Sa amatamata lemu ona foliga mai ou te le masani i le eria. Sa ou siakiina la’u uati ma iloa ai ua 30 minute talu ona ou tietie i le pasi.
Sa faafuasei lava ona tu le pasi, sa tape moli, ma gasolo uma tagata i fafo. I se taumafaiga e aua nei ou popole, sa ou autilo solo mo se fesoasoani. Sa ou iloa afai e mafai ona ou maua le nofoaafi la’u pasese o le metro, o le a mafai ona ou taunuu i le fale ma le saogalemu. Sa ou vaaia se ulugalii talavou i le auala ma ou savali loa agai i ai.
“Ua ou sē,” o la’u tala lea. “E te lua silafia le mea o lo o i ai le metro?”
“O le metro e matua mamao lava ma iinei,” o le tala lea a le tamaloa. “Ae o lo o i ai se fale faatali pasi i o. Pu’e le pasi 5, ma o le a ave ai oe i le metro.”
Sa ou faafetai ia te ia ma savali faanatinati loa i le isi magaaala. Ina ua taunuu le pasi ma tu, e ui i lea, e le ose numera 5 ae o le numera 1. Sa ou toe mafaufau i tua i le tala a lo’u tina sa ou faamautu ai: “Pu’e le pasi 7 po o le pasi 1, ma o le a aveina oe i le fale.”
Sa ou alu i luga e aunoa ma so’u loto i ai, ae sa toe faaauau foi le malaga. Sa o ese taitasi atu le pasese ae totoe ai na o a’u.
E lei umi, ae tu loa ma le pasi i autafa o le auala.
“Ua tatau ona e alu i fafo,” o le tala lea a le ave pasi. “O le nofoaga mulimuli lea e tu [ai le pasi].”
Sa gatete atoa lo’u tino ao ou taumafai e manava ma taofi le maligi o o’u loimata. Ua amata ona pogisa, ma afai ou te le mauaina le metro a o le’i manava galuega, o le a faaaluina lo’u po i luga o auala o St Petersburg.
“Fesoasoani mai ia te au, Tama oi le Lagi,” Na ou tatalo lemu ai ma amata ona ou savali. Ona ou tamoe ai lea, ma amata ona ou talotalo atu i taavale la’u pasese o loo fepasiai solo. E leai se [taavale] na tu mai.
E lei umi ae ou taunuu loa i le isi fale faatali pasi, sa tumu i tagata. O moli o le pasi sa agai mai—o le numera 7—sa sulugia ai i matou. Sa ou le mautonu. Sa ou matua le iloaina lava pasi, ae sa malosi lava se uunaiga o au mai i tua ma tulei ai au i luga o sitepu ma agai atu i totonu o le pasi. Sa ou nofo malosi ifo i lalo o le nofoa, ma autilo ifo i la’u uati. Ua ta le 11:50 i le po. O le a tapunia le metro i le 10 minute.
Na moeiini ou mata, ma toe musumusu, “Fesoasoani mai ia te au.” Ina ua pupula atu ou mata, sa ou vaaia moli malamalama o le ofisa o le metro ao agai atu le pasi e tu. Sa ou tamoe i fafo mai le pasi ma agai atu i totonu o le metro e pue le nofoaafi mulimuli o le po.
Ao ou nofo ifo i lalo, sa ou mafaufau i le auala na faanumeraina ai e le Tama oi le Lagi Ana manu felelei (tagai i leMataio 10:29–31), ma sa ou faafetai lemu ai ia te Ia. Na ou iloa i lena po pogisa i lena aai tele, na Ia taitaiina a’u i le fale.