Tapē le TV!

Jonathan H. Westover, Iuta, ISA

O le po o le aso Toonai lea na sosoo ai ma le aso malolo o le aso Faafetai, sa na o au ai i totonu o lo’u potu lea e i fafo mai le lotoa. Sa lei tele ni au mea sa fai, o lea sa ou faasolosolo ai loa i alaata eseese o le TV seia iu ina ou tau atu i se ata tifaga faatoa amata lava.

E lei silia ma ni nai minute ae ou iloa loa e le talafeagai le ata tifaga. Sa ou mafaufau mo se minute, “O le a lava se afaina tele? E leai a se tasi o i ai. Ma le isi mea, o loo faaali mai i le TV, o lona uiga ai ua aveese uma vaega le lelei.”

Peitai, sa uunaia lava au e le Agaga, e tapē le TV. Sa tonu loa ia te au e faitau se tusi.

Pe a ma le afa itula mulimuli ane ae ou faalogoina le tuitui mai o le faitotoa. O se tasi o le matou korama a le au toeaina, sa ta’u mai ia te au o loo ma’i se tasi o tamaitai talavou o loo ia asia ma e manaomia se faamanuiaga. Sa ia faaaluina le 30 minute ua tea e telefoni solo ai ma tuitui i faitotoa, ina ia maua se tasi o i le fale e mafai ona fesoasoani ia te ia. Mulimuli ane, sa ia sau i lo’u faitotoa. Sa ou ioe e fesoasoani ma faatopetope ona ou sui i o’u ofu Lotu.

Ao ma savavali atu i le potu o lenei tamaitai, sa ou fesili po o a auga o le gasegase. Pau a le mea na ia iloa o le mauaina o se valaau faanatinati mai le tamaitai la te potu faatasi, e talosaga ai lona alu atu i se taimi vave lava.

Ina ua ma taunuu atu i le potu, sa manino lava lona le manuia. Sa maualuga lona fiva ma vaaia lona sesega. Sa ta’u mai e le tamaitai la te potu faatasi sa ma’i lenei tamaitai mo ni nai itula, na vaivai o ia ma sa le sao se meaai ona o le faaletonu o lona manava.

Sa ou faapea o le a ou faauuina o ia i le suauu paia, ae sa talosaga mai le uso mai le korama o le au toeaina pe mafai ona ou faia le faamanuiaga. Sa ou lagona le le agavaa ma sa ou le mautinoa po o a upu ou te faia. Sa lei lava se taimi ou te saunia ai faalemafaufau e tuuina atu se faamanuiaga, ae sa ou tatalo lemu ina ia tuu sao mai e le Atua a’u upu.

Ina ua maea le faauuga, sa ou tauina le igoa o lenei tamaitai ma faia le faamanuiaga. Sa ou faia ni folafolaga o le toe faafoisia o lona soifua maloloina ma tuuina atu ni upu faamafanafana lea sa le o ni au upu. Sa ou faaiuina loa le faamanuiaga. Ina ua pupula o ma mata, sa ou vaaia se ataata fiafia i foliga o le tamaitai talavou, ma sa ia faafetai mai ia i maua mo le faamanuiaga. E lei umi ae manuia lenei tamaitai ma sa mafai ona toe foi i lana aoga ma faamaeaina lena semesa.

Ao ou tomanatu i lena aafiaga, ou te lagona le maoae o le agaga faafetai mo le avanoa e umia ai le perisitua. O le aafiaga sa na o le 10 minute le umi, ma e ou te mautinoa ua leva ona galo i le tamaitai na gasegase. Ae o loo tumau pea lona aafiaga ia te au.

Ou te faafetai mo musumusuga a le Agaga, lea na uunaia ai au ou te aloese mai faaosoosoga ma ia ou tumau ma saunia faaleagaga. Faaaopoopo atu i ai, ou te faafetai i le Agaga mo le taitaiina mai o le uso o la’u korama a toeaina i lo’u potu.

Ae e faasilisili ai, lo’u faafetai i se Tama Faalelagi agalelei ma le agaalofa, o Le na faamalosia au i lo’u le atoatoa, i le taialaina o au upu i le faamanuiaga ma le faataunuuina o na upu lea sa Ia finagalo ou te tautala atu ai. Ou te iloa a tumau lo tatou agavaa, o le a faatasi le Agaga ma i tatou e taitaia o tatou ala ina ia lava saunia i tatou e auauna atu i e o loo siomiaina i tatou.◼

Sa uunaia au e le Agaga e tapē le TV. Pe a ma le afa itula mulimuli ane ae ou faalogoina le tuitui mai o le faitotoa.