Valaaulia i se Mala

Cesar A. Minutti, Brazil

E lei leva talu ona amata la’u tautua e tatau ai i le ami a Pasila, ae filifilia loa au o se taitai au i se vaega o alii e toa sefululua. Ae paga lea, o a’u fitafita talavou e 12 e foliga mai e pito i maualalo lava tulaga faatonuina i le nofoaga o fitafita. Sa ou iloa mulimuli ane o i latou nei na aafia i fualaau faasaina, gaoi, soligatulafono o le ola le mama, ma isi agasala matuia.

Nai lo lou aafia i o latou tulaga faatonuina maualalo, sa ou faaaogaina avanoa uma ou te faasoa atu ai le talalelei ia i latou. Mo se faataitaiga, i taimi o malologa pupuu po o taimi o loo matou faamamaina ai a matou fana, ou te talanoa ai ia i latou e uiga i le talalelei. Sa ou faapea o le a latou ula i ou tulaga faatonuina ma talie mai ia te au, ae sa latou faalogo ma faaaloalogia au. Ae peitai, e ui i au taumafaiga e aoao atu ia i latou mataupu faavae o le talalelei, e lei suia ai a latou amio ma uiga.

Sa faaiuina lo matou taimi i le ami, ma i le aso mulimuli i le avea ai o ni fitafita, sa valaaulia au e nei alii matou te fiafia faatasi i se tamai lotoa manu. “Taitai, e tatau lava ona e susu mai i le matou pati,” o le tala lea a se tasi na fai mai ia te au. “O le a e le faamaina i matou i lou le susu atu, a ea?”

Sa toeitiiti lava ou taliaina le valaulia ina ia le faamaina i latou. Ae sa oo mai ia te au se manatu o tulaga o la latou pati o le a le tusa ai ma ou tulaga faatonuina o se tasi o le Au Paia o Aso e Gata Ai. Sa ou manatuaina mea sa aoaoina ai au i le seminare e uiga i le aloese mai nofoaga e le oo i ai le Agaga Paia. E ui i lo latou le fiafia, ae sa ou ta’u atu i le vaega ou te le auai atu. Sa ou faatofa atu i ai ma agai loa i le fale.

Ua mavae ni nai masina ae ou toe vaai loa i se tasi o nei fitafita mai lena vaega. Mai i lana faamatalaga sa ou faafetai ai i lo’u le auai atu i la latou fiafia faamavae, lea sa faaautu i le tele o mea inu malolosi. Ao i ai pea i le aafiaga [o le pia], sa amata ona fetogi solo e tamaloloa fagu pia i isi. Ma, i se tulaga faaulaula, sa tutu ai e se tasi se laau afitusi ma togi atu i lana uo, ma mu tugā ai ma maliu ai i nai aso mulimuli ane. Ma o se taunuuga, sa molia i latou uma sa auai i lena pati i se solitulafono e faatatau i lona maliu.

Pe ana ou auai i lena pati—e tusa lava pe ou te lei inuina se pia—ou te aafia lava i lena solitulafono. Ma o lena mea na tupu semanu e tumau ai pea ma taofiofia ai lo’u lumanai. Sa ou faanoanoa mo lena alii talavou na maliu, ae sa ou faafetai i lo’u mulimuli i musumusuga a le Agaga ma fautuaga mai taitai o le Ekalesia.◼

Sa toeititi lava ou taliaina le latou valaaulia, ae sa ou manatuaina mea sa aoaoina ai au i le seminare e uiga i le aloese mai nofoaga e le oo i ai le Agaga Paia.