I Saunoaga a Taitai o le Ekalesia
O Le Sefuluai—O se Poloaiga Foi mo e Le Tagolima
Mai se saunoaga i le konafesi aoao ia Aperila 2005.
O le masina o Oketopa i le 1998 sa faatafunaina ai e le Afa o Miti le tele o vaega o Amerika Tutotonu. Sa matuai popole Peresitene Gordon B. Hinckley (1910–2008) mo i latou na aafia i lenei faalavelave, o le toatele oi latou na aveesea mea uma—meaai, lavalava, ma meafale. Sa asiasi atu o ia i le Au Paia i aai o San Pedro Sula ma Tegucigalpa, Honduras; ma Managua, Nicaragua. Ma e pei foi o upu a le perofeta alofa o Elia i se fafine matelaina ua oti lana tane, e faapena foi ona talitutusa ma le savali a lenei perofeta o aso nei i aai taitasi—ina ia ositaulaga ma ia usiusitai i le tulafono o le sefuluai.
Ae e faapefea ona e fai atu i se tasi ua matuai puapuagatia lava ina ia ositaulaga? Sa silafia e Peresitene Hinckley o uta meaai ma lavalava na latou mauaina o le a fesoasoani latou te ola ai i le taimi o le faalavelave, ae sa sili atu lona alofa ma lona popole mo i latou nai lo lena. E ui lava i le taua o le fesoasoaniga agaalofa, na ia silafia o le fesoasoani sili ona taua e sau mai le Atua, ae lē mai le tagata. Sa manao le perofeta e fesoasoani atu ia i latou i le tatalaina o pupuni o le lagi e pei ona folafola mai e le Alii i le tusi a Malaki (tagai Malaki 3:10; Mosaea 2:24).
Sa aoao atu Peresitene Hinckley ia i latou, afai o le a totogi a latou sefuluai, o le a i ai pea lava meaai i luga o a latou laulau, o le a i ai pea lava ni lavalava i o latou tua, ma o le a i ai pea lava se malutaga i o latou ulu.
Sa asiasi atu Peresitene Gordon B. Hinckley i tagata o le Ekalesia i Honduras ina ua mavae le afa i le 1998.