Ngaahi Talanoa ʻo Sīsuú
ʻAʻahi ʻa Sīsū ki he kau Nīfaí
Mei he 3 Nīfai 8–12.
Naʻe ʻaho ʻe tolu hono ʻufiʻufi ʻe ha fakapoʻuli matolu e fonua ʻo e kau Nīfaí. Ne ʻikai ha ʻata ʻo e laʻaá pe ha ulo ʻo e fetuʻú. Naʻe fuʻu fakapoʻuli pea ʻikai lava ke ulo ai ha foʻi teʻelango.
Ne fanongo e kau Nīfai ilifiá ki he fatulisí mo e ngaahi afā fakamanavaheé mo ongoʻi e ngaahi mofuike naʻá ne luluʻi e kelekelé. Ne tangi mo toʻe ha kakai tokolahi ʻi he fakapoʻulí. Ne nau fakaʻamu naʻa nau talangofua ki he ngaahi akonaki ʻa e palōfita ko Nīfaí pea fakatomala!
Ne fakafokifā e ongo mai ha leʻo ʻi he fonuá kotoa: “Vakai, ko au ko Sīsū Kalaisi ko e ʻAlo ʻo e ʻOtuá. Naʻa ku fakatupu ʻa e ngaahi langí mo e māmaní, pea mo e ngaahi meʻa kotoa pē ʻoku ʻi aí. Naʻá ku nofo mo e Tamaí talu mei he kamataʻangá.”
Naʻe pehē ʻe Sīsū naʻá Ne haʻu ki māmaní ke fakahaofi e māmaní mei he angahalá. Kuó Ne tuku hifo ʻEne moʻuí pea kuó Ne toetuʻu. Naʻá Ne fakaafeʻi e taha kotoa pē ke fakatomala pea moʻui.
Naʻe fuʻu ofo e kau Nīfaí ke fanongo ki he leʻo ʻo Sīsuú ʻo nau tangutu fakalongolongo ʻi ha ngaahi houa lahi, ʻo fakalaulauloto ki he meʻa ne nau fanongo ki aí.
Ne toe maama mai e pongipongí, pea kamata ke fiefia e kakaí. Ne tokolahi ha kakai ne fakatahataha hake ki he temipale ʻi he fonua ko Mahú ʻo talanoaʻi e ngaahi meʻa fakaofo ne hokó. Pea naʻa nau fanongo ki ha kihiʻi leʻo siʻi mei he langí. Naʻe vela honau lotó he fanongo ki he leʻó, ka naʻe ʻikai ke mahino ia kiate kinautolu.
Ne toe ongomai e leʻó, ka naʻe ʻikai pē ke mahino kiate kinautolu e leá.
Ne tuʻo tolu e ongo mai ʻa e leʻó, ʻo pehē, “Vakai ki hoku ʻAlo ʻOfaʻangá, ʻa ia oku ou fiemālie lahi ai, ʻa ia kuó u fakaongoongoleleiʻi ai ʻa hoku hingoá—mou fanongo kiate ia.”
Ne sio hake e kakaí pea nau sio ki he hāʻele hifo ʻa Sīsū mei he langí kae ʻoua kuó Ne tuʻu ʻi honau lotolotongá. Naʻe tō e kau Nīfaí ki he kelekelé. Naʻa nau manatu ki he ngaahi lea ʻa e kau palōfitá—ʻe ʻaʻahi mai ʻa Sīsū Kalaisi kiate kinautolu hili Hono tutukí pea toe tuʻú.
Naʻe tuku ʻe Sīsū ke ala e taha kotoa ki Hono toʻukupú mo hono toʻukupu kelekelé ke nau ongoʻi e feituʻu ne tuki faʻo ai Ia he kolosi ʻi Selusalemá. ʻI he hili e mamata mo ala kotoa e kakaí kiate Iá, naʻa nau ʻilo ko Ia ʻa e Fakamoʻui kuo toetuʻú. Naʻa nau kaila, “Hōsana!” mo nau hū kiate Ia.
Naʻe ui ʻe Sīsū e palōfita ko Nīfaí ke haʻu kiate Ia. Naʻá ne foaki kia Nīfai mo ha kau tangata angatonu kehe ʻe toko 11 ʻa e mafai ke akonaki mo fai papitaiso hili ʻEne toe foki ki he langí. Naʻe hoko e toko 12 ko ʻení ko e kau ākonga ia ʻi he Siasi ʻo Sīsū Kalaisi ʻi he Maama Foʻoú.
Koeʻuhí ke Mou ʻIlo, tā ʻe Gary Kapp © 2004, ʻikai lava ke hiki hano tatau ; tā fakatātaaʻi ʻo e ʻatá ʻe Jed A. Clark