Ko Hono ʻOmi ʻo e Palaimelí ki ʻApi
ʻOku Akoʻi Au ʻe he Ngaahi Fekau ʻe Hongofulú ke u ʻOfa ki he ʻOtuá mo ʻEne Fānaú
ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.
Naʻá ke femoʻuekina he ʻahó ni! Ne kole atu ho kaungāakó pe ʻe lava ke ne hiki hoʻo ngāue mei ʻapí. Naʻá ke loto ke ke faitotonu, ko ia ai ne ʻikai ke ke loto ki ai ka naʻá ke talaange te ke tokoniʻi ia.
ʻI hoʻo foki ki ʻapi he tuku ʻa e akó, naʻá ke sio ki ho kaungāʻapí ʻokú ne feinga ke hiki hake ha fuʻu kato vesitapolo lahi ne toki toli mei heʻene ngoué. Naʻá ke loto ke fai mo aʻu ki ʻapi, ka naʻá ke lele atu ʻo tokoniʻi ia ke ʻave ʻene kató ki hono falé.
Hili e maʻu meʻatokoni efiafí ne kole atu e tangataʻeikí ke fai hoʻo ngāue mei ʻapi he fiká. ʻOku faingataʻa e fiká pea ʻikai te ke fie fai ia ʻe koe, ka naʻá ke loto ke talangofua ki hoʻo tangataʻeikí.
Naʻá ke helaʻia he taimi mohé, ka naʻá ke tūʻulutui pē ʻo fakamālō ki he Tamai Hēvaní ʻi ho ngaahi tāpuakí.
Naʻá ke ʻilo nai ko hono fai kotoa ko ia e ngaahi fili lelei ko ʻení, ʻokú ke talangofua ai ki he Fekau ʻe Hongofulú? Hili e hola ʻa e kau ʻIsilelí mei ʻIsipité, naʻa nau fie maʻu ha tataki mei he ʻEikí. Naʻe fakafou mai ʻe he ʻEikí ʻia Mōsese ha fekau mahuʻinga ʻe 10 ke nau muimui ai ke nau moʻui angatonu. ʻOku akoʻi ʻe he Fekau ʻe Hongofulú e fakaʻapaʻapa ki he ʻOtuá, faitotonú, fakaʻapaʻapa ki heʻetau mātuʻá, tauhi e ʻaho Sāpaté ke māʻoniʻoní, mo e hoko ko ha kaungāʻapi leleí. ʻOku mahuʻinga e ngaahi laó ni ʻi he ʻahó ni ʻo hangē pē ko ia he taʻu ʻe lau afe kuo hilí. ʻOku tau ako ke ʻofa mo fakaʻapaʻapa ki he ʻOtuá pea angalelei mo ʻofa ʻiate kinautolu ʻoku tau feohí, ʻi heʻetau tauhi e ngaahi fekau ʻa eʻEikí.
Tā fakatātaaʻi ʻe Scott Greer