Pōpoaki ʻa e Faiako ʻAʻahí
Ngaahi Fie Maʻu Makehé mo e Tokoni ne Faí
Ako ʻi he faʻa lotu ʻa e fakamatala ko ʻení, pea aleaʻi ia mo e kau fefine ʻokú ke ʻaʻahi ki aí ʻo ka feʻunga ke fakahoko. Fakaʻaongaʻi e ngaahi fehuʻí ke tokoni atu ki hono fakamālohia e kau fefiné pea ʻai ke hoko ʻa e Fineʻofá ko ha konga longomoʻui ʻo hoʻo moʻuí.
Tuí, Fāmilí, Fakafiemālié
Naʻe pehē ʻe Palesiteni Monisoni, “ʻOku lahi fau e ngaahi fie maʻu ʻa e niʻihi kehé, pea ʻe lava ke tau fai ha meʻa ke tokoni ai ki ha taha. … Ka ʻikai ke tau tokoni ki he niʻihi kehé, ta ʻoku ʻikai ha ʻuhingamālie ia ki heʻetau moʻuí.”1
ʻI heʻetau hoko ko e kau faiako ʻaʻahí, te tau lava ʻo ʻiloʻi lelei mo ʻofa moʻoni he fefine takitaha ʻoku tau ʻaʻahi ki aí. ʻE hoko fakanatula pē ʻetau tokoni’i kinautolu ʻoku tau ʻaʻahi ki aí ʻi heʻetau ʻofa ʻiate kinautolú (vakai, Sione 13:34–35).
ʻE lava fēfē nai ke tau ʻilo e ngaahi fie maʻu fakalaumālie mo fakatuʻasino ʻa e kau fafiné kae lava ke tau fai ha tokoni ʻi he taimi ʻoku fie maʻu aí? ʻOku totonu ke tau maʻu ha tataki fakalaumālie ʻi heʻetau hoko ko e kau faiako ʻaʻahí, ʻi he taimi ʻoku tau lotua ai ʻa kinautolu ʻoku tau ʻaʻahi ki aí.
ʻOku mahuʻinga foki ke fetuʻutaki maʻu pē ki heʻetau kau fafiné. ʻOku tokoniʻi kitautolu kotoa ʻe he ngaahi ʻaʻahi fakatāutahá, telefoní, kiʻi tohi fakalotolahi, ʻī-meili, tangutu fakataha mo iá, fakahikihiki ʻi he loto moʻoni, tokoni ʻi he lotú, mo e taimi puké pe faingataʻaʻiá, mo e ngaahi ngāue ʻofa kehé ke tau fetauhiʻaki mo fefakamālohiaʻaki ai.2
ʻOku kole ki he kau faiako ʻaʻahí ke nau fai ha lipooti ki he tuʻunga lelei ʻo e kau fafiné, ngaahi faʻahinga fie maʻu makehe, pea mo e tokoni naʻe fai kiate kinautolú. ʻOku tokoni e faʻahinga lipooti ko ʻení mo ʻetau tokoni ki heʻetau kau fafiné ke fakahaaʻi ai hotau tuʻunga fakaākongá.3
Mei he Folofolá
Mei Hotau Hisitōliá
Kuo hoko maʻu pē e fetokoniʻakí ko e tefitoʻi taumuʻa ʻo e faiako ʻaʻahí. ʻOku tau maʻu e angaʻofá mo e anga fakakaumeʻá ʻi hono fakahoko maʻu pē e tokoní ʻo ʻikai toki ʻaʻahi fakamāhina pē. Ko ʻetau tokangá ʻoku mahuʻingá.
Naʻe pehē ʻe Mele ʻEleni Simuti, ko e palesiteni lahi hono 13 ʻo e Fineʻofá, “Ko hoku lotó ke u kole atu ki heʻetau houʻeiki fafiné ke tuku muʻa ʻetau hohaʻa ki haʻatau fakahoko ha telefoni pe ha ʻaʻahi fakakuata pe fakamāhina.” Naʻá ne kole mai kiate kitautolu ke “tau tokanga ange muʻa ki hono tanumaki ʻa honau ngaahi laumālie pelepelengesí.”4
Naʻe akonaki ʻa Palesiteni Sipenisā W. Kimipolo (1895–1985), “ʻOku mahuʻinga ai ke tau fetokoniʻaki ʻi he puleʻangá.” Ka naʻá ne fakatokangaʻi ʻoku ʻikai fie maʻu e tokoní kotoa ke lalahi. Naʻá ne pehē, “ʻOku faʻa hoko ʻi he taimi ʻe niʻihi ʻetau ngaahi ngāue ʻofá ko ha fanga kiʻi poupou faingofua pe ko hano fai ʻo ha … kiʻi tokoni ki ha fanga kiʻi ngāue, ka ko e ngaahi ola lalahi moʻoni ʻoku lava ke tafe mai … mei he fanga kiʻi ngāue ʻoku īkí!”5
Tā fakatātaaʻi ʻo e ʻatá ʻe Matthew Reier