Ko Hono Fakaʻaongaʻi Fakapotopoto ʻo e Tauʻatāina ke Filí

Ko e taha e ngaahi moʻoni mahuʻinga taha te tau lava ʻo ako ʻi heʻetau kei talavoú ko hono maʻu ʻo e tauʻatāina moʻoní mo e fiefia ʻoku tuʻuloá mei hono fakaʻaongaʻi ʻetau tauʻatāina ke filí ke tauhi e ngaahi fekau ʻa e ʻOtuá.¹ ʻOku fakamamafaʻi ʻe ʻEletā Seni M. Poueni ʻo e Kau Fitungofulú e tefitoʻi moʻoni ko ʻení ʻi he peesi 52–53 ʻo e Liahoná ni.

ʻOkú ne tala ki he toʻu tupú, “ʻOku malava ke mou maʻu e meʻa kotoa ʻoku maʻu ʻe he Tamaí. Ko e filí ʻoku ʻaʻau ia.”

ʻI ha māmani ʻoku fonu he angahalá mo e fakatuʻutāmakí, ʻoku ʻi ai ha fatongia mahuʻinga ʻo e mātuʻá ke teuteuʻi ʻenau fānaú ke nau fai e ngaahi fili ʻoku totonú pea ikunaʻi e ʻahiʻahí. Ko hono moʻoní, kuo fekauʻi ʻe he ʻEikí e mātuʻá “ke akonakiʻi hake ʻa [ʻenau] fānaú ʻi he māmá mo e moʻoní” (T&F 93:40).

Kuo ʻosi ʻomi ʻe he Siasí ki he mātuʻá ha ngaahi maʻuʻanga tokoni ke tokoni ki heʻenau fānaú ke nau ako mo moʻui ʻaki e tuʻunga moʻui ko ʻení. ʻE lava ke tokoni atu e ngaahi fokotuʻu ko ʻení.

Ngaahi Fokotuʻu ki hono Akoʻi ʻo e Toʻu Tupú

Lau mo hoʻo fānau taʻu hongofulu tupú e konga ki he tauʻatāina ke filí mo e ʻekeʻi meiate kita ʻa e meʻa ʻokú te fai pe taʻe faí ʻi he Ki Hono Fakamālohia ʻo e Toʻu Tupú. ʻI hono fai iá te ke maʻu ai ha faingamālie ke aleaʻi e tuʻunga moʻuí mo tali ha faʻahinga fehuʻi ho fohá pe ʻofefiné.
Lau e fakamatala ʻa ʻEletā Poueni ʻi he ngaahi peesi ʻa e toʻu tupú ʻi he pulusinga ko ʻení. Fakakaukau ke fakaʻaongaʻi e talanoa ki hono fafanga e ulofi totonú ke tokoni ki hoʻo fānaú ke mahino kiate kinautolu hono fai e fili ʻoku totonú.
ʻAlu ki he youth.lds.org, lomiʻi ʻi he “Ki Hono Fakamālohia ʻo e Toʻu Tupú” ʻi he “Youth Menu,” pea lomiʻi ʻi he “Tauʻatāina ke Filí mo e ʻEkeʻi Meiate Kita ʻa e Meʻa ʻOkú Te Fai pe Taʻe Faí.” Te ke maʻu ai ha ngaahi folofola ʻoku fekauʻaki mo ia, ngaahi fehuʻi mo e tali pea mo ha fakamatala.
Fakakaukau ke fai ha efiafi fakafāmili ʻi ʻapi pe fakataha lotu fakafāmili ʻi hono mahuʻinga ʻo e loto-toʻá mo taukaveʻi e meʻa ʻoku tau tui ki aí.²

Ngaahi Fokotuʻu ki hono Akoʻi ʻo e Fānaú

ʻOku fekauʻaki ʻa Hono ʻOmi ʻo e Palaimelí ki ʻApi he māhina ní mo hono tauhi ʻo e ngaahi fekaú (vakai, peesi 64–65 ʻi he pulusinga ko ʻení). Lau mo e fāmilí e talanoá pea kole ki hoʻo fānaú ke nau sio pe ko e hā e lahi ʻo e ngaahi fili ne fai ʻi he talanoá. Fakamatalaʻi ange ʻoku fakangofua ʻe he Tamai Hēvaní ke tau fai ha ngaahi fili koeʻuhí ke tau lava ʻo ako mo tupulaki. Vahevahe e ngaahi meʻa kuó ke ako mei hono fai ʻo ha ngaahi filí.
Fakakakato e ʻEkitivitī FKT ʻi Hono ʻOmi e Palaimelí ki ʻApí. Talanoa ki he ola ʻo hono fai e ngaahi fili ʻoku leleí. Vahevahe hoʻo fakamoʻoni ki he ngaahi tāpuaki naʻá ke maʻu ʻi hono fai ha ngaahi fili māʻoniʻoní.
Ki ha ngaahi fakakaukau lahi ange ki hono akoʻi ʻo e tauʻatāina ke filí mo e ʻekeʻi meiate kita ʻa e meʻa ʻokú te fai pe taʻe faí, vakai ki he konga ʻi Sānuali ʻo e Fokotuʻutuʻu ki he Taimi Feʻinasiʻaki ʻo e 2012 (he ʻinitanetí ʻi he lds.org/callings/primary/sharing-time-2012).

Tā Fakatātā ʻa Scott Greer