Hangtud sa Sunod Natong Panagkita
Natukod diha sa Bato
Gikan sa pakigpulong nga gihatag sa kinatibuk-ang komperensya niadtong Okt. 7, 1916, sama nga giprinta pag-usab sa “Natukod Diha sa Bato,” Liahona, Hunyo 2010, 12–13.
Walay libro nga paigo aron sa pagdumala niining Simbahan.
Daghang katuigan ang milabay adunay miabut sa Utah nga usa ka pari sa [laing] simbahan. … Nakatambong na siya og usa ka sakrament miting sa “Mormon” ug daghang nasaway sa atong pamaagi sa pagpahigayon sa Katapusang Panihapon sa Ginoo, ilabi na gyud sa paggamit nato sa tubig imbis bino niadtong okasyon. Miingon siya nga kini nakapakurog kaniya sa dihang iyang nakita nga miinom ang mga tawo sa tubig; ug mihatag siya og usa ka kamatuoran, tungod kay kini tinuod gayud, nga sumala sa Biblia, ang Manluluwas, sa dihang mipasiugda Siya sa sakrament diha sa mga Judeo, migamit og bino, nagdeklarar nga kini Iyang dugo o nagrepresentar kini sa Iyang dugo. Mahimo nakong idugang nga nahisulat usab sa Basahon ni Mormon nga migamit ang Manluluwas og bino sa dihang gipaila Niya ang sakrament ngadto sa mga Nephite.
Ang akong … higala, nahibalo man siya o wala, naka-obserbar sa dakong kalainan nga nakapalahi sa Simbahan sa Dios gikan sa uban nga mga simbahan sa kalibutan—mao kini, nga samtang sila natukod diha sa mga libro ug mga tradisyon ug mga lagda sa mga tawo, kining Simbahan natukod diha sa bato ni Kristo, sa baruganan sa direkta ug nagdayon nga pagpadayag. Ang mga Santos sa Ulahing mga Adlaw wala mobuhat sa mga butang tungod kay kini naimprinta lamang sa usa ka libro [sa kasulatan]. Wala sila mobuhat sa mga butang tungod kay misulti lamang ang Dios ngadto sa Judeo sa pagbuhat niini; ni mobuhat sila o dili mobuhat sa bisan unsa nga butang tungod lamang sa mga instruksyon nga gihatag ni Kristo ngadto sa mga Nephite.
Ang Ginoo Nagpakita didto sa Kirtland Temple, ni Del Parson
Bisan unsa nga butang [nga opisyal] nga gibuhat niining Simbahan tungod kay ang Ginoo, nagpadayag gikan sa langit alang sa atong panahon, nagsugo niining Simbahan sa pagbuhat niini. … Mao kana ang konstitusyon sa Simbahan ni Kristo. Kon naggamit kita og tubig imbis bino diha sa sakrament sa Katapusang Panihapon sa Ginoo, tungod kay si Kristo ang nagmando niini [tan-awa sa D&P 27:1–4].
Mopahiangay ang balaang pagpadayag sumala sa sirkumstansya ug kondisyon sa katawhan, ug mausab sigon sa paglambo sa buluhaton sa Dios paingon sa padulngan niini. Walay libro nga paigo aron sa pagdumala niining Simbahan.
Sa pagsulti niini, mosulti ako uban sa tanang may balaan nga pagtahud sa mga nahisulat sa pulong sa Dios, nga naimprinta na diha sa mga basahon, ang ubang bahin niini mahimong karaan na, nakatuman na sa katuyoan niini ug gibutang na sa estante, [sama sa paghalad sa mga hayop; tan-awa sa 3 Nephi 9:19–20], samtang ang ubang bahin niini may kapuslanan, puno sa kinabuhi, ug magamit sa atong kahimtang karon—ang atong kalamboan karon. Apan bisan kining bahina kinahanglang gyud nga hustong masabtan. Walay tawo nga angay molalis kon unsay anaa sa mga libro, agig pagbatok sa usa ka propeta sa Dios, kinsa namulong alang Kaniya ug naghubad sa Iyang pulong [tan-awa sa D&P 1:37–38]. Sa pagbuhat sa ingon mas gipalabi ang karaang sulat kay sa usa ka buhi nga propeta, diin usa gayud ka sayop nga pagtuo.
Kon unsa man ang gisulti sa Ginoo ngadto sa mga Judeo ug sa mga Nephite mga 2,000 ka tuig na ang milabay o unsa ang gisulti Niya ngadto sa mga Santos sa Ulahing mga Adlaw mga 50 o 60 ka tuig na ang milabay dili magamit bisan kanus-a niining panahona gawas kon nahiuyon kini sa pagpadayag karon, uban sa labing bag-o nga instruksyon sa Ginoo ngadto sa Iyang katawhan pinaagi sa Iyang pinili o gitudlo nga mga sulugoon o sulugoon; ug kinsa kadtong mobaliwala niining kamatuoran mahimutang sa peligro.