Usa ka Bag-ong Destinasyon
Ang tagsulat nagpuyo sa France.
Ang akong tibuok kinabuhi ingon og walay hunong nga pagsakay sa eroplano. Nangandoy ko og kalinaw ug kapermanente apan wala gayud kini makaplagi hangtud nga tinud-anay akong midangop ngadto sa Ginoo.
Paghulagway sa litrato pinaagi ni Iurii Kovalenko/iStock/Thinkstock
Usahay ang akong kinabuhi ingon og usa ka padayon nga biyahe sa eroplano. Ang akong mama usa ka Ecuadorian ug ang akong papa usa ka Polish. Natawo ako sa Ecuador, apan sa dihang 10 anyos na ko mibalhin mi sa Spain. Nagpuyo ra mi didto sulod sa duha ka tuig. Sa dihang 12 anyos nako, milupad na usab ang eroplano, niining higayuna padulong sa Poland. Nangandoy ko nga mapermanente, mga higala ug paryente naa sa duol, ug maundang na ang pagsige lang og panamilit.
Unang Pakighimamat uban sa mga Elder
Dihay nanuktok sa pultahan. Akong giablihan ug nakita ang duha ka batan-ong mga lalaki nga nagbarug. Sa walay tahud, akong gisirhan ang pultahan sa wala pa sila makasulti.
“Ablihi ang pultahan pag-usab ug pangayo og pasaylo,” mitingog ang akong papa nga mimando gikan sa luyo sa balay. “Wala kami magtudlo nimo sa pagtagad sa mga tawo ingon niana!”
Medyo nangyam-id, akong giablihan ang pultahan. “Pasayloa ko,” miingon ko.
“Gusto kong makahibalo mahitungod ninyo, mahitungod sa inyong pagtuo. Palihug sulod,” miimbitar ang akong amahan. Ang batan-ong mga lalaki mipaila sa ilang mga kaugalingon nga mga misyonaryo sa Ang Simbahan ni Jesukristo sa mga Santos sa Ulahing mga Adlaw. Nagduha-duha, naminaw ko sa ilang mensahe—sa edad nga 13, ako walay kapilian kondili sa pag-apil.
Upat ka bulan ang mga misyonaryo mibisita sa akong balay, nagtudlo sa mga doktrina sa gipahiuli nga Simbahan ni Jesukristo. “Gitahud namo ug gidayeg ang inyong kaisug, apan kami dili gayud mousab sa among relihiyon,” sa katapusan giingnan sila sa akong amahan, ug wala na gayud namo makita pa ang maong mga elder.
Usa ka Tinguha sa Pagpangita sa Kamatuoran
Milabay ang duha ka tuig, ug ang pag-usab-usab sa sirkumstansya sa pamilya nakapaguol nako pag-ayo. Ang akong papa mibiya sa Poland aron mangita og trabaho mao nga nabalhin ang among pamilya. Gibati nako ang pagkadesperado, nangita sa Dios. Mas nahimong sinsero ang akong mga pag-ampo, nangamuyo sa Langitnong Amahan sa pagtabang nako nga makakaplag sa Iyang presensya.
Usa ka adlaw ang akong inahan misulti kanako, “Dunay tawo nga ginganlan og Garling nangita nimo. Giingnan nako siya nga motawag og balik sa sunod semana.” Nasayud siya nga usa kadto ka misyonaryo ug wala mainteresado sa mensahe, mao nga siya wala mobati nga gikinahanglan motubag siya dayon.
Nianang pagka-Biyernes sa gabii nakadungog ko nga dihay nanuktok sa pultahan. Niining higayuna akong gihatagan ang mga misyonaryo og sinsero nga pag-abi-abi ug mipahiyom. “Welcome mo sa akong panimalay, apan kinahanglan ninyong masayran nga ako dili gayud mahimong usa ka Mormon,” giingnan nako sila.
Gitudloan gihapon ko sa mga elder—kada Biyernes sa hapon sulod sa unom ka mga bulan. Human makakaon og daghang mga biskwit ug liboan ka pangutana, ang akong importante nga mga pangutana natubag. Ingon og sa matag higayon nga ang mga misyonaryo mobisita, laing piraso sa puzzle sa kinabuhi nasulbad. Naintriga, sa katapusan akong gibuhat ang gihangyo sa mga elder nga akong buhaton: sa pag-ampo ug pagpangutana sa Langitnong Amahan kon ang ilang mga pulong ug ang Basahon ni Mormon tinuod ba. Ilang gipaniguro nako nga ang Dios motubag sa mga pag-ampo.
Kumpirmasyon ug Pagduha-duha
Samtang ako nag-ampo ug nagtuon sa mga kasulatan nga mas lawom, kini nga mga doktrina nahimong tam-is sa akong kalag. Sulod sa daghang mga bulan ako nagduha-duha, mibati nga nagkinahanglan ko og solido nga ebidensya, kinahanglan nga masayud sa tanan mahitungod sa ebanghelyo sa dili pa moapil niini nga Simbahan. Sa katapusan, ang mga pulong sa Manluluwas sa Juan 20:29 namulong sa akong kalag: “Dalaygon kadtong wala managpakakita, ngani nanagpanoo.” Nakahukom ako nga magpabunyag.
Ang akong mga ginikanan miingon nga maghulat ko hangtud nga ako usa na ka hamtong aron magpabunyag, apan ang panahon sa paghulat nakatabang sa akong pag-uswag ug kahibalo sa ebanghelyo. Subo lang, samtang ang akong petsa sa bunyag nagkaduol, ako nawad-an og pagsalig sa akong tubag. Nadani ako sa mga butang sa kalibutan ug nahadlok nga ang akong pagpili nga magpabunyag dili dawaton sa mga minahal.
Sa hinay-hinay, mga sayop ug mga desisyon nakapabungol nako sa mga hung-hong sa Espiritu. Ang akong mga kasulatan gibutang sa labing lawom nga bahin sa akong kaban ug gani ako mihunong sa pag-ampo.
Ang mga Panalangin sa Paghinulsol
Lahi ang gidangatan sa akong kinabuhi—daghang mga luha ug mga kahigawad. Lisud kaayo sabton nganong ang akong pamilya kinahanglang makasinati og daghan kaayong mga pagsulay. Sa wala pa magsugod ang akong katapusang tuig sa high school, ang akong mga ginikanan kinahanglang mobiya sa Poland. Ang gipaabut nga pagbalhin pag-usab nakapaguol nako. Sa katapusan, miluhod ako pag-usab sa pag-ampo, tinud-anay nga misulti sa mga pulong: “Langitnong Amahan, ang Imong pagbuot mao ang matuman, dili akoa.”
Kana nga pag-ampo mitimaan sa sinugdanan sa akong pagbalik sa Simbahan, nga ako nasayud nga nagkinahanglan og paghinulsol. Niana nga Dominggo, sa unang higayon sa hapit usa ka tuig, ako mitambong og sakrament miting. Pagkasunod adlaw ako nakahukom pag-usab nga magpabunyag.
Ang Ginoo mitabang kanako sa akong malisud nga proseso sa pagbalik ngadto sa unsay akong nahibaloan nga tinuod. Karon akong giisip kadtong malisud nga mga kahimtang nga pipila sa pinakatam-is nga mga panalangin gikan sa Dios. Wala Niya ako kalimti. Naminaw Siya sa akong mga pag-ampo ug naghulat nako nga makaila sa Iyang tubag. Mitabang siya kanako sa tanang pag-antus nga akong nasinati, milig-on ug nanalipod nako. Pinaagi niini ako nakabaton og mas klaro nga kahulugan sa balaan nga misyon ni Kristo ug sa Iyang Pag-ula.
Nabunyagan ko niadtong Abril 2011. Ang akong eroplano milupad na usab sukad—karon ako nagpuyo sa France, nga nagpasabut og dugang nga mga kausaban. Hinoon, ako karon mapasalamaton ngadto Kaniya alang sa akong kinabuhi ug alang sa mga sirkumstansya nga Iyang gihatag nako nga akong puy-an. Tungod sa akong pagpamatuod sa Pag-ula ni Jesukristo, karon nakasabut na ko nga wala ko mag-inusara, bisan unsa nga sunod nga destinasyon ang ihatag sa kinabuhi. Wala ko masayud kon molupad ba pag-usab ang akong eropano. Ang bugtong butang nga akong nahibaloan mao nga ang akong bag-ong destinasyon mao kanang higpit nga dalan nga paingon sa kinabuhing dayon uban sa Langitnong Amahan ug sa Iyang Anak, si Jesukristo.