Gunit sa Gunitanan nga Puthaw

Ni Elder Ulisses Soares

Sa Kapangulohan sa Seventy

Gikan sa usa ka debosyonal nga pakigpulong, “Becoming a Work of Art,” nga gihatag didto sa Brigham Young University niadtong Nobyembre 5, 2013. Alang sa kompleto nga teksto sa Iningles, bisitaha ang speeches.byu.edu.

Kon kita mogamit sa hugot nga pagtuo ug makugihong mosunod sa mga sugo sa Ginoo, sayon kitang makapili sa matarung.

Sa dihang ang usa ka maayong miyembro sa Simbahan nga akong nailhan nag-eskwela sa kolehiyo, giimbitar siya sa party sa Sabado sa gabii sa balay sa usa ka kauban sa klase. Ang mga propesor sa kolehiyo sa akong higala giimbitar usab, ilabi na kadtong mahigalaon sa mga estudyante. Ang party ingon og maanindot ug luwas ra.

Sa dihang ang akong higala miabut, bisan pa niana, dali kaayo siyang nakamatikod nga ang palibut dili mao ang iyang gidahum. Ang mga estudyante nanag-inom, nanigarilyo, naggamit og drugas, ug nagbuhat og mangil-ad nga mga butang sa tanang suok sa balay. Nabalaka siya ug nakahukom nga mobiya, apan ang party gipahigayon nga layo sa iyang panimalay. Misakay lang siya uban sa mga higala, mao nga wala siyay paagi nga makabiya nga siya lang.

Nianang higayuna nag-ampo siya sa Ginoo, nangayo og panabang. Human makapamalandong, iyang gibati nga kinahanglang moadto siya sa gawas. Misunod siya sa iyang mga pagbati ug nagpabilin sa gawas sa balay hangtud nahuman ang party.

Sa pagpamauli na, ang iyang mga higala naghisgot mahitungod sa mangil-ad nga mga butang nga nahitabo atol sa party. Ang akong higala mibati nga dili komportable sa sitwasyon. Dili sayon alang niya ang pagpaminaw.

Sa dihang siya miambit sa sakrament sa sunod nga adlaw sa simbahan, hinoon, siya mibati nga kalma, malinawon, ug sigurado nga siya mihimo og husto nga desisyon. Nakaamgo siya unsay buot ipasabut sa paggunit sa gunitanan nga puthaw ug dili mamuhi, bisan moagi pa sa gabon sa kangitngit. Klaro siyang nakasabut unsay gitudlo ni Nephi sa iyang igsoong mga lalaki sa dihang siya miingon nga “si kinsa kadto nga mopatalinghug sa pulong sa Dios, ug hugot nga mogunit niini, dili gayud sila malaglag; ni ang mga pagtintal ug ang nagdilaab nga mga pana sa kaaway makabuntog kanila ngadto sa pagkabuta, sa pagdala kanila sa kalaglagan” (1 Nephi 15:24).

Hunahunaa kon unsa kaha ang mahitabo kon kana nga batan-on, tungod sa kaulaw, dili kaayo lig-on nga mogunit sa gunitanan nga puthaw. Isip resulta niini ug sa ubang mga desisyon sa iyang kinabuhi, siya naminyo sa usa ka batan-ong babaye didto sa templo, naghimo og matarung nga pamilya, ug nahimong malampuson. Nagserbisyo siya nga matinud-anon sa Simbahan karon ug nagtinguha nga mahimong maayo nga ehemplo alang sa iyang mga anak.

Ang Kinaiyanhon nga Tawo

Dili sayon ang pag-atubang sa inadlaw nga tintasyon. Kitang tanan nabantang sa palibut nga mapanghudlat ngadto sa ebanghelyo ni Jesukristo. Nagpuyo kita sa kalibutan nga nagkakunhod ang moralidad. Ang media ug teknolohiya nag-imbitar nato sa pag-apil sa mga kalihokan nga makadaot ug makaguba sa kinabuhi nga nagsupak sa atong mga pagtuo ug mga mithi sa ebanghelyo ni Jesukristo. Ang mga pagpamugos sa mga higala kinsa wala motuo sa atong mga mithi, o kinsa mituo sa atong mga mithi apan huyang sa ilang pagtuo, modani nato sa pag-apil sa makapakunhod nga mga binuhatan. Apil pa niini, kinahanglan pa natong atubangon ang kinaiyanhon nga tawo nga anaa sa matag usa kanato.

Ang Giya ngadto sa mga Kasulatan mipasabut sa kinaiyanhon nga tawo, nga “usa ka tawo nga mipili nga maimpluwensyahan sa mga kahinam, mga tinguha, mga gana, ug lawasnong mga tinguha kay sa mag-agad sa mga aghat sa Espiritu Santo. Ang mao nga tawo makasabut sa pisikal nga mga butang apan dili sa espirituhanong mga butang. … Ang matag tawo kinahanglang matawo pag-usab pinaagi sa pag-ula ni Jesukristo nga mohunong sa pagkakinaiyanhaon nga tawo.”¹

Si Presidente Thomas S. Monson kasagaran nga mokutlo og yanong panultihon nga makatabang nato nga makalikay sa mga tintasyon ug makapadayon nato sa saktong direksyon: “Dili kamo mahimong matarung pinaagi sa pagbuhat og sayop, ug dili kamo mahimong masayop pinaagi sa pagbuhat og matarung.”²

Kon magpakita kita og hugot nga pagtuo ug makugihong mosunod sa mga sugo sa Ginoo, mas sayon kitang makapili sa matarung.

Ang Kahayag ni Kristo.

Si propeta Mormon mitudlo sa iyang katawhan:

“Busa, ako mopakita nganha kaninyo sa paagi sa paghukom; kay ang matag butang nga modapit sa paghimo sa maayo, ug sa pagdani sa pagtuo diha kang Kristo, gipadala pinaagi sa gahum ug gasa ni Kristo; busa kamo mahimo nga masayud uban sa usa ka hingpit nga kasayuran nga kini gikan sa Dios.

“Apan bisan unsa nga butang nga modani sa mga tawo sa pagbuhat sa dautan, ug sa dili pagtuo kang Kristo, ug sa paglimud kaniya, ug sa dili pag-alagad sa Dios, niana kamo masayud uban sa usa ka hingpit nga kasayuran nga kini gikan sa yawa; kay sa ingon niini nga paagi ang yawa mobuhat, kay siya dili modani sa tawo sa pagbuhat og matarung, dili, bisan og usa, ni ang iyang mga anghel; ni sila kinsa nagpaulipon sa ilang mga kaugalingon ngadto kaniya” (Moroni 7:16–17).

Ang atong Langitnong Amahan mihatag nato sa Kahayag ni Kristo, nga mao ang “balaan nga kusog, gahum, o impluwensya nga nagagikan sa Dios pinaagi ni Kristo ug naghatag og kinabuhi ug kahayag sa tanan nga mga butang.”³ Makatabang kini sa usa ka tawo sa pagpili tali sa matarung og sayop. Kini nga gasa, uban sa pakig-uban sa Espiritu Santo, makatabang nato sa pagtino kon ang usa ka pagpili nagbutang ba nato sa teritoryo sa Ginoo o diha sa linya sa kaaway. Kon maayo ang atong kinaiya, kita gidasig sa Dios. Kon ang atong kinaiya dili maayo, kita giimpluwensya sa kaaway.

illustration of a young adult man sitting.

Ang akong higala sa kolehiyo migamit niining duha ka mga gasa. Ang Kahayag ni Kristo nakatabang niya sa pag-ila kon unsa ang matarung, ug ang Espiritu Santo naggiya sa iyang desisyon kon unsa nga dalan ang subayon. Kining duha ka mga gasa magamit niadtong kinsa nanggunit sa gunitanan nga puthaw.

Ang Gasa sa Paghinulsol

Hunahunaon kuno nato nga sa pipila ka rason kita gilingla o gilibug sa tintasyon ug misangpot sa pagbuhat og sala. Unsay angay natong buhaton? Kon kita mahulog ngadto sa tintasyon ug sala, kinahanglang makig-uli kita uban sa Dios. Sa pinulongan sa mga kasulatan, kinahanglan kitang maghinulsol.

Si Elder Neil L. Andersen sa Korum sa Napulog Duha ka mga Apostoles mitudlo:

“Kon kita makasala, kita mopalayo gikan sa Dios. Kon kita maghinulsol, kita mobalik ngadto sa Dios.

“Ang pagdapit sa paghinulsol dili kanunay nga usa ka tingog sa pagkastigo apan hinoon usa ka mahigugmaon nga hangyo sa pagbalik ug sa “pagduol og usab” ngadto sa Dios [tan-awa sa Helaman 7:17]. Ang pagtawag sa usa ka mahigugmaong Amahan ug sa Iyang Bugtong Anak maoy makahimo nato nga mas maayo pa kay sa karon, sa pagkab-ot sa mas taas nga dalan sa kinabuhi, sa pag-usab, ug mobati sa kalipay sa pagsunod sa mga sugo. Isip mga disipulo ni Kristo, kita nagmaya sa panalangin sa paghinulsol ug sa kalipay nga mapasaylo. Mahimo kining kabahin nato, maghulma sa atong paghunahuna ug pagbati.”⁴

Ang paghinulsol usa ka talagsaon nga gasa nga alang sa tanan kinsa nagtinguha sa pagbalik ngadto sa Dios ug motugot Kaniya nga pag-umol sa ilang kinabuhi.

Natawo kita uban sa binhi sa pagkabalaan sa atong mga espiritu tungod kay kita mga anak sa Dios. Kini nga binhi kinahanglan nga motubo. Motubo kini samtang kita mogamit sa atong kabubut-on diha sa pagkamatarung, samtang kita mohimo og saktong desisyon, ug samtang kita mogamit sa Kahayag ni Kristo ug sa Espiritu Santo sa paggiya nato sa mga desisyon nga atong himoon sa atong mga kinabuhi. Kini nga proseso nagkinahanglan og panahon, apan posible nga mohulma sa atong mga espiritu ug sa atong mga kinabuhi gikan sa usa ka adlaw ngadto sa lain.

Sa pag-ila sa atong pagkamahalaron ug determinasyon, ang Ginoo mohatag nato unsay dili nato maangkon pinaagi sa atong mga kaugalingon. Hulmahon kita Niya tungod kay Siya nakakita sa atong mga paningkamot sa pagbuntog sa atong mga kasaypanan ug tawhanong mga kahuyang.

Niining paagiha, ang paghinulsol mahimong kabahin sa atong inadlaw nga mga kinabuhi. Ang atong sinemana nga pag-ambit sa sakrament—nga magmaaghup, mapaubsanon sa atubangan sa Ginoo, moila sa atong pagsalig diha Kaniya, naghangyo Kaniya sa pagpasaylo ug pagbag-o kanato, ug nagsaad nga mohinumdom Kaniya kanunay—importante kaayo.

Usahay sa atong inadlaw-adlaw nga mga paningkamot nga mahimong mas sama kang Kristo, atong makita ang atong kaugalingon nga nakigbisog sa samang mga kalisdanan. Ingon og kita nagkat-kat og bukid nga puno sa kakahoyan. Usahay kita dili makakita sa atong pag-uswag hangtud nga kita magkaduol sa ibabaw ug motan-aw gikan sa taas nga mga pangpang. Ayaw pagpakawala sa paglaum. Kon kamo naningkamot ug nanglimbasug sa paghinulsol, kamo anaa sa proseso sa paghinulsol.

Si Elder D. Todd Christofferson sa Korum sa Napulog Duha ka mga Apostoles miingon, “Ang pagbuntog sa dili maayo nga naandang mga buhaton o pagkaadik sa kasagaran nagpasabut nga usa ka paningkamot karon nga pagasundan sa lain pagkaugma ug dayon sa lain, tingali sulod sa daghang mga adlaw, gani mga bulan ug mga tuig, hangtud maangkon nato ang kadaugan.”⁵

Samtang kita molambo, mas klaro natong makita ang kinabuhi ug mobati sa Espiritu Santo nga nag-impluwensya kanato. Alang niadtong kinsa tinuod nga mahinulsulon apan daw wala mobati og kahupayan, padayon sa pagsunod sa mga sugo. Mosaad ko nga ang kahupayan moabut sa panahon sa Ginoo. Ang pagkaayo nagkinahanglan og panahon.

Ipadayon nato ang mahangturong panglantaw pinaagi sa pagbuntog sa kinaiyanhon nga tawo, paghukom pinaagi sa Kahayag ni Kristo, magtinguha sa giya gikan sa Espiritu Santo, maghinulsol kon masayop kita, ug magtugot sa atong Langitnong Amahan sa pag-usab sa atong mga kinabuhi ngadto niana nga Iyang giplano alang kanato.