Mobarug isip mga Saksi sa Dios
Ni Elder Dallin H. Oaks
Sa Korum sa Napulog Duha ka mga Apostoles
Gikan sa usa ka debosyonal nga pakigpulong, “Witnesses of God,” nga gihatag didto sa Brigham Young University–Idaho niadtong Pebrero 25, 2014. Alang sa kompleto nga teksto sa Iningles, adto sa www2.byui.edu/DevotionalsandSpeeches.
Isip mga “asin sa yuta,” kita nga mga Santos sa Ulahing mga Adlaw kinahanglan magpabilin sa atong lami pinaagi sa pagsunod sa atong tinuohan ug sa pagbarug nga mga saksi sa Dios.
Mga paghulagway pinaagi ni Scott Greer
Nagpuyo kita sa kalibutan diin daghan ang milimud sa Dios o sa kaimportante sa Iyang mga sugo. Manghinaut ko nga unsay akong isulti makatabang ninyo nga mas epektibo sa inyong katungdanan sa pagsaksi sa Dios ug sa paglihok alang sa kamatuoran ug pagkamatarung.
I.
Sugdan nako sa unang tulo sa atong Mga Artikulo sa Hugot nga Pagtuo:
“Kami nagtuo sa Dios, ang Amahan sa Kahangturan, ug sa Iyang Anak, si Jesukristo, ug sa Espiritu Santo.
“Kami nagtuo nga ang mga tawo pagasilotan sa ilang kaugalingon nga mga sala, ug dili tungod sa mga kalapasan ni Adan.
“Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:1–3).
Usa ka bantugang propeta sa Basahon ni Mormon mitudlo niining samang mga kamatuoran:
“Tuo sa Dios; tuo nga siya mao, ug nga siya ang milalang sa tanan nga mga butang, lakip sa langit ug sa yuta; tuo nga siya aduna sa tanan nga kaalam, ug tanan nga gahum, sa langit ug sa yuta; tuo nga ang tawo dili makasabut sa tanan nga mga butang diin ang Ginoo mahimo nga makasabut.
Ug usab, tuo nga kamo kinahanglan gayud maghinulsol sa inyong mga sala ug mobiya kanila, ug magpaubos sa inyong mga kaugalingon sa atubangan sa Dios; ug mangutana sa kinasingkasing nga siya mopasaylo kaninyo; ug karon, kon kamo motuo sa tanan niini nga mga butang tan-awa nga kamo mobuhat kanila” (Mosiah 4:9–10).
Agi og pagtandi, karon daghan ang molimud o magduha-duha nga adunay Dios ug miinsister nga ang tanang mga lagda sa kinaiya hinimo sa tawo ug mahimong dawaton o isalikway kon gusto.
Nganong ako namulong sa nag-unang mga kamatuoran sa pagkaanaay Dios ug sa katinuod sa hingpit nga balaod sa husto ug sayop nga nagdumala sa atong kinaiya? Usahay ang labing gikinahanglan nga mga butang nga atong matudlo mao ang mga butang nga gibaliwala lang nato. Kita mahimong mobaliwala sa yanong mga kamatuoran tungod kay kita nagdahum nga kini nasabtan sa tanan, apan wala. Kinahanglan gayud nga atong ipasabut og maayo ang sukaranang mga kamatuoran diin gibase ang atong mga gituohan. Sa katapusan, kini naglakip nga dunay Dios ug sa mahangturong reyalidad sa mga kamatuoran ug sa husto ug sayop nga gihulagway pinaagi sa Iyang mga pagtulun-an ug sa Iyang mga sugo.
II.
Ang paglimud sa Dios o sa pag-usab sa Iyang tahas sa tawhanong mga kalihokan nga gisugdan panahon sa Renaissance nahimong malukupon karon. Ang paghimaya sa tawhanong mga pangatarungan adunay maayo ug dautan nga mga epekto. Ang buhat sa siyensya dunay dili maihap nga mga kalamboan sa atong mga kinabuhi, apan ang pagsalikway sa balaan nga awtoridad isip katapusang basihan sa matarung ug sayop niadtong mipuli sa siyensya alang sa Dios nakapapangutana sa daghang relihiyoso nga mga tawo: “Nganong [ang] kabubut-on ni bisan kinsang bantugang mga pilosoper sa liberal nga tradisyon [o gani ang pagbuot sa bisan haing sanga sa Labawng Hukmanan sa Estados Unidos] … mas tukma sa moral nga mga desisyon kay sa kabubut-on sa Dios”?1
Kadtong kinsa migamit sa tawhanong mga pangatarungan nga molabaw sa balaang mga impluwensya sa ilang kinabuhi nakapagamay sa ilang mga kaugalingon ug nakapaubos sa sibilisasyon sa pagbuhat sa ingon.
Ako mapasalamaton nga nasayud nga dunay duha ka mga pamaagi sa pag-angkon og kahibalo—ang siyentipekanhong paagi ug ang espirituhanong paagi, diin magsugod sa hugot nga pagtuo sa Dios ug pagsalig sa mga kasulatan, sa dinasig nga pagtudlo, ug sa personal nga pagpadayag. Walay panagsumpaki tali sa kahibalo nga naangkon pinaagi niining lain-laing mga pamaagi tungod kay ang Dios, ang atong labing gamhanan nga Amahan sa Kahangturan, nasayud sa tanang kamatuoran ug nagdasig kanato sa pagkat-on pinaagi niini.
Mga panagna sa ulahing mga adlaw nanagna sa dako nga oposisyon ngadto sa dinasig nga kamatuoran ug lihok. Ang pipila niini nga mga panagna kabahin sa mga anti-Kristo, ug ang uban naghisgot sa gamhanan ug salawayon nga simbahan.
Anti-Kristo
Si Apostol Juan migamit sa pulong nga anti-Kristo sa paghulagway sa usa ka tawo kinsa “dili moangkon sa Amahan ug Anak” (1 Juan 2:22). Karon kadtong molimud nga dunay Dios gitawag nga mga ateista. Pipila niini nagbiay-biay sa hugot nga pagtuo niadtong kinsa nagtuo sa unsay dili mahimong mapamatud-an, gani ingon nga sila agresibong molimud sa diosnon nga kinabuhi nga dili nila ikapanghimakak.
Kita nangandam sa ingon nga mga pagpanglimud ngadto sa Dios pinaagi sa istorya sa Basahon ni Mormon sa usa ka tawo nga ginganlan og Korihor. Sa mga pulong nga susama sa labing dili matuohon nga mga sinulat sa atong panahon, si Korihor, kaduha gitawag og “Anti-Kristo” (Alma 30:6, 12), mitudlo:
“Kamo dili masayud sa mga butang nga kamo dili makakita; busa kamo dili masayud nga dunay usa ka Kristo.
“Kamo naglantaw ug nag-ingon nga kamo nakakita og usa ka kapasayloan sa inyong mga sala. Apan tan-awa, kini mao ang sangputanan sa usa ka nagsalimoang nga hunahuna; ug kini nga pagkabuang sa inyong mga hunahuna moabut tungod sa mga tradisyon sa inyong mga amahan, nga midala kaninyo ngadto sa usa ka tinuohan sa mga butang nga dili mao” (Alma 30:15–16).
Si Korihor mipahayag usab “nga walay pag-ula nga gihimo alang sa mga sala sa mga tawo.” Ang iyang deskripsyon sa sangputanan sa iyang pagsalikway sa ideya sa sala ug sa usa ka Manluluwas susama kaayo sa pagtuo sa kadaghanan sa atong panahon: “Ang matag tawo makasinati niini nga kinabuhi sumala sa panglihok sa tawo; busa matag tawo mouswag sumala sa iyang kinaadman, ug nga ang matag tawo makadaug sumala sa iyang kusog; ug bisan unsa ang buhaton sa tawo dili kalapasan” (Alma 30:17; emphasis gidugang).
Moral Relativism
Karon atong gitawag ang pilosopiya ni Korihor nga moral relativism. Duha ka mga tigpaniid naghulagway niana nga pilosopiya sama sa mosunod: “Kon kalabut sa moral nga mga isyu walay husto o sayop nga mga tubag, walay dili angay o angay nga mga paghukom, ug walay resonable o rasyonal nga mga paagi diin makahimo og moral nga kalainan nga magamit sa matag panahon, sa matag dapit, ug sa matag tawo.”2
Mao kini ang pagtuo nga gigamit sa kadaghanan sa mga inila nga media ug sa pagtubag sa pagpamugos sa kaedad. “Biyai ang karaang mga lagda. Buhata unsay imong gibati nga maayo. Walay tulubagon lapas sa unsay gipahamtang sa balaod sa tawo o wala pag-uyon sa publiko niadtong madakpan.” Luyo sa mao nga mga ideya mao ang pagtuo nga walay Dios o, kon duna man, Siya wala mohatag og mga sugo nga magamit nato karon.
Secular Humanism
Ang pagsalikway sa dili maprobahan nga Dios ug ang paglimud sa matarung ug sayop mao ang labing makadani sa kalibutan sa taas og edukasyon. Ang secular humanism, usa ka kategoriya sa humanism nga tingali ginganlan niini tungod kay duol ra kaayo sa secularism, gituyo o wala tuyoa nga nahulma diha sa mga pagtulun-an sa mga sakop sa faculty sa daghang mga kolehiyo ug mga unibersidad.
Alang sa relihiyosong mga tawo, ang wala mauyuni nga elemento sa lain-laing mga pilosopiya sa humanism mao ang ilang pagsalikway nga dunay Dios ug ang ilang paglimud sa moral nga mga kamatuoran nga gibase sa Iyang mga sugo. Sa ingon, ang 1973 Humanist Manifesto misalikway sa “tradisyonal nga moral nga lagda” ug “tradisyonal nga kahigpit o kaestrikto sa mga relihiyon nga nagpahimutang sa Dios, ritwal, o doktrina labaw sa mga panginahanglan ug kasinatian sa tawo.” Dugang kining namahayag, “Kita walay madiskobrehan nga balaang katuyoan … alang sa matang sa tawo. Ang mga tawo maoy responsable kon unsa kita o maunsa kita sa umaabut. Walay dios nga moluwas nato; kinahanglang luwason nato ang atong kaugalingon.”3
Siyempre, ang mga sumusunod sa humanism, nga gitawag nga mga humanist, nakahimo og daghang positibong kontribusyon. Sama pananglit, nagsuporta sila sa demokrasya, sa mga katungod sa tawo, ug materyal nga kauswagan. Basta kining mga kalamboan dili mosalikway sa mga tumutuo, ang atong isyu sa mga humanist mao ang ilang pagsalikway sa balaan nga awtoridad ug mga mithi.
Sama sa gisulat ni kanhi propesor sa pilosopiya sa BYU si propesor Chauncey Riddle, “Ang humanism makahimo sa tawo nga dios, ang gamhanan nga binuhat, ug ang edukado nga hunahuna sa tawo mahimong tighukom sa tanan nga tinuod, maayo ug matahum.” Siya usab nagpahinumdom nato nga ang humanism “gipaboran sa mga tigbalita sa kalibutan karon tungod kay kadaghanan sa mga tawo nga tigsulat, tigmantala, mga eskolar ug media mga humanist.”4
Daghan kinsa naglimud o nagduha-duha nga dunay Dios tingali mosalikway sa pilosopiya sa moral relativism. Ilang makita ang ilang kaugalingon nga dunay ilang kaugalingong mga sumbanan sa matarung ug sayop, bisan og ang hingpit nga mga sumbanan nga dili pinasikad sa pagtuo sa Dios lisud ipasabut. Ang mga secular humanist, kinsa pormal nga misalikway sa “tradisyonal nga relihiyusong moralidad” ug nagpahayag sa ilang pagsalig sa “mga pagsulay sa siyentipikanhong ebidensya”,5 ingon og pagtuman sa mga panagna sa Basahon ni Mormon niadtong “kinsa nagpuyo nga walay Dios dinhi sa kalibutan” (Mosiah 27:31).
Ang Dako ug Salawayon nga Simbahan ug ubang mga “Simbahan”
Ang mga panagna sa Basahon ni Mormon naghulagway sa “gamhanan ug salawayon nga simbahan sa tanan nga yuta, kansang magtutukod mao ang yawa” (1 Nephi 14:17). Kini nga “simbahan” gipanagna nga adunay “kamandoan ibabaw sa tibuok yuta, taliwala sa tanan nga mga kanasuran, mga kaliwatan, mga pinulongan, ug mga katawhan” (1 Nephi 14:11). Gitawag nga “labing salawayon labaw sa tanan nga mga simbahan”, kini nga simbahan usab giingon nga ganahan sa “pagdayeg sa kalibutan” sa pagdala “sa mga santos sa Dios … ngadto sa pagkabihag” (1 Nephi 13:5, 9).
Tungod kay walay relihiyon—Kristyano man o dili—nga dunay “kamandoan” sa tanang mga nasud sa yuta o kalagmitan sa pagdala sa tanang mga santos sa Dios ngadto sa “pagkabihag,” kining dako ug salawayon nga simbahan mas malukpanon ug mikatap kay sa usa lang ka “simbahan,” sama sa atong pagsabut niana nga pulong karon. Mao kini ang bisan unsa nga mga pilosopiya o organisasyon nga supak sa pagtuo sa Dios. Ug ang “pagkabihag” diin maoy gitinguha niini nga “simbahan” nga dad-on ang mga santos dili kaayo pisikal pagkapriso kon dili pagkabihag sa sayop nga mga ideya.
Si Nephi giingnan pinaagi sa pagpadayag nga duna lang “duha ka mga simbahan”: “ang simbahan sa Kordero sa Dios” ug “ang simbahan sa yawa” (1 Nephi 14:10; tan-awa usab sa 13:4–6). Kini nga deskripsyon nagsugyot sa kalainan tali niadtong kinsa motuo sa Dios ug magtinguha sa pagserbisyo Kaniya sumala sa ilang labing maayo nga panabut ug niadtong kinsa mosalikway nga dunay Dios (tan-awa sa 1 Nephi 14:10).
Uban pang mga pagtulun-an sa Basahon ni Mormon naggamit usab sa pulong nga simbahan sa pagpakita og pagtuo o sa dili pagtuo sa Dios. Ang katapusang mga kapitulo sa 2 Nephi nanagna nga sa katapusang mga adlaw ang mga Hentil motukod og “daghan nga mga simbahan” nga “[mo]paubos sa gahum ug sa mga milagro sa Dios, ug nagwali ngadto sa ilang mga kaugalingon sa ilang kaugalingon nga kaalam ug sa ilang kaugalingon nga kinaadman, nga sila unta makaangkon og mga bahandi ug manlupig diha sa mga kabus” (2 Nephi 26:20). Nagsulti sila sa “mga simbahan nga gitukod, ug dili ngadto sa Ginoo” (2 Nephi 28:3), nga “motudlo uban sa ilang kinaadman” ug “molimud sa gahum sa Dios” (2 Nephi 28:4, 5). Sila “moingon ngadto sa mga katawhan: Patalinghug ngari kanamo, ug paminaw kamo sa among lagda; kay tan-awa walay Dios karon” (2 Nephi 28:5).
Sa pagpangalagad sa Manluluwas sa mga Nephite, Siya mipasidaan batok sa usa ka simbahan nga wala “natukod sa akong ebanghelyo, [apan] natukod diha sa mga buhat sa mga tawo, o diha sa mga buhat sa yawa” (3 Nephi 27: 11; tan-awa usab sa pagtulun-an mahitungod sa “dako ug lapad nga gambalay” sa 1 Nephi 8:26–33; 11:35; ug 12:18). Kini nga pasidaan dili limitado sa relihiyoso nga mga organisasyon. Sa mga kahimtang sa atong panahon, sila naglakip sa daghang sekular nga mga pilosopiya ug mga kalihokan.
III.
Daghang mga tawo kinsa nagtuo sa Dios ug sa matarung ug sayop nga anaa tungod sa Iyang mga sugo makasinati og pagbiay-biay ug pagbugal-bugal gikan sa kalibutanon nga mga pagtulun-an ug sa paglimud sa Dios nga mahitabo sa daghang mga organisasyon, lakip ang mga institusyon sa edukasyon ug sa media. Ang maong gipanagna nga mga hagit giatubang sa nagkagamay nga gidaghanon sa mahadlukon sa Dios nga mga tawo nga nakigbahin sa atong pagtuo sa Dios ug sa matarung ug sayop nga anaa tungod sa Iyang mga sugo. Gibalik ra niini ang unsay diha na sa panahon sa Manluluwas.
Bisan kon kita “ginasakit sa tanang paagi”, kita “wala kawad-i sa paglaum” (2 Mga Taga-Corinto 4:8). Nasayud kita nga ang atong espirituhanong pagtubo nagkinahanglan og “katugbang sa tanan nga mga butang” (2 Nephi 2:11). Nasayud usab kita nga ang Ginoo “nakakita nga angay ang pagpanton sa iyang mga katawhan; oo, siya misulay sa ilang pailub ug sa ilang hugot nga pagtuo” (Mosiah 23:21). Apan ang mga kasulatan nagtudlo usab nga Siya moluwas niadtong kinsa mobutang sa ilang pagsalig diha Kaniya (tan-awa sa 1 Samuel 17:37, 45–46; Salmo 34:22; Mga Proverbio 3:5–6; Alma 36:27; 38:5).
Mosugyot karon ako og tulo ka mga matang sa mga butang nga atong mabuhat agig tubag sa mga kahimtang karon, nga magsugod sa unsay sayon. Kining tanan nagtubag sa pagtulun-an sa Basahon ni Mormon nga kita kinahanglan nga “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit nga [kita] mahimo nga maanaa, bisan hangtud sa kamatayon” (Mosiah 18:9).
Pasidunggi ang Pangalan ug Impluwensya sa Dios
Gitudloan kita sa “pagtuo diha kang Kristo, ug dili molimud kaniya” (2 Nephi 25:29); sa “paghunahuna [ngadto ni Jesukristo] sa matag hunahuna; ayaw pagduha-duha, ayaw kahadlok” (D&P 6:36); ug “naghisgot kang Kristo,” “nalipay diha kang Kristo”, ug “nagsangyaw kang Kristo” (2 Nephi 25:26). Duha ka mga paagi nga kita makahimo niini mao ang diha sa atong pribado nga mga pag-ampo ug sa atong personal nga pagtimbaya.
Sa atong pribado ug pamilya nga pag-ampo, kita kinahanglan nga mohangyo sa Dios sa pagtabang nato ug sa atong mga silingan ug mga lider nga makaila sa Dios ang atong Tiglalang ug sa matarung ug sayop nga giestablisar pinaagi sa Iyang mga sugo. Kinahanglan nga buhaton nato kini alang sa kaayohan sa Iyang mga anak bisan asa.
Kinahanglan usab nga kita mopahayag sa atong kaugalingon batok sa bag-ong kalihokan sa paglikay sa relihiyuso nga mga pakisayran bisan sa pribado nga komunikasyon. Sa bag-ong katuigan ang paglakip sa relihiyuso nga mga simbolo ug may balaang pagtahud nga mga pulong sa mga pagtimbaya sa Pasko ug sa mga kard sa simpatiya hapit na nawala. Kon kita mohimo og mga pagpili kabahin niini nga mga matang sa komunikasyon, kinahanglang dili kita moapil sa pagpapas sa sagradong mga pahinumdom gikan sa atong personal nga komunikasyon. Isip mga tumutuo, duna kitay katungdanan sa pagpreserbar sa pangalan ug impluwensya sa Dios ug ni Kristo sa atong pag-istoryahanay, atong mga kinabuhi, ug sa atong kultura.
Publikong Pag-ila sa mga Panalangin sa Dios
Suportahi ang publikong pag-ila sa mga panalangin sa Dios. Kini nagtinguha sa pagpakigbatok sa nagkagamay nga paghisgot sa relihiyusong pagtuo ug sa Dios ug sa Iyang mga panalangin sa atong mga pakigpulong sa publiko. Itandi, pananglit, ang mga dokumento sa publiko karon ug pinulongan sa mga lider sa gobyerno sa Estados Unidos uban sa susama nga mga dokumento ug mga pulong sa mga lider atol sa unang duha ka mga siglo sa Amerika. Niana nga pagkatandi kamo adunay ebidensya sa tinuyo nga paningkamot sa pagpapas sa mga paghisgot sa Dios ug sa impluwensya sa relihiyon sa pagkatukod ug pagkapreserbar sa Amerika.
Unsay atong mahimo mahitungod niini? Una, makapakita kita sa matarung nga ehemplo sa atong pamilya ug mga pagtulun-an sa Simbahan pinaagi sa pag-ila sa mga panalangin sa Ginoo sa atong mga kinabuhi ug sa atong mga nasud. Sa pagbuhat niini “diha sa kaalam ug kahusay” (Mosiah 4:27), kita kinahanglan dili molimud nga ang atong nasud naglakip ug napanalanginan pinaagi sa mga lumulupyo nga Judeo, Muslim, ug uban pang dili Kristyano nga tinuohan, ingon man sa mga ateista. Apan kita kinahanglan mamulong sa kamatuoran nga, sama pananglit, ang Estados Unidos natukod sa mga tawo ug mga lider kinsa kadaghanan mga Kristyano ug kinsa mihulma sa mga baruganan sa ilang hugot nga pagtuo diha sa Batakang Balaod, mga balaod, ug kultura sa nasud.6
Usa ka bag-ong artikulo ni Brother Clayton Christensen, propesor sa Harvard Business School ug usa ka kanhi Area Seventy, mi-insister nga relihiyon ang pundasyon sa demokrasya ug kauswagan. Nagpahinumdom siya nato nga ang demokrasya ug kapitalismo nagdepende sa tumang pagkamasulundon sa walay pugsanay ug nga kini kinahanglanon nagdepende sa relihiyon nga nagtudlo sa mga sukaranan sama sa “ang kaangayan sa mga katawhan, ang kaimportante sa pagtahud sa kabtangan sa uban, ug sa personal nga pagkamatinuoron ug kaligdong.” Ang secularism, nga nagtinguha sa pagpuli sa relihiyon nga gibase diha sa pagtuo sa Dios, walay gahum o programa aron makahatag sa unsay gitawag ni Brother Christensen nga “ang panginahanglan nga pundasyon sa tumang pagkamasulundon sa walay pagpugos.”7
Pakigbisog alang sa Gawasnong Pagsunod sa Relihiyon
Pakigbisog alang sa gawasnong pagsunod sa relihiyon. Mas lisud kini tungod kay nagkinahanglan kini og pagtinabangay sa mga tumutuo sa nagkalain-laing mga tinuohan. Diin ang gigarantiyahan sa gobyerno nga gawasnon nga pagsunod sa relihiyon anaa, kita kinahanglang moaghat sa mga opisyales sa gobyerno sa pagtahud niadto nga mga garantiya. Dinhi akong ipasabut ang duha lamang ka mga ehemplo sa mga kabalaka karon.
Ang una naglakip sa pampublikong pag-ampo. Ang pag-ampo mahitabo kon ang mga tawo makigsulti sa Balaan nga Binuhat, bisan unsay ilang konsepto sa Dios ug bisan unsay ilang itawag Kaniya. Bisan unsa pay unod sa pag-ampo, nga magkalahi sumala sa pagtuo sa usa kinsa nag-ampo, kon ang usa ka pag-ampo gihalad diha sa pampublikong dapit, importante kini isip usa ka pagpamatuod o simbolo sa usa ka grupo sa komon nga panginahanglan ug balaang pagtahud alang sa Dios. Kini mao ang matang sa mga pag-ampo nga gihalad sa sinugdanan sa mga lehislatibo nga kapundokan o mga miting sa konseho ug sa mga panumpa nga ipahigayon sa dili pa ang pagpamatuod sa korte o pag-instalar og opisyal. Bisan unsa pa ang konsepto sa Dios sa gitakda nga moampo ug bisan unsay iyang relihiyoso nga mga pagtuo o pinulongan sa pag-ampo, ako naglaum nga kita mosaksi sa atong pagtuo sa Dios pinaagi sa simbolo sa pag-ampo, nga maalamon ug mainantusong gipahigayon. Angay kana nga ipakigbisog.
Ikaduha, kita kinahanglan nga abtik nga mosupak sa mga opisyales sa gobyerno ug mga manlalaban sa pampublikong polisiya nga mosugyot nga ang gawasnong pagsunod sa relihiyon limitado sa “kagawasan sa pagsimba.” Sa Estados Unidos, pananglitan, ang kasiguroan sa “gawasnong pagsunod” nanalipod sa katungod nga mogawas gikan sa atong pribadong mga kalihokan, lakip sa mga simbahan, mga sinagoga, ug mga mosque, sa pagbuhat sa atong mga pagtuo, ubos lamang sa lehitimong mga gahum sa gobyerno nga gikinahanglan aron sa pagpanalipod sa panglawas sa publiko, kahilwasan, ug kaayohan. Ang gawasnong pagsunod sigurado gayud nga manalipod sa relihiyoso nga mga lumulupyo sa pagbuhat sa ilang mga gituohan sa pampublikong pagdebate sa polisiya ug sa mga pagbotar nga gihimo isip mga lumulupyo o isip magbabalaod.
Sama sa gisulti ni Elder Jeffrey R. Holland sa Korum sa Napulog Duha ka mga Apostoles sa usa ka gamhanan nga pakigpulong sa Kristyanong mga lider sa tibuok nasud, kita nga mga Santos sa Ulahing mga Adlaw “matinguhaon nga moapil … sa paggarantiya sa kagawasan sa relihiyon nga motugot kanato nga mamulong [ug sa pagbuhat] kabahin sa mga butang sumala sa Kristyanong konsyensya kabahin sa problema sa katilingban sa atong panahon.”8
Kinahanglan kitang mosuporta sa panaghugpong sa mga lider sa relihiyon ug sa mga katawhan nga mahadlukon sa Dios kinsa nagkahiusa sa pagpanalipod sa tradisyonal nga kultura sa pagtuo sa Dios ug sa pag-ila sa Iyang mga panalangin.
IV.
Sa pagtapos, akong isugyot sa tanang mga tumutuo bisan asa nga kita adunay usa ka ligdong nga relihiyusong katungdanan nga mahimong mga saksi sa Dios. Kinahanglan gayud kita nga mopamatuod sa atong mga relihiyusong pagtuo, maghiusa sa pag-insister sa atong katungod sa gawasnon nga pagsunod sa atong mga relihiyon, ug pagtahud sa ilang mahinungdanon nga mga tahas sa pag-establisar ug pagpreserbar ug pagpauswag sa mga nasud.
Mopahinumdom ko sa akong isig ka Kristyano sa ligdong nga pagtulun-an ni Apostol Juan:
“Ug ang matag usa ka espiritu nga wala magaila kang Jesus, kini dili iya sa Dios. Kini mao ang espiritu sa antikristo nga inyong nadungog nga moanhi, ug kini siya ania na sa kalibutan” (1 Juan 4:3).
Ang sangputanan sa atong pagkapakyas sa pagsulti isip mga saksi sa Dios klaro diha sa pagtulun-an sa atong Manluluwas mahitungod sa asin nga nawad-an sa iyang lami. Isagol sa ubang mga butang—sama nga kita mahimong malayaw pinaagi sa mga mithi sa kalibutan—kini mawad-an sa talagsaong impluwensya nga nasagulan sa kadaghanan. Sama sa gitudlo sa Manluluwas, “Kini dili na gayud magpulos sa bisan unsa, kondili angay na lang kining isalibay sa gawas aron tunobtunoban sa mga tawo” (Mateo 5:13).
Isip “asin sa yuta,” (Mateo 5:13), kita nga mga Santos sa Ulahing mga Adlaw kinahanglan ipabilin nato ang atong lami pinaagi sa pagsunod sa atong relihiyon ug pinaagi sa pagbarug sa atong mga kaugalingon isip mga saksi sa Dios. Kon ato kining buhaton, atong gihiusa ang atong kaugalingon uban niadtong kinsa makatagamtam sa katapusang kadaugan sa kamatuoran ug pagkamatarung, kon ang “tanang tuhod magaluhod … ug ang tanang dila magadayeg sa Dios” (Mga Taga-Roma 14:11) ug sa Ginoong Jesukristo, kang kinsa kita nagsimba ug kansang mga sulugoon mao kita.