Pagbaton og Kaisug sa Pagpakigbahin sa Ebanghelyo
Mga paghulagway pinaagi ni Michael Mullan
Nagkinahanglan og kaisug ang pagpakigbahin sa ebanghelyo ngadto sa usa ka estranghero. Panguntan-a lang ang usa ka bag-ong full-time nga misyonaryo. Usahay magkinahanglan pa og dugang kaisug sa pagpangutana sa inyong mga higala kon sila ganahan ba nga masayud kabahin sa Simbahan, sa Basahon ni Mormon, o sa atong mga pagtuo.
Maghunahuna mo: Unsa kaha kon dili sila interesado? Unsa kaha kon sila malain? Unsa kaha kon ila ko nga kataw-an? Unsa kaha kon sila masilag nako ug dili na gustong makigkita kanako pag-usab?
Ayaw og kabalaka. Dili gyud kana mahitabo. Ang inyong mga higala posibling mosulti lang, “Dili, salamat na lang.” Ayaw katingala kon adunay motubag, “Sige, sultii pa ko og dugang”—ilabi na kon kamo nagsunod sa ebanghelyo.
Si Elder M. Russell Ballard sa Korum sa Napulog Duha ka mga Apostoles miingon: “Mga miyembro kita sa gipahiuli nga Simbahan ni Jesukristo, nga gihatagan og gahum ug gipadala Mismo sa Ginoo sa pagpangita, pag-amuma, ug pagdala ngadto sa Iyang Simbahan, kadtong kinsa nangita sa kamatuoran.”
Sumala nianang panglantaw, ang pagpakigbahin sa ebanghelyo “yano ra ug klaro.” Apan, miangkon si Elder Ballard, “ang misyonaryo nga buhat mahagiton ug usahay makahadlok.”
Unsaon nato pagbuntog nianang kahadlok? Si Elder Ballard misugyot og tulo ka paagi:
Una, pag-ampo sa inyong kaugalingon ug sa inyong pamilya nga ang Ginoo motabang kaninyo nga makakita og paagi sa pagpakigbahin sa ebanghelyo. (Tan-awa ang sidebar kon unsay gibuhat sa usa ka batan-ong babaye sa Brazil.) Usab, hangyoa ang Ginoo sa paggiya kaninyo ngadto niadtong andam na.
Ikaduha, mahimong ehemplo. Sa kalibutan nga nagkaubos ang mga sumbanan, ang inyong mga higala makamatikod sa inyong kahayag. Ang inyong personal nga katakus mohatag kaninyo og kaisug ug espiritwal nga gahum.
Ikatulo, gamita ang inyong pagtuo ug salig sa Ginoo ug kanunay pakita og gugma alang sa uban.
“Ang ubang mga miyembro moingon, ‘mahadlok ako nga mopakigbahin sa ebanghelyo tungod kay ako makasilo unya og tawo,’” miingon si Elder Ballard. “Ang kasinatian nagpakita nga ang mga tawo dili masilo kon ang pagpakigbahin giaghat sa espiritu sa gugma ug pagpakabana. Sa unsang paagi masilo ang uban kon kita moingon: ‘Ganahan kaayo ko sa paagi sa simbahan sa pagtabang nako’ ug dayon modugang bisan unsay igiya sa Espiritu”?1
Ang buluhaton sa pagpakigbahin sa ebanghelyo anaa sa tanang miyembro sa Simbahan—lakip ninyo. Busa pagmaisugon ug tuguti ang Ginoo sa pagpanalangin sa inyong mga paningkamot.