Para sa Gagmayng mga Bata
Pagkatulog sa Sabado ug mga Pahiyom sa Dominggo
Ang tagsulat nagpuyo sa Utah, USA.
“Kanunay ko nga malipayon kon mosimba ko” (Children’s Songbook, 157).
Si Mara ganahan nga makapahiyom sa mga tawo. Siya makapahiyom sa iyang magtutudlo sa eskwelahan kon iisa niya iyang kamot aron mangutana. Siya makapahiyom sa iyang igsoon, si Marcella, kon siya mosulti og maayong mga butang ngadto kaniya.
Dayon si Mara mopahiyom usab. Nindot ang pagbati nga makatabang sa ubang tawo nga malipay.
Apan adunay usa ka panahon kada semana nga si Mara maglisud gyud sa pagpahiyom. Kadto nga panahon mao ang sayo sa Dominggo sa buntag. Kana ang panahon nga si Mara ug Marcella kapuyon pag-ayo. Ang pagdali-dali aron mangandam para mosimba nakapakulismaot nila. Dayon kapoy kaayo nga maglakaw padulong sa simbahan. Sobra kini sa usa ka milya! Si Mara ug Marcella kanunay maulahi. Dili sila makatambong sa unang bahin sa Primary.
“Mingawon mi ninyo kon dili mo makaabut sa saktong oras dinhi,” kausa miingon si Sister Lima. Siya ang presidente sa Primary sa ilang ward sa Brazil.
Si Mara nasayud nga kinahanglan niyang moabut sa saktong oras sa pagsimba. Apan unsaon? Dayon nakahunahuna og ideya si Mara. Sa sunod Sabado sa gabii, si Mara mihukom nga mobuhat og bag-o nga butang.
Imbis nga mag-snacks sa dili pa matulog human og panihapon, iyang gisipilyohan iyang ngipon. Kasagaran si Mama kinahanglang mopahinumdom sa mga babaye nga pawungon ang TV ug matulog. Bisan pa niini sila magdula ug maghunghungay nga nagtabon hangtud sa gabii na kaayo. Usahay dugay kaayo silang matulog nga maglisud sila og buka sa ilang mata. Kinahanglan nilang maglihok-lihok aron dili sila makatulog.
Karong gabhiuna si Mara nag-pajama ug mihigda dayon sa higdaanan. Wala na gani siya pahinumdumi ni Mama. Nagsugod siya sa pagtan-aw sa mga litrato sa atubangan sa iyang Basahon ni Mormon.
“Unsay imong gibuhat?” Nangutana si Marcella.
“Usa ka pagsulay,” miingon si Mara. Siya puno sa malipayong hunahuna. Dugang pa siya mibati na nga katulugon.
Ang sunod nasayran ni Mara, ang adlaw misidlak na sa iyang bintana. Hapit na ang oras nga mangandam para mosimba. Imbis nga mobati og dili maayo, nindot kaayo ang pamati ni Mara. Ang iyang ulo wala malipong. Ang iyang lawas wala gikapoy.
Miabut siya sa Primary nga wala pa ang ubang mga lider.
“Salamat sa imong maayong ehemplo para sa ubang mga bata,” miingon si Sister Lima.
Karon turno na ni Mara nga mopahiyom. Siya mihukom nga kanunay matulog og sayo ma-Sabado. Nianang paagiha siya makapahiyom sa tibuok Dominggo.