Diha-diha nga Pagsabut

Base sa usa ka interbyu ni Richard M. Romney

Mga Magasin sa Simbahan

Ako si Magnolia. Mosimba ko sa ward diin nagkinatsila kami. Usa ka adlaw si Mia misulod sa akong klase sa Primary. Iningles ra ang iyang masulti. Gusto kong motabang ni Mia nga mobati nga giabi-abi, busa mihukom ako sa pagtabang kaniya. Ako ang mahimo niyang tighubad!

Ang usa ka tighubad mohubad sa mga pulong nga gisulti sa usa ka tawo ngadto sa laing pinulongan.

Pag-apas

Sa sinugdanan lisud ang pag-apas kon ako mohubad alang ni Mia. Dayon ang mga magtutudlo mihinay aron paghatag nako og panahon. Kaming tanan mibati og nindot nga kami makatabang ni Mia.

Daghan og Kapareha

Sa wala madugay kami gibunyagan ug nakumpirmahan. Kaming duha ganahan og musika, ilabi na sa mga himno ug mga kanta sa Primary. Kaming duha ganahan sa family home evening. Ug kaming duha ganahan nga mobasa sa mga istorya sa Liahona.

Gihung-hong nga Tabang

Ako si Mia. Ang akong mga ginikanan Kinatsila ang sinultihan, busa miadto kami sa ward nga nagsulti og Kinatsila. Wala ko makasabut unsay gisulti sa mga tawo. Nakakita si Magnolia nga ako nahigawad. Mitapad siya kanako ug mihung-hong og Iningles sa akong dunggan.

Buotang mga Higala

Pagkahuman sa Primary, nangutana ko ni Magnolia kon mahimo ba nako siyang higala. Miingon siya og oo. Gikan nianang higayuna, si Magnolia nahimo nakong higala ug akong tighubad. Mitabang siya nako nga makahigala sa uban usab.

Buhata Unsay Buhaton ni Jesus

Ang tanan makatabang sa mga tawo, sama ni Magnolia nga mitabang nako. Pag-ampo. Ang Langitnong Amahan motabang ninyo nga makahibalo kinsa ang tabangan. Sama kini sa kanta, “If The Savior Stood Beside Me” (Friend, Okt. 1993, 14). Makasulay kita sa pagbuhat unsay gusto ni Jesus nga atong buhaton.

Unsaon Ninyo sa Pagtabang

Mga Tip gikan ni Mia ug Magnolia:

Kon dunay:

• Bag-o sa simbahan o sa eskwelahan, tabangi siya nga mobati nga giabi-abi.

• Dili moadto sa simbahan kanunay, dapita siya nga mouban ninyo.

• Giaway, labani siya. Sultihi ang imong magtutudlo.

• Daw nagsubo, dapita siya sa pag-apil ninyo.

• Nagkinahanglan og higala, hangyoa siya nga mahimo ninyong higala. Uban sa pagtugot sa inyong mga ginikanan, dapita siya sa pagdula.

Kon kamo makasulti og sobra sa usa ka pinulongan, tanyag sa paghubad.

Tabangi Kami!

Unsaon ninyo sa pagpakita sa inyong gugma pinaagi sa pagtabang sa uban? Subaya sa pag-drowing ang inyong kamot ug padad-i kami sa inyong istorya ug litrato, uban sa pagtugot sa inyong ginikanan. Bisitaha ang liahona.lds.org o email [e-mail].