Mga Pagpamalandong
Lolo, Amahan
Paghulagway pinaagi ni Bjorn Thorkelson
Hunahunaa ang 3,000 ka mga misyonaryo nga nagpundok sa dakong kwarto. Dos mil nuybe syintos nubentay nuybe kanila madasigong nag-istorya ug nagtan-aw sa samang dapit sa kwarto. Ang uban kanila nagkinto. Ang uban nangambak para daklit nga makakita ibabaw niadtong mga nagkinto. Ang uban nagpatong sa mga lingkuranang mapilo-pilo. Usa ka misyonaryo naglingkod sa lingkuranang mapilo-pilo, ang iyang mga siko gitukod sa mga tuhod, nagkaput ang mga kamot, nagdungo ang ulo.
Dili gyud tingali ingon niana ang nahitabo, apan mao kana ang akong nahinumduman. Mao kadto ang akong gibati. Ako kadto nga misyonaryo.
Kon inyong gihunahuna ang eksena, siguro naghunahuna mo nga ako nag-inusara o nagguol. Sa tinuoray, nasinati nako ang usa sa pinakamalipayong panghitabo sa akong kinabuhi—usa ka higayon nga gibalik-balik nako og handum sukad niadto.
Anaa ko sa missionary training center sa Provo, Utah, nag-andam nga moserbisyo isip full-time nga misyonaryo sa Ecuador Quito Mission. Si Presidente Gordon B. Hinckley (1910–2008), kinsa Unang Magtatambag sa Unang Kapangulohan niining higayona, miadto aron mamulong sa tanang misyonaryo sa MTC.
Pagkahuman na sa miting nga misugod ang kaguliyang. Nakamatikod ko nga ang mga tawo wala maglinya padulong sa mga pultahan, busa nangutana ko sa laing elder kon unsay nahitabo.
“Ang apo ni Presidente Hinckley ania sa MTC,” miingon siya, “ug si Presidente Hinckley mibiya sa stand aron mogakos kaniya!”
Uban niana nga eksplinasyon, ang elder mipatong sa iyang lingkuranan aron mas klarong makakita, misyagit, “Wow! Dili ba nindot kaayo nga mahimo si Presidente Hinckley isip lolo?”
Gihigugma ug gitahud nako si Presidente Hinckley, ug ako nadasig sa iyang mensahe nianang adlawa. Apan nianang higayona nakahunahuna ko og usa ka butang nga nakapabilin nakong maglingkod kaysa mopatong. Taliwala niining mga nagmaya, naglingkod ko ug naghunahuna, “Siguradong nindot kaayo nga mahimong lolo si Presidente Hinckley. Apan dili nako ibaylo ang akong Lolo Felt o Lolo West para niya.” Mihangad ko ug mibati sa kainit sa dakong pagpasalamat samtang namalandong ko sa akong kabilin, sa akong pamilya.
Dayon nakahunahuna ko og lain, mas gamhanan kaysa una: “Gawas pa, anak ko sa Dios.” Nasayud ko nga ako, apo sa usa ka dentista ug factory supervisor, sama ra og bili sa usa ka apo sa propeta. Ngano? Kaming duha adunay sama nga Amahan sa Langit.
Ang ubang 2,999 ka misyonaryo sa wala madugay milakaw padulong sa mga pultahan niadtong dako nga kwarto. Miuban ko kanila, mas andam sa pagserbisyo sa Ginoo kaysa kaniadto.