Mensahe sa Unang Kapangulohan
Giliyokan sa Iyang Malumo nga mga Bukton
Ni Presidente Dieter F. Uchtdorf
Ikaduhang Magtatambag sa Unang Kapangulohan
The Agony in the Garden [Ang Paghingutas diha sa Tanaman], ni Frans Schwarz
Sama sa uban, kanunay ko nga madasig sa maanindot nga mga buhat sa art ug musika. Kausa sa dihang nagbarug ko sa atubangan sa nindot kaayong painting nga hinimo sa usa ka Danish artist nga si Frans Schwarz nga giulohan og The Agony in the Garden [Ang Paghingutas diha sa Tanaman].1
Kining makapatandog nga painting naghulagway sa Manluluwas nga nagluhod diha sa Tanaman sa Getsemani. Samtang Siya nag-ampo, usa ka anghel nagbarug tapad Kaniya, nagliyok Kaniya sa malumong mga bukton, naghupay, balaanong nagtabang, ug nagsuporta.
Kon mas dugay kong mamalandong niining painting, ang akong kasingkasing ug hunahuna mas matandog sa dili mahulagway nga mga pagbati sa kalumo ug pasalamat. Akong mabati, sa daklit lang, kon unsa kahay bation nga maanaa sa dihang ang Manluluwas misugod sa Iyang talagsaong panapos nga buhat sa pagkamortal pinaagi sa Iyang pagdala sa mga sala sa kalibutan. Nahingangha ko sa walay katapusang gugma ug kalooy sa Amahan para sa Iyang mga anak. Nasanapan ko uban sa dakong pagpasalamat sa unsay gibuhat sa walay sala nga Anak para sa tanang katawhan ug kanako.
Ang Sakripisyo sa Anak sa Dios
Matag tuig niining higayona atong hinumduman ug pamalandungan ang gihimong sakripisyo ni Jesukristo sa tanang katawhan.
Ang gibuhat sa Manluluwas gikan sa Getsemani ngadto sa Golgota para kanato dili gayud nako hingpit nga masabtan. Iya Mismong gidala ang gibug-aton sa atong mga sala ug mibayad sa mahangturon ug gikinahanglang paglukat dili lang sa orihinal nga kalapasan ni Adan apan sa mga sala ug kalapasan usab sa binilyon nga mga kalag kinsa nabuhi. Kining mahangturon, sagradong sakripisyo nakapahimo “gani sa Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu” (D&P 19:18).
Nag-antus Siya alang kanako.
Nag-antus Siya alang kaninyo.
Naghingapin sa pagpasalamat ang akong kalag sa dihang namalandong ko sa bililhong kahulugan niining sakripisyo. Nakapahimo nakong mapainubsanon ang masayud nga ang tanan nga modawat niining gasa ug motanyag sa ilang kasingkasing ngadto Kaniya mapasaylo ug malimpyohan sa ilang mga sala, bisan unsa pa sila ka makasasala o kagrabe sa ilang palas-anon.
Kita mahimong walay sala ug maputli pag-usab. Kita matubos sa mahangturong sakripisyo sa atong pinalanggang Manluluwas.
Kinsa ang Mohupay Kanato?
Bisan tuod walay usa kanato ang makasinati sa kalawmon sa giantus sa atong Ginoo, kitang tanan adunay kaugalingong kalisud ug pait nga mga higayon—mga panahon diin ang atong kaguol ug kasubo maingon og mas sobra pa kaysa atong maagwanta. Adunay mga panahon diin ang gibug-aton ug pagmahay sa atong mga sala walay kaluoy nga mohasol gyud kanato.
Bisan pa, kon atong ihalad ang atong kasingkasing ngadto sa Ginoo nianang mga panahona, sigurado nga Siya masayud ug makasabut. Siya sa walay paghunahuna sa kaugalingon nag-antus para kanato diha sa tanaman ug sa krus dili gyud mobiya kanato karon. Siya molig-on, modasig, ug mopanalangin kanato. Siya moliyok kanato sa Iyang malumo nga mga bukton.
Siya mas labaw pa kaysa anghel ngari kanato.
Siya mohatag kanato og kahupayan, pag-ayo, paglaum, ug kapasayloan.
Kay Siya ang atong Manunubos.
Atong Tigluwas.
Atong maloloy-on nga Manluluwas ug atong bulahan nga Dios.