Ang Celestial nga Sapatos sa Akong Kompanyon

Michael Reid, Arizona, USA

Daghang tuig ang milabay, human og biya sa Provo Missionary Training Center, miabut ko sa Florida nga mibati nga andam ug naghinam-hinam nga magsugod sa mission field. Sa dihang akong nahimamat ang akong bag-ong kompanyon, kami adunay daghan nga mga interes nga managsama ug ang among panagkompanyon daw haum kaayo.

Hinoon, human sa pipila ka semana, nakamatikod ko og pipila ka kalahian. Sama pananglit, andam ko nga mag-tracting kada adlaw, apan ang akong kompanyon dili madasigon nga manuktok sa pultahan. Gani, bisan siya ang senior nga kompanyon, mipili siya nga dili kaayo mobuhat niini.

Nakamatikod usab ko nga ang akong kompanyon ingon og perming moistorya kabahin sa iyang kaugalingon. Ang iyang pamilya arangan, ug daghan siya og nasinati nga ako, gikan sa mas ubos nga kahimtang, wala makasinati.

Kining mga butanga misugod sa pagpalambo og dili komportabling pagbati ngari nako, hapit moabut sa punto sa kalagot. Ang pagbati og kalagot sa akong kompanyon nakaapekto nako sa espirituhanong paagi, ilabi na kon mosulay ko sa pagtudlo sa ebanghelyo. Ako kinahanglan nga adunay buhaton. Sa sinugdanan mikonsiderar ko sa pagpakig-istorya sa akong kompanyon ug yanong magpagawas sa tanan nakong kasagmuyo. Apan mipili ko og laing pamaagi.

Kada buntag ang akong kompanyon ug ako magpuli-puli sa pag-shower ug pagpangandam. Samtang naa siya sa shower, nakadesisyon ko nga sekretong moadto sa ubos nga bahin sa iyang higdaanan ug pasinawon ang iyang sapatos. Human sa dinaliang paglimpyo ug pagpasinaw niini, hinay-hinay nako nga ibalik ang sapatos kon asa kini gibutang. Ako kining gibuhat kada buntag sulod sa duha ka semana.

Niining higayona nakamatikod ko nga ang akong kalagot nagsugod og kawala. Samtang nagserbisyo ko sa akong kompanyon, nausab ang akong kasingkasing. Wala ko mosulti kaniya kabahin sa akong ginagmay nga pagserbisyo. Hinoon, usa ka adlaw, ang akong kompanyon misulti nga siya siguro napanalanginan og “celestial nga sapatos” kay dili gyud kini magkahugaw.

Nakakat-on ko og duha ka talagsaong leksyon gikan niining kasinatian. Una, ang tinuod nga problema anaa ra nako—bisan tuod ang hinungdan sa akong mga pagbati gikan sa gawas. Maayo ra ang akong kompanyon.

Ikaduha, nasayud ko nga kasagaran atong serbisyohan kadtong atong gihigugma. Apan wala ko makaamgo nga ang samang baruganan epektibo usab sa binali: kita mahigugma niadtong atong giserbisyohan.