Kalig-on nga lapas sa Atong Kaugalingon
Ni Elder David A. Bednar
Sa Korum sa Napulog Duha ka mga Apostoles
Gikan sa “Ang Pag-ula ug ang Panaw sa Pagka-mortal,” Liahona, Abril 2012, 12–19.
Ang makaabag nga gahum sa Pag-ula ni Jesukristo molig-on kanato sa pagbuhat ug pagkahimong maayo ug sa pagserbisyo nga lapas sa indibidwal natong tinguha ug natural nga kapasidad.
Nagtuo ko nga daghang mga miyembro sa Simbahan ang mas pamilyar sa kinaiyahan sa makatubos ug makalimpyo nga gahum sa Pag-ula kay sa makalig-on ug makaabag nga gahum. Usa ka butang ang pagkasayud nga si Jesukristo mianhi sa yuta aron mamatay alang kanato—kana usa ka mahinungdanon ug nag-unang mga baruganan sa doktrina ni Kristo. Apan kinahanglan usab kita nga mopasalamat nga ang Ginoo nagtinguha, pinaagi sa Iyang Pag-ula ug pinaagi sa gahum sa Espiritu Santo, nga mopuyo kanato—dili lamang sa pagtudlo kanato apan sa paghatag usab kanato og gahum.
Kadaghanan kanato nasayud nga kon kita nagbuhat og sayop nga mga butang, kita nagkinahanglan og tabang sa pagbuntog sa mga epekto sa sala diha sa atong mga kinabuhi. Ang Manluluwas mibayad sa bili ug mihimo niini nga posible alang kanato nga malimpyo pinaagi sa Iyang matubsanong gahum. Kadaghanan nato klaro nga nakasabut nga ang Pag-ula alang sa mga makasasala. Wala ko makasiguro, hinoon, nga kita nakahibalo ug nakasabut ba nga ang Pag-ula alang usab sa mga santos—alang sa buotang mga lalaki ug mga babaye kinsa masulundon, takus,ug mainampingon ug kinsa naningkamot nga mahimong mas maayo ug magserbisyo nga mas matinud-anon. Tingali kita nasayop nga nagtuo nga kinahanglang mopaingon gikan sa maayo ngadto sa mas maayo ug mahimong usa ka santo pinaagi lamang sa atong kaugalingong hugot nga deteminasyon, kabubut-on, ug disiplina ug uban sa atong klarong limitadong mga kapasidad.
Ang ebanghelyo sa Manluluwas dili lamang kay mahitungod sa paglikay sa kadautan sa atong kinabuhi; kini usab kabahin sa pagbuhat ug pagkahimong maayo. Ug ang Pag-ula naghatag og tabang nato sa pagbuntog ug paglikay sa dautan ug sa pagbuhat ug pagkahimong maayo. Ang tabang gikan sa Manluluwas anaa alang sa tibuok nga panaw sa pagka-mortal—gikan sa pagkadautan ngadto sa pagkamaayo ngadto sa mas maayo ug sa pag-usab sa atong kinaiya.
Ako wala magsugyot nga ang matubsanon ug makaabag nga mga gahum sa Pag-ula managbuwag ug managlahi sa usag-usa. Hinoon, kining duha ka dimensyon sa Pag-ula konektado ug nagkompleto sa usag usa; kining duha kinahanglan nga maglihok sa tanang ang-ang sa panaw sa kinabuhi. Ug importante sa mahangturon nga kitang tanan makaila nga kining duha ka importanting mga elemento sa panaw sa pagkamortal—ang pagsalikway sa kinaiyanhon nga pagkatawo ug mahimo nga usa ka santos, magbuntog sa dili maayo ug mahimong maayo—matuman pinaagi sa gahum sa Pag-ula. Ang indibiwal nga kabubut-on, kaugalingong determinasyon ug pagdasig, epektibo nga pagplano ug paghimo og mga tumong gikinahanglan apan sa katapusan dili igo sa atong madaugon nga pagkompleto niining mortal nga panaw. Sa tinuod, kinahanglan kitang mosalig sa “mga maayo nga buhat, kalooy, ug grasya sa Balaang Mesiyas” (2 Nephi 2:8).
Ang Grasya ug ang Makaabag nga Gahum sa Pag-ula
Sa LDS Bible Dictionary atong makat-unan nga ang pulong nga grasya gigamit kanunay sa mga kasulatan nga nagpasabut sa makaabag nga gahum:
Ang “[Grasya mao] ang pulong nga gibalik-balik kanunay diha sa Bag-ong Tugon, ilabi na diha sa mga sinulat ni Pablo. Ang importante nga ideya sa pulong mao ang balaang paagi sa tabang o kusog, gihatag pinaagi sa buhong nga kalooy ug gugma ni Jesukristo.
“Pinaagi sa grasya ni Ginoong Jesus, nahimong posible pinaagi sa Iyang maulaon nga sakripisyo, nga ang tawo mabuhi ngadto sa pagka-imortal, ang matag tawo makadawat sa iyang lawas gikan sa lubnganan sa usa ka kahimtang sa walay katapusan nga kinabuhi. Pinaagi usab kini sa grasya sa Ginoo nga ang mga indibidwal, pinaagi sa hugot nga pagtuo sa pag-ula ni Jesukristo ug paghinulsol sa ilang mga sala, makadawat og kalig-on ug tabang sa paghimo og maayong mga buhat nga dili unta nila mahimong mapadayon kon sa ilang kaugalingong mga paagi lamang. Kini nga grasya mao ang makaabag nga gahum nga nagtugot sa mga lalaki ug mga babaye nga makaangkon og kinabuhing dayon ug kahimayaan human nila mahimo ang ilang labing maayong mga paningkamot” (Bible Dictionary, “Grace”; emphasis gidugang).
Ang grasya mao ang balaan nga tabang o langitnong tabang nga gikinahanglan kaayo sa matag usa nato aron mahimong sarang sa celestial nga gingharian. Sa ingon, ang makaabag nga gahum sa Pag-ula molig-on kanato sa pagbuhat ug pagbinuotan ug pagserbisyo nga lapas sa indibidwal natong tinguha ug natural nga kapasidad.
Sa akong personal nga pagtuon sa kasulatan, kanunay nakong isukip ang pulong nga “makaabag nga gahum” kon akong masugatan ang pulong grasya. Hunahunaa, pananglit, kini nga bersikulo nga pamilyar natong tanan: “Kita (Kami) nasayud nga pinaagi sa grasya kita (kami) maluwas, human sa tanan nga atong mabuhat” (2 Nephi 25:23). Nagtuo ko nga daghan kita og makat-unan niining importante nga bahin sa Pag-ula kon atong isukip ang “makaabag ug makalig-on nga gahum” matag higayon nga makita nato ang pulong grasya diha sa mga kasulatan.
Ang Ehemplo ni Nephi
Wala: paghulagway pinaagi ni Brian Call
Ang panaw sa pagka-mortal mao ang pag-usab gikan sa pagkadautan ngadto sa pagkamaayo ngadto sa mas maayo ug sa pag-usab sa atong kinaiya. Ang Basahon ni Mormon puno sa mga ehemplo sa mga disipulo ug mga propeta kinsa nahibalo, nakasabut, ug nausab pinaagi sa makaabag nga gahum sa Pag-ula sa paghimo niana nga panaw. Samtang kita mas makasabut niining sagrado nga gahum, ang atong panglantaw sa ebanghelyo mapalapdan pag-ayo ug mapalambo. Ang ingon nga panglantaw mousab kanato sa talagsaong mga paagi.
Si Nephi maoy usa ka ehemplo sa usa ka tawo kinsa nahibalo, nakasabut, ug nagsalig sa makaabag nga gahum sa Manluluwas. Hinumdumi nga ang mga anak nga lalaki ni Lehi mibalik sa Jerusalem aron agnihon si Ishmael ug sa iyang pamilya ngadto sa ilang kawsa. Si Laman ug ang uban sa pundok nga nagbiyahe kauban ni Nephi gikan sa Jerusalem balik ngadto sa kamingawan misupak, ug si Nephi miawhag sa iyang mga igsoon sa pagbaton og hugot nga pagtuo sa Ginoo. Mao kining higayuna sa ilang panaw nga ang mga igsoon ni Nephi migapos kaniya ug miplano sa iyang kamatayon. Palihug timan-i ang pag-ampo ni Nephi: “O Ginoo, sumala sa akong hugot nga pagtuo diha kanimo, luwasa ako gikan sa mga kamot sa akong igsoon nga mga lalaki; oo, gani hatagan mo ako sa kusog nga ako makabugto niini nga mga pisi diin ako gigapos.” (1 Nephi 7:17; emphasis gidugang).
Nasayud ba kamo unsa untay akong iampo kon gigapus pa ako sa akong mga igsoon? “Palihug tabangi ko nga makagawas niini nga sitwasyon KARON!” Nakapaikag kaayo nako nga si Nephi wala mag-ampo nga usbon ang iyang mga kahimtang. Hinoon, nag-ampo siya alang sa kalig-on sa pag-usab sa iyang mga kahimtang. Ug ako nagtuo nga nag-ampo siya niining paagiha tungod kay nakahibalo, nakasabut, ug nakasinati siya sa makaabag nga gahum sa Pag-ula.
Wala ko magtuo nga ang mga gapos nga gigapos ni Nephi nangabadbad lang gikan sa iyang mga kamot ug pulso. Hinoon, nagtuo ko nga gipanalanginan siya og determinasyon ug personal nga kusog lapas sa natural niyang kapasidad, nga siya “pinaagi sa gahum sa Ginoo” (Mosiah 9:17) naningkamot ug milubag ug mibira sa mga pisi, ug sa katapusan ug sa tinuoray naabagan sa pagbugto sa mga gapos.
Ang implikasyon niini nga istorya alang sa matag usa kanato yano ra. Samtang kamo ug ako makasabut ug mogamit sa makaabag nga gahum sa Pag-ula sa personal natong kinabuhi, mag-ampo kita ug magtinguha sa kalig-on sa pag-usab sa atong mga kahimtang kay sa mag-ampo nga ang atong mga kahimtang mausab. Kita mahimo nga mga tinugyanan kinsa naglihok kay sa mga butang nga aghaton sa paglihok (tan-awa sa 2 Nephi 2:14).
Ang Manluluwas Nahibalo ug Nakasabut
Sa Alma kapitulo 7 atong makat-unan sa unsang paagi ug ngano ang Manluluwas makahatag sa makaabag nga gahum:
“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.
“Ug siya modala diha kaniya sa kamatayon, nga siya mahimo nga mobadbad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:11–12; emphasis gidugang). Ang Manluluwas nag-antus dili lamang sa atong mga kadautan apan usab alang sa kawalay kaangayan, sa kasakit, sa kaguol, ug sa emosyonal nga mga kalisud nga kanunay nga naghasol kanato.
Walay pisikal nga kasakit, walay tumang kaguol sa kalag, walay pag-antus sa espiritu, walay sakit o kahuyang nga inyo ug akong masinati panahon sa atong mortal nga panaw nga wala masinati og una sa Manluluwas. Kamo ug ako sa higayon sa kahuyang mahimong motuaw, “Walay usa nga nakasabut. Walay usa nga nakahibalo.” Walay tawo, tingali, ang nakahibalo. Apan ang Anak sa Dios hingpit nga nakahibalo ug nakasabut, kay Iyang nabati ug napas-an ang atong mga alantuson sa wala pa nato kini masinati. Ug tungod kay Iyang nabayran ang labing taas nga bili ug mipas-an sa alantuson, Siya hingpit nga nakasabut sa atong pagbati ug makalugway ngari nato sa Iyang bukton sa kalooy sa daghang mga bahin sa atong kinabuhi. Siya makakab-ot, makahikap, makaabag—tinud-anay nga magdali og duol kanato—ug makalig-on kanato nga mahimong mas labaw kay sa ato mismong mahimo ug makatabang kanato sa pagbuhat niana nga dili gayud nato mahimo nga nagsalig lamang diha sa atong kaugalingong gahum.
“Umari kanako, kamong tanan nga nabudlay ug nabug-atan, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maaghup ug mapaubsanon sa kasingkasing: ug makakaplag kamog pahulay alang sa inyong mga kalag.
“Kay masayon ang akong yugo, ug magaan ang akong luwan” (Mateo 11:28–30).
Ako mohatag sa akong saksi ug mopasalamat sa walay katapusan ug mahangturong sakripisyo ni Ginoong Jesukristo. Nasayud ko nga ang Manluluwas buhi. Akong nasinati ang Iyang matubsanon nga gahum ug ang Iyang makaabag nga gahum, ug ako mopamatuod nga kini nga mga gahum tinuod ug magamit sa matag usa kanato. Sa pagkatinuod, “sa kusog sa Ginoo” kita makabuhat ug makabuntog sa tanang mga butang samtang mopadayon sa atong panaw sa pagkamortal.