Mga Kasulatan ubos sa mga Bitoon
“Akong masayran, nga tinuod ang mga kasulatan” (Children’s Songbook, 109).
Sa dihang bata pa ko, ang akong igsoong mga lalaki ug ako ganahan nga matulog sa gawas panahon sa ting-init. Among ibukhad ang among mga banig sa balkonahe, dayon mangita og mga constellation sa mga bitoon ug maminaw sa mga gangis hangtud kami makatulog.
Usa ka gabii ang akong magulang nga si Larry ug ako anaa sa balkonahe. Kami nanghigda ug nagtan-aw sa mga bitoon. Si Larry dili sagad nga istoryador, apan niadtong gabhiona siya miingon nga gusto ko niyang suginlan og mga istorya. Iya kong gisuginlan og mga istorya gikan sa Basahon ni Mormon, sugod ni Lehi ug sa iyang pamilya nga mibiya sa Jerusalem.
Nakadungog ko og mga istorya gikan sa Basahon ni Mormon sa Primary kaniadto, apan sa dihang gisugilon kini ni Larry, lahi kini. Kini mabati nga mas tinuod. Samtang nagtan-aw ko sa mga bitoon ug naminaw sa akong igsoon, mibati ko og kainit ug kalipay diha sa akong kaugalingon. Bisan tuod og wala ko kahibalo niini kaniadto, akong nabati ang Espiritu Santo nga nagdasig kanako nga ang Basahon ni Mormon tinuod.
Paglabay sa pipila ka bulan, nakakita ko og mga gihulagway nga mga istorya gikan sa Basahon ni Mormon sa among balay. Sa dihang ako kining gisugdan og basa, nabati nako ang sama nga kainit, makahupay nga pagbati nga akong nabati sa dihang gisuginlan ko ni Larry sa samang mga istorya.
Paglabay sa mga tuig, sa dihang nagtimbang-timbang ko kon aduna ba koy pagpamatuod, nagguol ko kay wala koy dako o lig-ong tubag. Nagpasabut ba kini nga ako walay pagpamatuod? Dayon akong nahinumduman ang akong gibati sa dihang ang akong magulang nga lalaki misugilon kanako sa mga istorya gikan sa Basahon ni Mormon, ug akong nasayran nga ako nasayud nga ang Simbahan tinuod.
Ang usa ka pagpamatuod dili kanunay moabut pinaagi sa usa ka dakong panghitabo. Kasagaran kini naggikan sa gamay, hilom nga mga panghitabo diin ang Espiritu Santo naghunghong kanato nga kining mga butanga tinuod.