Pagtug-an sa mga Sekreto
“Sama sa gugma Ko diha ninyo, maghigugmaay” (“Love One Another,” Hymns, nu. 308).
Kini ba sekreto nga angayng taguan ni Luisa?
Gisiradoan ni Luisa ang iyang libro sa math sa dihang mibagting. Wala sad siya makatutok sa mga problema niini sa milabayng usa ka oras.
Ang uban nga mga estudyante nagdali-dali sa paggawas. Kini mao ang katapusang klase sa Biyernes. Kasagaran maghinam-hinam usab si Luisa sa katapusan sa semana. Apan karon nabalaka kaayo siya. Sukad sa udto. Mao kadtong gipangutana siya sa iyang suod nga higala, nga si Carlotta: “Makatago ka og sekreto?”
Niadtong higayona, si Luisa mipaduol ug madasigong miyango. Maayo siya sa pagtago og mga sekreto. Naghunahuna siya nga sultian siya ni Carlotta bahin sa usa ka gwapong lalaki nga iyang ganahan.
Apan dili gyud makalingaw ang sekreto ni Carlotta.
Usa ka tingog ang nakabalda sa paghunahuna ni Luisa. Siya namilok ug mihangad gikan sa iyang lamesa. “Aduna ka bay pangutana sa imong homework, Luisa?” nangutana ang iyang magtutudlo. Ang tanang estudyante migawas na sa kwarto.
“Wala,” mitubag si Luisa. Iyang gitan-aw ang mga mata sa magtutudlo. Kinahanglan nga iya kining isulti sa usa ka tawo! Apan gipasaad siya ni Carlotta nga dili isulti.
“Kinahanglan kong makasakay sa bus,” daling misulti si Luisa. Iyang gisul-ob ang iyang coat ug nagdali paggawas ngadto sa bugnawng hangin sa tingtugnaw.
Sa tibuok biyahe sa bus sa iyang pag-uli, si Luisa nakulbaan pag-ayo nga dili na niya kini maagwanta. Mihuot iyang dughan, daw lisud kaayo nga iginhawa.
Dili makahunong si Luisa sa paghunahuna sa sekreto ni Carlotta. Sa pagpaniudto si Carlotta miingon nga siya nagbuhat og usa ka makuyaw nga binuhatan. Dili gihapon makatuo si Luisa sa iyang nadunggan. Abi niya kaila siya sa iyang suod nga higala! Dili siya makahunahuna nga si Carlotta mobuhat og usa ka makahadlok nga butang sama niadto. Sa dihang nahuman na ang paniudto, gipasaad ni Carlotta si Luisa nga dili mosulti ni bisan kinsa.
Apan unsaon man kon masakitan si Carlotta?
Si Luisa naningkamot nga ibaliwala ang pagpangatawa ug panag-istoryahanay sa iyang palibut diha sa bus samtang iyang gipiyong ang iyang mata ug nag-ampo diha sa iyang kasingkasing.
“Palihug, Langitnong Amahan, tabangi ko unsay angay nga buhaton. Dili ko gusto nga masuko ang akong higala nako. Apan dili usab nako gusto nga may bati nga mahitabo kaniya. Sa pangalan ni Jesukristo, amen.”
Ang paglakaw padulong sa balay mora og mas dugay kaysa sagad nga lakaw. Makamatikod kaha si Mama nga adunay problema si Luisa inig-abut niya sa balay? Unsa man ang iyang isulti?
Nagtan-aw sa snow diha sa yuta, si Luisa nakahimumdom sa snowball fight nga giduwa niya ug ni Carlotta uban sa laing mga bata diha sa parke sa miaging semana. Makalingaw kaayo kadto! Naghunahuna usab siya sa ubang mga butang nga ganahan kaayo niya ug ni Carlotta nga dungang buhaton. Magkuyog. Mag-hiking Magbuhat sa homework. Magdula og sport.
Unsa kahay mahitabo kon isulti ni Luisa ang iyang sekreto ug dili na ganahang makighigala si Carlotta kaniya? Kini nga paghunahuna daw nakapasakit ni Luisa.
Dayon nakahunahuna siya og lain. Sa karon ang pinakaimportanting butang mao ang unsay labing ikaayo ni Carlotta—dili kon unsay hunahunaon ni Carlotta kabahin niya. Si Carlotta nanginahanglan og tinuod nga higala, usa ka higala nga mosigurong luwas siya. Si Luisa nasayud nga kanunay buhaton ni Jesus kon unsay labing ikaayo sa uban, bisan ang ubang mga tawo dili maganahan Niya.
Si Luisa nasayud na kon unsay angay niya nga buhaton. Kinahanglan niyang sultian si Mama kabahin niini. Iya usab nga tawagan si Carlotta ug sultian kon unsa siya ka nabalaka niya ug nagkinahanglan siya og tabang sa usa ka hamtong. Tingali si Carlotta makig-istorya usab sa iyang mama.
Migaan ang pamati sa kasingkasing ni Luisa samtang siya naglakaw padulong sa atubangan nga pultahan.
“Ma?” nanawag siya samtang misulod sa balay. “Mahimo ba nga mag-istorya ta?”
Si Carlotta mahimong masuko, apan si Luisa nasayud nga kini mao ang husto nga buhaton. Siya mahimong tinuod nga higala.
Pipila sa mga sekreto importante ra kaayo aron itago.