Ayaw Husgahi Kon Si Kinsay Andam Na
Ni Randall L. Ridd
Ikaduhang Magtatambag sa Kinatibuk-ang Kapangulohan sa Young Men
Dili gyud ka masayud kon si kinsay andam na nga modawat sa ebanghelyo.
Paghulagway pinaagi ni Katie Payne
Kanunay gyud nakong mahinumdoman ang panihapon sa ika-40 nga high school reunion. Nabalaka ko nga mahimamat ang mga higala sa una nga wala na nako makita sulod sa daghang katuigan ug masayran unsay nahitabo sa ilang kinabuhi sukad sa high school.
Samtang nag-istorya mi sa may lamesa nga adunay 8 o 10 ka mga klasmeyt atol sa panihapon, usa sa akong higala, si Greg Link, naghisgot nga siya nabunyagan sa Simbahan sa dihang siya anaa sa edad nga mga 20.
Dayon siya prangka nga nangutana: “Nganong wala may usa kaninyo nga mihatag nako og Basahon ni Mormon samtang high school pa ta? Wala ba mo maghunahuna nga ako mahimong miyembro sa Simbahan?”
Laing higala—kinsa dili miyembro sa Simbahan—miingon, “Unta imoha na to ang usa ka kopya nga naa nako; gihatagan ko og mga 50 niini!”
Nakuratan ko. Balik sa high school, kon inyo kong giingnan nga si Greg mabunyagan ug mahimong malampusong makadasig nga mamumulong, dili gayud unta ko motuo niini. Ganahan kaayo ko ni Greg. Siya usa ka matinud-anong higala nga makasalig mo kon kamo nagkinahanglan niya. Apan kahibalo ko nga siya ganahan og party, ug siya may kalagmitan nga maapil sa away. Wala gyud ko maghunahuna nga siya mainteresado nga maminaw sa Simbahan. Ang makalingaw kay, nagtuo gyud ko nga ang laing higala, kinsa akong gipakigbahinan sa ebanghelyo ug gani gihatagan og kopya sa Basahon ni Mormon, magpamiyembro sa umaabut nga adlaw. Ang tinuod kay, dili mo masayud kon si kinsay andam nga modawat sa ebanghelyo ug si kinsay dili.
Naulaw ko og gamay human sa among panag-istoryahanay ni Greg tungod kay ako, sama sa uban, wala mopakigbahin sa ebanghelyo niya. Nangutana ko niya kon unsay nakapahimo niya nga mamiyembro sa Simbahan. Mao kini ang iyang istorya:
Ang akong pamilya mibalhin sa Siyudad sa Salt Lake, Utah, sa dihang ako mga 11 anyos, apan wala ko magpamiyembro sa Simbahan hangtud ko nga nag-24 anyos. Naghinumdom, akong makita nganong walay mopakigbahin sa ebanghelyo. Dili ko makita nga ideyal nga tawo nga istoryahan sa ebanghelyo. Sa tinuoray, ako medyo kiat nga bata. Kanunay ko nga adunay makaaway ug maapil sa kagubot sa eskwelahan.
Ako adunay daghang mga higala nga LDS, apan usa ra gyud ang nakig-istorya kanako kabahin sa Simbahan. Ug kana tungod kay ako siyang gisungog sa pagbasa sa Basahon ni Mormon kon siya magbantay sa bata.
Hinoon, nakuryuso ko sa mga butang. Gidala ko ni mama sa lokal nga Kristyanong simbahan. Kausa nangutana ko nila nganong si Jesus wala moanhi sa Amerika. Morag ila ko nga gikataw-an sa pagpangutana niini, busa wala na ko mangutana og lain pa.
Paglabay sa pipila ka tuig mihukom ko nga mobisita sa visitors’ center sa Temple Square sa Siyudad sa Salt Lake. Adunay diorama ni Kristo sa Amerika. Diha-diha dayon akong nahinumduman ang akong mga pangutana kabahin niini nga hilisgutan sa dihang batan-on pa ko. Mao kadto ang higayon nga ang Espiritu mitandog kanako, ug nasayud ko nga andam nakong maminaw.
Ang ehemplo sa akong mga higala gikan sa high school akong nahinumduman. Gani, ang mga tawo nga akong gitahud pag-ayo kay mga LDS. Si Randy Ridd ug iyang asawa miadto sa akong eskwelahan. Sila kanunay talagsaong mga ehemplo, buotan kaayo nga mga tawo. Kana adunay dakong epekto ngari kanako sa wala madugay. Naghunahuna ko, “Kon si Randy nagtuo nga kini tinuod, kini importante gyud kaayo.”
Wala ko masayud kon unsay mahitabo kon sila mas mipakigbahin pa sa ebanghelyo niadtong panahona. Posible nga dili pa ko andam. Apan sa paghinumdom, unta ila kining gibuhat. Nasayud ko nga kini unta adunay epekto ngari kanako.
Mapasalamaton ko nga ang akong ehemplo adunay postibo nga epekto kang Greg. Hinoon, mas maayo ang akong pagbati, kon ako adunay gibuhat kabahin niini nianang higayona. Kon gipakigbahin lang nako ang ebanghelyo o ang Basahon ni Mormon o gani giimbitar lang si Greg sa usa ka kalihokan, kini nakausab unta sa iyang kinabuhi. Siguro mas sayo siya nga nagpamiyembro sa Simbahan. Siguro nakaserbisyo siya og misyon.
Nakakat-on ko nga ang maayo nga ehemplo sa tinuoray importante, ug mao usab ang responsibilidad sa pagpakigbahin sa ebanghelyo. Gimandoan kita sa Ginoo nga buhaton kini: “Panglakaw kamo sa tibuok kalibutan, ug iwali ninyo ang maayong balita ngadto sa tibuok nga kabuhatan” (Marcos 16:15).
Busa ayaw kahadlok sa pagpakigbahin. Labaw pa, ayaw pagdali-dali sa paghusga kon kinsay andam ug kinsay dili andam. Basin og matingala mo kansang kasingkasing ang napahumok, bisan kon kana nga interes dili gayud ninyo makita.