Hinumdumi nga Ila Kanang Pagpili

Ang kabubut-on para sa tanan, lakip niadtong inyong gidapit sa pagkat-on kabahin sa Simbahan.

Paghulagway pinaagi ni Beth M. Whittaker

Samtang mag-imbitar kamo sa uban sa pagkat-on sa ebanghelyo, importante nga masayud nga sila adunay kabubut-on sa pagpili nga dawaton o dili dawaton ang inyong imbitasyon. Ang inyong kalampusan wala masukod sa ilang tubag; kini gisukod sa inyong pasalig sa pagpakigbahin.

Busa kon ang kalampusan wala masukod kon si kinsa ang miingon og oo o si kinsay nabunyagan, unsay angay ninyong tutukan samtang maghimo kamo og mga tumong sa misyonaryo nga buhat? Tutuki kon unsay inyong mahimo kay sa unsay itubag sa uban. Hinumdumi, kamo usab adunay kabubut-on. Kamo makapili nga:

Kanunay moimbitar, ug moimbitar sa tanan. Tungod kay imposible nga masayran daan kon si kinsa ang mainteresado o dili mainteresado sa ebanghelyo, kanunay mo nga mopakigbahin ug ipakigbahin kini kutob sa inyong mahimo, maminaw sa mga pagdasig sa Espiritu. Kita molampos isip misyonaryo kon kita modapit sa mga tawo sa pagkat-on ug pagdawat sa kamatuoran.

Pabilin nga magmahigalaon. Kon ang tawo dili modawat sa imbitasyon nga dugang magkat-on, padayon nga magmatinahuron ug magmabination. Ipabilin ang panaghigalaay basta nagsunod gihapon sa taas nga sumbahan. Ipabati ang Kristohanong gugma sa tanan, bisan kon wala sila makasabut sa inyong gituohan ug gibuhat.

Magpabiling matinud-anon. Maayo kaayo kini nga pagkasulti sa Manluluwas: “Pasigaa ninyo ang inyong kahayag sa atubangan sa mga tawo aron makita nila ang inyong mga maayong buhat ug dayegon nila ang inyong Amahan nga anaa sa langit” (Mateo 5:16). Higugmaa ug sunda ang ebanghelyo, ug sa dili madugay inyong makaplagan ang mga tawo nga gustong masayud kon ngano ug kinsa andam nga modawat sa ebanghelyo.

Kanunay nga magmapailubon. Sama sa gipakita sa istorya sa tuo, usahay molungtad og daghang imbitasyon sa dili pa moabut ang husto nga panahon. Padayon sa pagpangita og oportunidad sa pagpakigbahin sa ebanghelyo, padayon nga magmahigalaon, ug ayaw pagkawala og kadasig. Ang Ginoo nasayud sa inyong mga paningkamot ug Siya mopanalangin kaninyo. (Tan-awa sa D&P 98:2.)

Pagtuo sa Pagpakigbahin

“Gitahud nato ang matag usa nga pagpili ug ang tayming. Miingon ang Ginoo, ‘Himoa nga ang matag tawo mopili alang sa iyang kaugalingon’ (D&P 37:4). Ang kakulang sa interes sa usa ka tawo kinahanglang dili mopaminos sa atong panaghigalaay ug gugma. Dawaton man o dili ang inyong pag-imbitar nga “umari kamo ug makita ninyo,” inyong bation ang pag-aprubar sa Ginoo ug niana nga pag-aprubar, dugang sukod sa pagtuo sa pagpakigbahin og balik sa inyong gituohan.

Elder Neil L. Andersen sa Korum sa Napulog Duha ka mga Apostoles, “Usa Kini ka Milagro,” Liahona, Mayo, 2013, 79.

Unsaon nga Mahimong Malampusong Misyonaryo?

Nangita pa og laing mga tip kon unsaon nga mahimong mas malampuson nga misyonaryo? Susiha ang 10 ka talagsaong mga ideya sa pahina 12 sa Isangyaw ang Akong Ebanghelyo: Usa ka Giya sa Misyonaryo nga Pangalagad (2004).

• Nagsige kog Pangutana