Kon ang mga Pagduha-duha ug mga Pangutana Motumaw
Ang tagsulat nagpuyo sa Georgia, USA.
Ang mga pangutana mahinungdanong bahin sa atong mahangturong kalamboan, ug ang pagsiksik og mga tubag sa paagi sa Ginoo makapaduol nato sa atong Langitnong Amahan.
Mga paghulagway pinaagi ni Beth Jepson
Kasagaran tungod sa Internet, daghang mga miyembro sa Simbahan makasugat og mga ideya nga mosumpaki sa ilang pagtuo. Pipila sa mga miyembro nahasol sa mga pangutana nga nasugatan ug naghunahuna kon maayo ba nga adunay pangutana kabahin sa ilang pagtuo.
Importante nga masabtan nga maayo nga adunay mga pangutana. Gani, ang pagpangutana kabahin sa pagtuo mahinungdanon sa atong espirituhanong paglambo. Apan, ang kinasingkasing nga mga pangutana dili parehas sa pagduha-duha.
Mga Pangutana itandi sa mga Pagduha-duha
Unsa ang kalainan sa pangutana ug pagduha-duha? Ang mga pangutana, kon ipangutana uban sa kinasingkasing nga tinguha sa pagpalambo sa pagsabut ug pagtuo, giawhag. Daghang karaan ug modernong pagpadayag napahinabo gumikan sa matinud-anong pangutana.1 Ang sugo diha sa kasulatan sa pagpangita ug pagpangutana aron makakaplag mao ang usa sa mga sugo nga kanunayng gibalik-balik. Ang matinud-anong mga pangutana ipangutana uban sa “tinuod nga katuyoan” (Moroni 10:4) aron mas makasabut ug mas makasunod sa kabubut-on sa Ginoo.
Ang matinud-anong nangutana magpadayon sa pagkamasulundon samtang nagsiksik sa mga tubag. Sa sukwahi, akong nakita nga kon ang mga tawo nagduha-duha sa ilang pagtuo, kasagaran hunungon nila ang ilang pasalig sa kasugoan ug pakigsaad samtang nagpaabut og mga tubag. Ang mga nagduha-duha sa kalagmitan mohunong sa pagkamasulundon o limitahan kini, hangtud matubag ang mga pagduha-duha.
Walay sugyot diha sa kasulatan o sa mga pagtulun-an sa mga propeta nga nag-awhag og pagduha-duha. Gani, ang mga kasulatan puno sa mga pagtulun-an nga sukwahi niini. Sama pananglit, kita giingnan nga “ayaw pagduha-duha, ayaw kahadlok” (D&P 6:36). Ug sa Mormon 9:27, kita giawhag nga “ayaw pagduha-duha, apan pagmatinuohon.”
Usa ka problema sa pagduha-duha mao ang tinguha sa pagsunod lamang kon ang walay kasiguradoan matubag na sa katagbawan sa nagduha-duha. Kini ang kinaiya nga gipakita ni Korihor, kinsa miingon, “Kon ikaw mopakita kanako og usa ka timailhan … diha ako madani sa kamatuoran” (Alma 30:43).
Ang gahum sa pagduha-duha nga makapahuyang sa pagtuo, paglaum, ug gani sa pamilya maminusan sa higayon ang tawo matinud-anong moingon, “Akong buhaton ang mga butang nga gisugo sa Ginoo, matubag man ang akong mga pangutana diha-diha dayon o dili, tungod kay nakigsaad ko nga buhaton ko kini.” Ang kalainan sa matinud-anon nga “Mosunod ko sa kasugoan tungod kay…” ug ang nagduha-duha nga “Mosunod ko sa kasugoan kon …” adunay gamhanan ug mahangturong importansya.
Ang Sundanan sa Ginoo sa Pagdawat og mga Tubag
Isip usa ka network engineer, kinahanglan nakong sundon ang estrikto nga mga sumbanan kon gusto nako nga ang akong mga computer network makonektar sa ubang mga network. Usahay kining mga lagda daw makakapoy, apan kon ang kada network engineer mosunod sa samang mga sumbanan, kami makamugna og usa ka butang nga mas gamhanan kaysa mahimo kon kami-kami lang sa among kaugalingon.
Sa samang paagi, kon kamo nagtinguha og tubag sa espiritwal nga pangutana gikan sa Tinubdan sa tanang kahibalo, kinahanglan ninyong sundon ang Iyang mga lagda aron makakuha sa tubag. Kini nga proseso nagkinahanglan og tinguha nga masabtan ang kamatuoran ug kaandam sa pagsunod sa kabubut-on sa Dios (tan-awa sa Alma 32:27). Kay kon dili, adunay risgo nga imong tuohan ang mga tubag nga gusto nimong tuohan imbis makadawat og tinuod nga mga tubag gikan sa Dios.
Normal lang gyud nga mobati og kabalaka ug dili komportable kon mag-atubang og dili pamilyar nga ideya, ilabi na kon kini mosukwahi sa lig-ong gihuptan nga pagtuo. Ang importante dili nato tugutan ang ka dili komportable nga makapahilayo nato sa atong mga pakigsaad panahon sa atong pagsiksik og mga tubag. Akong nakat-unan gikan sa personal nga kasinatian nga dili mahimong talikdan nato ang Dios ug magdahum nga tubagon kita Niya sa atong mga pangutana sumala sa atong gusto. Gikinahanglan ang hugot nga pagtuo aron padayon nga mosunod sa mga kasugoan samtang nangita pa og tubag sa atong walay kasiguradoan. Makatintal nga mohunong o limitahan ang atong pagkamasulundon hangtud matubag ang atong mga kabalaka, apan dili kini mao ang paagi sa Dios.
Sa praktikal nga paagi, kinahanglan nga pangutan-on nato ang atong kaugalingon, “Andam ba nakong buhaton ang tanan aron makakuha og tubag gikan sa Ginoo, o yano lang nga buhaton ni nako sa akong paagi?” Ang Manluluwas Mismo mitudlo niining sumbanan sa dihang miingon Siya, “Kon tuyoon ni bisan kinsa ang pagbuhat sa kabubut-on sa Dios, nan, iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingon kong pagbulot-an” (Juan 7:17).
Mao nga ang unang lakang sa pagtubag sa mga pangutana mao ang pagbarug nga “makanunayon ug dili matarug sa paghupot sa mga sugo sa Dios” (Alma 1:25). Si Elder Neil L. Andersen sa Korum sa Napulog Duha ka mga Apostoles nangutana:
“Unsaon ninyo sa pagpabilin nga ‘makanunayon ug dili matarug’ kon sulayan ang hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug magserbisyo sa uban.
“Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak taguanan dihang nagkaduol na ang buhawi.”2
Si Elder Andersen mitudlo usab nga ang “hugot nga pagtuo … usa ka desisyon.”3 Ang Ginoo dili mamugos sa inyong kaintelihente o pagkamasalundon. Kinahanglang tuyuon ninyo nga pilion ang hugot nga pagtuo! Kana nga pagpili wala makalapas sa inyong pagkamatinuoron sa intelektwal; kini ebidensya sa mahangturon ug balaanong pagtahud sa inyong kabubut-on.
Ang mga Pangutana Makapadugang sa Pagsabut
Ang pipila sayop nga naghunahuna nga ang pagbaton og matinud-anong kabalaka kabahin sa kasaysayan o doktrina sa Simbahan ebidensya nga ang usa ka tawo wala magsunod sa mga sumbanan sa Simbahan. Ang pagbaton og mga pangutana wala magpasabut nga sad-an mo og dakong sala. Ang mga pangutana kabahin na sa kinabuhi ug gikinahanglan sa atong paglambo ug dugang pagsabut. Ang problema dili kon kita adunay mga pangutana apan kon kita ba mosunod sa mga kasugoan samtang kita nagsiksik og tubag pinaagi sa pagpadayag.
Pagmatngon nga si Satanas makapadako sa atong mga pagduha-duha o mogiya kanato sa pagpangatarungan sa atong mga sala. Ang Espiritu Santo modasig kanato og dili komportabling mga pagbati kon kita makasala, ug kita mahimo nga maghinulsol o mosalikway niini nga pagdasig. Kon magduha-duha, makatabang nga matinuorong mangutana sa kaugalingon, aduna bay usa ka butang nga akong gibuhat o gitinguha nga sukwahi sa ebanghelyo? Kon ang tubag oo, pangayo og tabang sa inyong bishop. Kini makahimo sa tanang kalainan! Ang pagtugot sa inyong pagduha-duha nga maoy ipangatarungan sa inyong sala dili gayud puli sa paghinulsol.
Pipila sa mga tawo nahasol sa mga pahayag sa mga lider sa Simbahan nga nasayran sa kaulahian nga dili husto, dili kabahin sa doktrina apan sa ilang personal nga mga opinyon. Sama pananglit, si Presidente Joseph Fielding Smith (1876–1972) misulat sa unang edisyon sa iyang libro nga Answers to Gospel Questions, “Dili mahitabo nga ang tawo makahimo og instrumento o sakyanan nga makabiyahe sa kawanangan ug makaadto sa bulan o sa bisan unsang layo nga planeta.”4
Sa wala madugay, human sa pag-landing sa Apollo ngadto sa buwan ug sa kamatayon ni Presidente David O. McKay, si Joseph Fielding Smith nahimong Presidente sa Simbahan. Sa usa ka press conference, usa ka reporter nangutana kaniya kabahin niini nga pahayag. Si Presidente Smith mitubag, “Nan, nasayop ko, dili ba?”5
Sama sa naobserbaran ni Elder Jeffrey R. Holland sa Korum sa Napulog Duha ka mga Apostoles: “Atong giusik-usikan ang atong bililhong emosyonal ug espiritwal nga kusog kon magsige og hunahuna … sa panghitabo sa kasaysayan sa Simbahan nga yanong nagpakita nga ang mga mortal kanunay manlimbasug aron mamahimo unsa ang gipaabut kanila sa Dios.”6
Pagsiksik sa Makapadasig nga Paagi
Daghang mga basahon ang nasulat ug daghang mga oras ang gigahin sa pagsuhid sa istorya sa Pagpahiuli. Kini sa kanunay nagdala og dugang panabut, apan nakamugna usab og dili komportabling mga pangutana, ilabi na kon kita wala makasabut sa motibo sa mga tawo nianang panahona. Sayon ra usab nga motutok og maayo sa pagsiksik sa mga reyalidad sa kasaysayan nga mahimong sayop nga nasabtan o wala pa kanato sa karon, apan posible kanunay nga makakuha og tinuod ug makahuluganong impormasyon sa Usa nga nakasabut sa tanang butang.
Kini tingali ang pinakaimportanting yawe sa tanan: kon kita lig-on nga nagtuman sa atong mga pakigsaad ug nagkinabuhi nga matinud-anon sa kahayag nga anaa kanato, ang Ginoo mopanalangin sa atong kinabuhi ug mohatag kanato og inspirasyon. Akong nabati kining malumong kalooy; kini personal gyud kaayo, direkta nga kasinatian tali kanato ug sa atong Langitnong Amahan. Kini kahayag ug kahibalo. Walay igong pagbasa o pagtuon sa mga kasinatian nga nadunggan lang sa mga tawo nga makakompara sa ato mismong kasinatian nga gihatag kanato pinaagi sa kalooy ug gugma sa atong Amahan.
Magpadayon ang mga pangutana samtang kita nagtinguha nga magtuon kada adlaw sa kasulatan ug sa ebanghelyo. Kon gusto sa Ginoo nga tudluan kita, Iya kining buhaton pinaagi sa paghatag kanato og pangutana nga pamalandungon. Ang mga tubag moabut pinaagi sa pagkamatinud-anon sa atong mga pakigsaad ug pagserbisyo sa uban samtang kita nagtuon, tungod kay kini ang dalan sa pagbaton og personal nga kasinatian nga, inig-abut sa panahon, mohatag sa tubag sa tanang mga pangutana.