Nagsige kog Pangutana
Ang tagsulat nagpuyo sa São Paulo, Brazil.
Nasayud ko nga kitang tanan kinahanglang mopakigbahin sa ebanghelyo, apan wala gyud ko magmalampuson. Dayon, atol sa klase sa Spanish nga akong gikuha, nakahimamat kog batan-ong lalaki nga ginganlan og Tiago. Nagkahigala kami ug kasagaran magkuyog paglakaw pauli gikan sa eskwelahan. Usa ka adlaw nakalabay mi og LDS chapel nga bag-o lang natukod.
“Miyembro ako sa Ang Simbahan ni Jesukristo sa mga Santos sa Ulahing mga Adlaw sulod na sa daghang mga tuig,” miingon ko. Akong gipakigbahin kaniya ang pipila ka mga butang nga atong gituohan, ug misulti kaniya nga napanalanginan ang akong pamilya ug ako tungod sa ebanghelyo. Giimbitar nako siya nga motambong sa miting nianang pagka-Dominggo sa alas 9:00 sa buntag.
Miabut ang Dominggo ug madasigon akong naghulat, apan wala siya moabut. Niana nga semana, giimbitar nako siya pag-usab. Nagpadayon kini matag semana sulod sa duha o tulo ka bulan. Kanunay siyang mohatag nako og rason nganong wala siya moabut: “Dugay kong nakatulog,” “Gikapoy ko,” “Adunay mga problema.” Apan kanunay kong nanghangyo niya, ug daw wala siya magpakabana.
Usa ka Dominggo sa buntag milingkod ko sa usa sa mga lingkuranan sa luyo sa chapel. Pipila na lang ka minuto sa dili pa magsugod ang miting sa dihang dunay hinay nga mitawag nako. Mitan-aw ko sa pultahan, ug diha si Tiago.
“Dili ba misaad man ko kanimo nga usa ka adlaw moanhi ako?” miingon siya. Mitambong siya sa sakrament miting, ug sa akong katingala, nagpabilin sa ubang mga miting ug daw nalipay sa dihang akong gipaila-ila siya sa mga misyonaryo. Nagsugod siya sa pagpakigmiting nila kanunay. Si Tiago ug ako nagpadayon sa pag-istoryahanay samtang kami maglakaw pauli gikan sa eskwelahan, apan ang among panag-istoryahanay kabahin sa mga kamatuoran nga iyang nakat-unan. Nakatubag ko sa mga pangutana ug nakahatag sa akong pagpamatuod. Sa katapusan, nakaangkon siya og pagpamatuod sa iyang kaugalingon ug miapil sa Simbahan.
Karon full-time nga misyonaryo ako sa Brazil Santa Maria Mission. Sa wala pa ako mibiya para sa misyon, si Tiago misumiter usab sa iyang application nga mahimong usa ka full-time nga misyonaryo, ug karon siya nagserbisyo sa Brazil Manaus Mission.
Bag-o akong nakadawat og sulat gikan niya. “Salamat sa imong pagsige og imbitar nako nga mosimba,” misulat siya. “Mapasalamaton ako sa kahangturan.” Dili lang ako malipayon sa pagpakigbahin sa ebanghelyo matag adlaw apan usab nga mahibalo nga mao usab ang gibuhat ni Tiago.