Pag-imbitar ug Pag-follow Up
Sulayi kining 11 ka sayon nga paagi sa pagpakigbahin sa ebanghelyo sa kada adlaw nga panag-istoryahanay.
Kon kamo gusto nga mopakigbahin sa ebanghelyo apan gikulbaan o dili sigurado kon unsaon sa pagbuhat niini, kini nga artikulo alang kaninyo. Ang pagpakigbahin sa ebanghelyo labaw pa kaysa pag-imbitar lang sa imong mga higala sa pagpakighimamat sa mga misyonaryo. Nindot kana nga ideya, apan dunay daghan kaayong laing mga butang nga inyong mahimo sa “pag-imbitar sa uban sa pagduol ngadto ni Kristo” (Isangyaw ang Akong Ebanghelyo: Usa ka Giya sa Misyonaryo nga Buhat [2004], 1). Ug mas sayon kay sa inyong gihunahuna. Tingali makatabang ang sambingay sa football.
Ang maayong mga magdudula nasayud kon unsaon ug kanus-a mopasa sa bola ngadto sa ilang mga kaubanan sa team sa paghatag kanila og oportunidad sa pagpadayon. Ang pagdapit sa uban nga makat-on sa ebanghelyo sama sa pagpasa sa bola, imbis mohatag lamang nila og oportunidad aron makapuntos, kamo naghatag nila og oportunidad sa pagduol ngadto kang Kristo.
Aniay pipila ka ideya aron kamo makasugod. Pag-ampo alang sa inspirasyon ug paghunahuna og maayo samtang inyong ipahiangay kini nga mga ideya aron mohaum sa mga tinguha o sitwasyon sa inyong mga higala. Dayon abibaha sila!
Imbitara ang usa ka higala ngadto sa Mutual
Ikaw dunay higala kinsa gusto kaayo og sport. Mao nga kon makadungog kamo nga ang kalihokan sa Mutual karong semanaha mao ang gabii sa mga sports, kamo makahunahuna nga kini mao ang hingpit nga oportunidad sa pag-imbitar niya.
Paghangyo og usa ka higala sa pagtabang nimo sa paghimo sa proyekto sa Personal nga Kauswagan o sa Katungdanan ngadto sa Dios
Samtang magplano kamo sa inyong dako nga proyekto, kamo makaamgo nga nagkinahanglan kamo og tabang, mao nga nakahukom kamo nga manghangyo og tabang sa inyong mga higala nga dili miyembro sa simbahan. Kini makahatag kaninyo og oportunidad sa pagpasabut kon ngano nga kamo moserbisyo, ug kamo usab malingaw nga magdungan sa pagserbisyo.
Pag-imbitar og usa ka higala sa pagtambong sa sayaw sa Simbahan
Ang inyong labing suod nga higala midapit ninyo nga makig-uban karong Biyernes, apan kamo adunay sayaw sa Simbahan nianang gabhiona. Imbis mobalibad lang sa imbitasyon, imbitara siya sa sayaw!
Pagsulti sa usa ka tawo mahitungod sa Basahon ni Mormon
Ang inyong ward dunay tumong sa pagbasa sa Basahon ni Mormon hangtud sa katapusan sa tuig, mao nga inyong dad-on ang inyong mga kasulatan ngadto sa eskwelahan. Usa sa inyong mga higala nakakita sa inyong libro ug nangutana kon unsa kini, mao nga inyong ipasabut kon unsa ang Basahon ni Mormon ug ipakigbahin ang inyong pagpamatuod niini.
Basaha unya ang istorya ni Kenneth niini nga artikulo aron makita unsa ang nahitabo sa dihang iyang nakita ang usa ka miyembro sa Simbahan nga dunay Basahon ni Mormon didto sa eskwelahan.
Pag-imbitar og higala ngadto sa simbahan
Kamo gihangyo sa pagtudlo og usa ka bahin sa leksyon sa Dominggo. Kon usa ka higala mangutana kon unsay inyong buhaton karong tapus sa semana, imbis dili ninyo buhaton ang inyong mga plano sa Dominggo, ipasabut nga kamo motudlo og usa ka bahin sa leksyon sa simbahan. Nakuryuso ang inyong higala, mao nga inyo siyang imbitaron nga mouban ninyo aron siya makadungog sa inyong pagtudlo.
Pagpakita sa inyong mga higala sa Mormon.org
Ang inyong mga higala dunay daghang mga pangutana mahitungod sa atong mga pagtuo, mao nga ipakita nila ang Mormon.org sa pagtabang nga matubag ang ilang mga pangutana.
Pagpakigbahin og artikulo gikan sa Liahona
Usa sa mga artikulo gikan sa bag-ong isyu sa Liahona nagpahinumdom ninyo sa inyong panag-istoryahanay sa usa sa inyong mga higala. Kamo mopakigbahin sa inyong kopya sa magasin (o ang internet link) ngadto kaniya ug moimbitar niya sa pagbasa sa artikulo.
Pagpakigbahin og kasulatan sa text message
Atol sa inyong pagtuon sa kasulatan sa buntag, kamo nakabasa og usa ka bersikulo nga makatabang gayud alang sa usa ka higala kinsa adunay problema karong bag-o. Mopadala mo kaniya og text message nga nagpahibalo kaniya nga kamo naghunahuna kaniya ug nasugatan ang usa ka kasulatan nga tingali magustuhan niya.
Pag-imbitar og usa ka tawo alang sa panihapon
Si papa magluto sa iyang inila nga spaghetti karong semanaha! Nakakita mo og bag-ong estudyante sa inyong eskwelahan nga wala kaayoy daghang mga higala, mao nga kamo mohukom nga imbitaron siya sa panihapon sa pamilya. Kon Lunes kini sa gabii, mahimong hangyoon ninyo siya nga moapil sa family home evening pagkahuman.
Pag-imbitar og usa ka higala sa pagtambong og kinatibuk-ang komperensya uban ninyo
Naminaw kamo og pakigpulong sa kinatibuk-ang komperensya sa inyong MP3 player samtang kamo naglakaw sa eskwelahan. Dunay usa ka higala nga nangutana kon unsay inyong gipaminaw. Sultihi siya sa kamatuoran—nga naminaw mo sa mga pulong sa buhing propeta sa Dios. Unsa man ang ipasabut niana?” ang inyong higala mangutana. Kamo mopasabut mahitungod sa modernong mga propeta ug mga apostoles ug dayon pangutan-a ang inyong higala kon gusto ba siya nga mouban ninyo sa pagka-Abril aron maminaw unsay isulti niadto nga mga lider.
Hatagi ang usa ka higala og Alang sa Kalig-on sa Kabatan-onan
Kon ang usa ka higala mangutana nganong nagsunod kamo og mga sumbanan, hatagi siya og kopya sa Alang sa Kalig-on sa Kabatan-onan ug hisguti kon sa unsa nga paagi nga ang pagsunod og mga sumbanan nakatabang ninyo nga mobati nga mas malipayon.
Basaha ang istorya ni Hannah niini nga artikulo aron makita giunsa niya sa pagpakigbahin kini nga booklet sa usa ka higala.
Ayaw kalimot sa pag-follow up
Human moimbitar, ang sunod nga lakang mao ang pag-follow up. Sa football, ang labing maayo nga mga magdudula nakahibalo nga ang ilang trabaho wala pa mahuman inig pasa nila sa bola—kinahanglan silang mopadayon ug mangitag paagi nga mapasahan sa bola.
Ang pag-follow up mahimo sama ka yano sa pagpangutana sa inyong kauban sa klase sa iyang hunahuna mahitungod sa kasulatan nga inyong gipakigbahin o unsay gibati sa inyong higala human makaadto sa simbahan uban ninyo.
Alang sa usa ka ehemplo kon sa unsa nga paagi nga ang pag-follow up nakausab sa kinabuhi sa batan-ong lalaki, susiha ang istorya ni Kenneth.
Kon kamo mo-follow up human moimbitar sa uban nga makat-on sa inyong mga pagtuo, kamo nagpakita nga kamo nagpakabana sa ilang kalipay. Makamatikod sila sa inyong sinsero nga tinguha sa pagtabang ug mobati sila nga komportable nga mangutana ninyo og dugang nga mga pangutana sa umaabut.