2015
Pag-andam alang sa Pasko sa Pagkabanhaw
Marso 2015

Pag-andam alang Pagkabanhaw sa Pasko sa

Si Jesukristo mipakita og hingpit nga ehemplo nga atong sundon. Magamit ninyo kini nga kalihokan sa pagkat-on og dugang mahitungod Kaniya ug sa pag-andam alang sa Pasko sa Pagkabanhaw. Sugdi sa numero 1 sa Dominggo sa dili pa ang Pasko sa Pagkabanhaw. Matag adlaw, pagbasa og mahitungod ni Jesus ug tubaga ang pangutana. Dayon guntinga ang haum nga litrato ug idugang kini ngadto sa tsart.

  1. Gihugasan ni Jesus ang mga tiil sa Iyang mga disipulo ug mihupay nila pinaagi sa pag-ingon, “Kinahanglan dili magkaguol ang inyong kasingkasing ni magtalaw” (Juan 14:27). Unsa ang inyong mahimo sa pagserbisyo o paghupay sa usa ka higala karon?

  2. Atol sa Katapusang Panihapon, si Jesus mitudlo sa Iyang mga disipulo sa pag-ambit sa sakrament. Miingon Siya kanila, “Buhata ninyo kini sa paghandum kanako” (Lucas 22:19). Unsa ang usa ka paagi nga kamo mas makapakita og balaan nga pagtahud panahon sa sakrament?

  3. Sa dihang si Jesus misugod sa Pag-ula didto sa Tanaman sa Getsemani, Iyang gibuhat ang unsay gusto sa Langitnong Amahan Kaniya nga buhaton, bisan tuod kini lisud kaayo. Nag-ampo Siya, “Dili ang akong pagbuot maoy matuman, kondili ang imo” (Lucas 22:42). Unsa ang usa ka paagi nga kamo mas masulundon diha sa simbahan, sa eskwelahan, o sa panimalay?

  4. Sa dihang gipasakitan sa mga tawo si Jesus panahon sa Paglansang, Siya miingon, “Amahan, pasayloa sila; kay wala sila makasabut sa ilang ginabuhat” (Lucas 23:34). Nganong importante ang pagpasaylo sa ubang mga tawo?

  5. Si Jesus misiguro nga ang Iyang inahan maatiman human Siya mamatay. Siya misulti kang Juan, “Tan-awa ang imong inahan,” o sa pagtagad ni Maria ingon og iyang kaugalingon nga inahan (Juan 19:27). Unsa ang inyong mabuhat karon sa pagtabang sa inyong mga ginikanan o mga tigbantay?

  6. Sa wala pa Siya mamatay, si Jesus nag-ampo ngadto sa Langitnong Amahan ug miingon, “Sa imong mga kamot itugyan ko ang akong espiritu” (Lucas 23:46). Sa unsang paagi nga ang inyong mga pag-ampo mahimong mas espesyal?

  7. Human Siya namatay, si Jesus nabuhi pag-usab! Mao kini ngano nga kita mosaulog sa Pasko sa Pagkabanhaw. Si Kristo mibisita sa Iyang mga disipulo human sa Pagkabanhaw ug miingon, “ayaw na nianang pagkadili matinuohon, hinonoa magmatinuohon ka” (Juan 20:27). Nganong importante kaayo ang Pasko sa Pagkabanhaw?