Panahon sa Kasulatan

Ang Istorya sa Tawo nga Buotan ug sa Tawo nga Boang-boang

Ni Jean Bingham

Ang tagsulat nagpuyo sa Utah, USA.

Magkat-on mahitungod sa Bag-ong Tugon niining tuiga!

Usa ka adlaw gusto ni Jesus nga tudluan ang mga tawo kon unsaon nga magpabiling lig-on bisan sa kalisdanan. Siya misaysay kanila kabahin sa dakong unos, sa tawo nga buotan, ug tawo nga boang-boang. Sa dihang miabut ang unos, ang balay sa tawo nga buotan wala matumpag tungod kay kini natukod diha sa bato. Apan ang balay sa tawo nga boang-boang natumpag tungod kay kini natukod diha sa balas.

Si Jesus nagtudlo kon unsa kaimportante nga magbaton og pagtuo Kaniya ug mosunod sa Iyang mga pagtulun-an. Kon kita magpalambo og lig-ong pagpamatuod, kita may igong kalig-on nga mobarug, bisan unsa pa nga kalisdanan ang moabut.

Unsa ang Sambingay?

Ang sambingay usa ka espesyal nga matang sa istorya. Kini nagsaysay sa yanong mga butang, sama sa unos o perlas, nga pamilyar. Si Jesus nagsaysay og mga sambingay aron pagtabang sa mga tawo nga makasabut sa espirituhanong kamatuoran. Usa ka sambingay anaa sa Mateo 13:44–46. Unsay gitudlo niini kon unsa ka bililhon ang ebanghelyo? Makabasa pa mo og ubang mga sambingay?

Bato o Balas?

Isulat ang mga kalihokan sama sa ubos diha sa ginunting nga papel. Pagpuli-puli sa pagpili ug pagbasa niini nga kusog. Hisguti nganong ang pagbuhat niini susama sa pagtukod og balay diha sa bato o balas. Sa unsang paagi ang pagpaminaw sa mga propeta makatabang nato sa pagsunod sa mga pagtulun-an ni Jesus ug paghimo og maalamong mga pagpili?

• Pagbasa og dungan sa mga Kasulatan

• Buhaton ang hagit

• Pagsimba

• Pagpasangil sa uban sa nahimong sayop

• Pagbuhat sa homework

• Pagtahud sa uban

• Pagsulti sa tinuod

• Pagpabiling hilom samtang ang usa ka tawo gidaug-daug

• Pagpaminaw sa kinatibuk-ang komperensya

• Pagpangopya sa buluhaton sa ekswelahan

• Pagpaapil sa usa ka bag-o nga tawo

• Paggamit og makapasakit nga mga pulong

• Pakigdula sa igsoon

• Pagpakigbahin sa uban

• Paggahin og daghang oras sa mga dula sa computer

• Pagkuha og gamit nga dili inyo

• Pag-ampo kada buntag ug gabii

• Pagpaapil sa usa ka tawo nga wala maapil

Rock Art

Pagpili og hamis nga bato. Gamit ang marker o pintal, isulat ang “Jesukristo” niini. Pagpamulong nganong importante kaayo nga itukod ang atong kinabuhi sa Iyang mga pagtulun-an. Ibutang ang bato sa dapit diin inyo kining makita kanunay.

Jesukristo

Tip sa Kasulatan

Ang Basahon ni Mormon makatabang nato nga makasabut sa Bag-ong Tugon. Basaha sa Helaman 5:12. Unsay inyong nakat-unan kabahin sa kahulugan sa pulong nga bato gikan sa pagbasa niining bersikulo? Tan-awa ang “Rock” diha sa Guide to the Scriptures aron makakita og dugang mga bersikulo nga makatabang ninyo nga mas makasabut.

Panag-istoryahanay sa Pamilya

Basaha og dungan ang Mateo 7:24–29. Makadrowing usab kamo og litrato kabahin sa istorya. Dayon makahisgot mo kabahin niining mga pangutana: Unsay mga butang sa atong kinabuhi nga sama sa ulan ug hangin? Sa unsang paagi ang pagdesisyon sumala sa unsay sikat sama sa pagtukod og balay diha sa balas? Sa unsang paagi ang pagsunod sa mga pagtulun-an ni Jesus makaprotektar nato ug makapalig-on nato sama sa balay nga natukod diha sa bato? Paghisgot og mga paagi nga inyong mapalig-on ang inyong pagtuo diha kang Jesukristo.

Kanta: “The Wise Man and the Foolish Man” (Children’s Songbook, 281)

Kasulatan: Mateo 7:24–29