Ang Labing Bililhong Butang nga Akong Naangkon
Ang tagsulat nagpuyo sa Manaus, Brazil.
Sa among komperensya sa kabatan-onan sa multistake, kaming tanan nakadawat sa Basahon ni Mormon ug gidapit mi sa paghatag niini ngadto sa usa ka tawo. Gusto nakong ihatag kini sa akong paborito nga pop singer.
Sa dihang akong nahibaloan nga siya dunay konsyerto sa among siyudad, naghunahuna ko nga kini ang nindot nga oportunidad. Ang matag usa sa iyang mga konsyerto dunay sistema nga mopili og 15 ka mga fans nga moadto sa luyo sa entablado ug makighimamat niya. Imposible kaayo nga mapili, apan misulod gihapon ko.
Pipila ka semana sa wala pa ang konsyerto, akong gisulat ang akong pagpamatuod sa Basahon ni Mormon ug nag-ampo. Akong gipasabut sa Langitnong Amahan nga lisud kaayo nako ug nga nagkinahanglan ko sa Iyang tabang.
Sa akong pagsulti og “amen”, ang akong cell phone mibagting nga ang tawag gikan sa opisina sa singer. Napili ko!
Sa luyo sa entablado nianang adlawa sa konsyerto, akong gihatag sa singer ang basahon. Giablihan niya ug gibasa ang akong pagpamatuod: “Naggahin ko og daghang mga oras sa paghunahuna og bililhon, mapuslanon nga regalo alang nimo. Akong naamguhan nga kinahanglan kong mohatag kanimo og usa ka butang nga bililhon tungod sa unsay anaa niini ug dili tungod sa kantidad. Mao kini ang Basahon ni Mormon; mao kini ang labing bililhong butang nga akong naangkon. Mao usab kini nganha nimo kon basahon nimo kini.”
Iya kong gigakus ug miingon nga basahon niya kini. Wala ako makapugong sa mga luha!
Talagsaon nga kasinatian ang paghatag og Basahon ni Mormon ngadto sa usa ka inila nga tawo. Apan ang paghatag sa basahon kinahanglang usa ka komon nga kasinatian. Makahatag ako niini ngadto sa usa ka higala sa eskwelahan, usa ka silingan, o bisan kinsa.
Ang paghatag og Basahon ni Mormon, pagpamatuod, paghisgot mahitungod sa Simbahan, ug pagpakita og ehemplo mao ang atong mga katungdanan. Kinahanglang dili gayud kita maulaw sa pagpakigbahin sa ebanghelyo ni Jesukristo.