Ang Akong Nakat-unan Nakausab sa Akong Kasingkasing

Darcy Logan, Alaska, USA

Human sa kamatayon sa among 18 anyos nga anak nga lalaki, si Jaxon, naghunahuna ko og lawom sa kalidad ug direksyon sa akong kinabuhi. Duna koy anak nga tua sa kahangturan, ug duna koy dako kaayong tinguha sa pagpuyo sa akong kinabuhi sa paagi nga sa umaabut among matagamtaman ang relasyon sa pamilya. Gusto usab akong mas makasabut sa mga kasulatan aron kini makagiya sa akong kinabuhi.

Wala ko makasiguro kanus-a nagsugod ang akong tinguha sa kasingkasing, apan nadasig kini sa paglaum nga makita pag-usab ang akong anak. Samtang nagbasa ko sa Basahon ni Mormon, nagsugod ko sa pagkamatikod sa unsang paagi ang kasingkasing gihimong simbolo isip kondisyon sa kinabuhi sa tawo o direksyon o kondisyon sa mga tawo.

Kada higayon nga hisgutan ang kasingkasing, gahi man o humok, maghimo ko og gamay nga pulang kasingkasing sa may daplin. Nagsugod ko sa pagkakita sa mga sumbanan. Kon ang mga kasingkasing sa mga tawo mahumok, duna silay kalig-on sa pag-atubang sa kalisud, ang ilang gugma alang sa uban molambo, ug sila mahimong mas mabination ug malumo. Nakat-unan nako nga ang paghinulsol mao ang makausab sa mga kasingkasing samtang kita motawag sa Manluluwas ug sa Iyang maulaong sakripisyo.

Nalingaw ko nga nagbasa sa Basahon ni Mormon. Ang akong nakat-unan nakausab sa akong kasingkasing, nga nakausab sa akong kinabuhi. Ang akong nakat-unan nakatabang usab nako sa akong propesyonal nga trabaho samtang motabang ko sa mga magtiayon sa ilang mga hagit. Akong nasabtan nga ako makatudlo ug makapahinumdom sa mga magtiayon mahitungod sa komon nga mga baruganan nga makahatag og katagbawan sa kaminyoon ug tinuod nga pagkasuod. Apan hangtud nga modala sila og humok nga kasingkasing ngadto sa ilang kaminyoon, gamay ra og kahigayunan nga mahitabo o molahutay ang kausaban.

Sukad niadtong higayuna nga mihimo ko og mga kasingkasing diha sa daplin sa pahina sa akong Basahon ni Mormon, ablihan nako pirme aron basahon pag-usab kadtong mga tudling ug nagpadayon sa pagkat-on gikan niadtong mga bersikulo. Nakakita gani ko og bag-ong mga tudling kabahin sa kasingkasing nga akong nalabyan sa unang pagbasa, nga nagpahinumdom nako nga kanunay adunay bag-o diha sa mga kasulatan nga makat-unan, masabtan, ug magamit.

Labing importante, ako mapahinumduman sa gugma sa akong Langitnong Amahan ug sa akong Manluluwas. Tungod niana nga gugma, akong ikauban ang akong pamilya sa kahangturan. Nasayud ako niini sa akong tibuok kasingkasing, diin ako mapasalamaton kaayo.