Ang Pagrebelde ni Satanas
Ang tagsulat nagpuyo sa Utah, USA.
Unsa ang tinuod nga matang sa gisugyot ni Satanas sa konseho sa wala pa dinhi sa yuta?
Mga paghulagway pinaagi sa sirup/iStock/Thinkstock
Sa dihang batan-on pa ko, nakamatikod ko og makapangutana nga kalagmitan sa pipila ka mga miyembro sa Simbahan. Kon makakita sila og sitwasyon diin ang mga balaod nga gikasabutan ug ang mga sangputanan giimplementar tungod sa kamasinupakon (sama pananglit, sa pagdisiplina sa miyembro sa Simbahan, pagdisiplina sa ginikanan ngadto sa anak, o pagpatuman sa mga lagda sa misyon o mga sumbanan sa pamatasan diha sa mga eskwelahan sa Simbahan), sila kanunay moingon, “Dili ba kana mao ang pamaagi ni Satanas? Dili ba gipugos nila ang mga tawo nga magmatarung?”
Kini nga tubag nakapatingala nako sa sinugdanan—sa unsang paagi ang usa ka tawo maghunahuna nga ang mga buhat nga gitugutan sa Ginoo ug sa Iyang Simbahan mahimong kabahin sa “plano ni Satanas?” Nakaamgo ko nga ang sayop nga mga pagsabut sama niini kabahin sa pagrebelde ni Satanas ug sa Gubat sa Langit sa tinuoray komon na, ingon man maalaan sa mga tawo ang pipila ka sitwasyon nga daw plano ni Satanas. Sa kawalay palad, kining sayop nga mga pagsabut sa doktrina makamugna og makadaut nga mga resulta.
Sama pananglit, kining sayop nga pagsabut makapahimo sa pipila ka mga ginikanan sa paghunahuna nga dili nila awhagon ang ilang mga anak sa pagsimba. Makapahimo kini sa mga miyembro sa Simbahan sa pagsuporta nga himoong legal ang dakong sala sa moral. Gani kining sayop nga pagsabut makapahimo sa pipila ka miyembro sa Simbahan sa paghunahuna nga ang paghimo ug pagtuman sa mga pakigsaad ug ang mga pasalig sa pagkamasulundon daw sukwahi sa plano sa Dios nga, sa tinuoray, ang pagkamasulundon sa pakigsaad mahinungdanon sa tinuod nga plano sa Dios sa kaluwasan.
Unsay Mabasa diha sa Kasulatan
Pipila sa mga ideya kabahin sa gisugyot ni Satanas didto sa kalibutan sa wala pa dinhi sa yuta makita nga mas gikan sa tradisyon kaysa gikan sa tinuoray nga pagpadayag sa hilisgutan. Isip resulta, makatabang nga modangop mismo sa kasulatan aron masayran kon unsa gyud ang tinuoray nga gipadayag sa Ginoo niining importante nga hilisgutan. Sa kasulatan, ang nag-unang tinubdan sa unsay gisugyot ni Satanas anaa sa unang mga bersikulo sa ikaupat nga kapitulo sa basahon ni Moises:
“Ug ako, ang Ginoong Dios, namulong ngadto ni Moises, nag-ingon: Kana si Satanas, kinsa ikaw nagmando diha sa ngalan sa akong Bugtong Anak, mao gihapon sukad sa sinugdanan, ug siya miduol sa akong atubangan, nag-ingon—Tan-awa, ania ako, ipadala ako, ako mahimo nga imong anak, ug ako motubos sa tanan nga mga katawhan, nga walay usa ka kalag nga mawala, ug sa pagkatinuod ako mobuhat niini; busa ihatag kanako ang imong dungog.
“Apan, tan-awa, ang akong Hinigugmang Anak, nga mao ang akong Hinigugma ug Pinili sukad sa sinugdanan, miingon ngari kanako—Amahan, ang imong pagbuot mao ang matuman, ug ang himaya imo sa kahangturan.
“Busa, tungod kay si Satanas misukol batok kanako, ug nagtinguha sa paglaglag sa kabubut-on sa tawo, diin Ako, ang Ginoong Dios, mihatag ngadto kaniya, ug usab, nga Ako kinahanglan nga mohatag ngadto kaniya sa akong kaugalingon nga gahum; pinaagi sa gahum sa akong Bugtong Anak, Ako nagsugo nga siya isalikway;
“Ug siya nahimo nga Satanas, oo gani ang yawa, ang amahan sa tanan nga mga bakak, sa pag-ilad ug pagbuta sa mga tawo, ug pagdala kanila nga ulipon sa iyang pagbuot, gani kutob sa dili maminaw ngadto sa akong tingog” (Moises 4:1–4).
Ang Amahan sa Tanan nga mga Bakak
Gikan niining mga bersikulaha klaro nga ang atong Langitnong Amahan wala mohangyo og mga boluntaryo sa pag-imbento ug pagpresentar og managlahi ug nag-indigay nga mga plano sa kaluwasan, sama sa gituohan sa pipila. Hinoon, plano kadto sa atong Langitnong Amahan, ug Iya kining gipresentar ngadto sa Iyang espiritu nga mga anak kinsa nagpundok diha sa Dakong Konseho sa Langit. Si Jesukristo, kinsa “pinili sukad sa sinugdanan” nga mahimong Manluluwas niana nga plano, mapailubong misugyot nga ipatuman ang plano sa Langitnong Amahan, sa pag-ingon “Amahan, ang imong pagbuot [i.e. plano] mao ang matuman.” Niining sitwasyona nga si Satanas mihimo og wala mauyuni ug hinakog nga sugyot nga usbon ang plano sa Langitnong Amahan aron kini makahatag og kaluwasan sa tanan (tan-awa sa Moises 4:1). Sa dili pa nato hisgutan kon sa unsang paagi iya kining tumanon, importante nga atong timan-an nga si Satanas gipasabut niining mga bersikuloha isip “amahan sa tanan nga mga bakak” (Moises 4:4). Sa laing higayon siya gitawag nga “usa ka bakakon gikan pa sa sinugdanan” (D&P 93:25). Kita ignorante ra kaayo aron i-asumir nga si Satanas nagsulti sa tinuod sa dihang siya mihimo niining dili katuohang pagpangangkon sa kaluwasan sa tanan.
Kon atong masabtan ang kinaiya ug kasaysayan ni Satanas, mas angay nga ikonsiderar siya isip unang mangingilad nga ahente nga namaligya kanato og produkto nga siya nasayud nga dili niya mahatag. Matud pa niya kitang tanan iyang maluwas kon kita mosunod kaniya kaysa plano nga gihimo sa atong Langitnong Amahan para sa atong kaluwasan ug gisuportahan sa atong Manluluwas nga si Jesukristo.
Ang gisugyot ni Satanas usa ka bakak. Dili kini mosalir. Dili kini epektibong alternatibo ngadto sa hingpit nang daan nga plano sa Langitnong Amahan, apan kini usa ka lit-ag nga gihimo sa pagbitik ug pag-ilad sa mga tawo nga mosunod ni Satanas. Kini, sa katapusan, usa ka plano sa kalaglagan, dili plano sa kaluwasan.
Paglaglag sa Kabubut-on
Sa mahinungdanong paagi, kini nga mga bersikulo sa kasulatan dili klaro nga namahayag unsaon ni Satanas pagpatuman niining bakak. Ang anaa lang sa kasulatan mao nga kini “[mo]laglag sa kabubut-on sa tawo” (Moises 4:3). Si Presidente J. Reuben Clark (1871–1961), Unang Magtatambag sa Unang Kapangulohan, misugyot og duha ka dagkong posibilidad kon unsay gisugyot nga buhaton ni Satanas ug nagpahinumdom kanato nga kini dili mosalir. Siya mipasabut: “Samtang nagbasa ko sa kasulatan, ang plano ni Satanas nagkinahanglan og usa sa duha ka butang: Ang pagpugos sa … tawo, o pagluwas sa mga tawo diha sa sala. Nagduha-duha ko kon ang kabubut-on sa tawo mahimo ba nga mapugos. Sigurado ang tawo dili maluwas diha sa sala” (sa Conference Report, Okt. 1949, 193; gikutlo sa Doctrines of the Gospel Student Manual [2010], 15).
Bisan tuod walay usa niini nga mga posibilidad mosalir, atong makita ang mga elemento niini diha sa mga paningkamot ug mga taktika ni Satanas karon. Sama pananglit, ang pagpamugos gigamit karon sa mga malupigon nga nagtinguha og gahum sa mga nasud ug sa mga aktibista sa politika kinsa nagtinguha nga malimitahan ang kagawasan sa relihiyon ug mipugos sa katilingban nga modawat sa makasasala nga kinaiya. Ang Ginoo nanghimaraut sa paggamit sa “gahum o kamandoan o pagpugos sa mga pagbati sa mga katawhan, bisan unsa nga matang sa pagkadili matarung” (D&P 121:37).
Hinoon, ang Ginoo mipasabut usab nga ang gahum ug impluwensya magamit sa pagdasig sa pagkamatarung pinaagi sa mahigugmaong pagdani, matarung nga pagpanton, ug hustong mga sangputanan (tan-awa sa D&P 121:41–43). Kining importante nga katin-awan nagpakita nga ang hustong pagdisiplina diha sa Simbahan ug sa ginikanan, pagpatuman sa mga balaod ug mga sumbanan diha sa misyon ug sa mga eskwelahan sa Simbahan, ug pag-establisar og matarung nga mga balaod sa katilingban mga buhat nga gitugutan sa Ginoo ug dili kabahin sa “plano ni Satanas.” Ang pagtahud sa kabubut-on wala magpasabut nga dawaton ang anarkiya.
Ang ikaduhang posibilidad kon giunsa pagtanyag ni Satanas sa pagluwas sa tanan gihulagway diha sa LDS Bible Dictionary: “Si Lucifer ug ang iyang mga sumusunod gusto nga awtomatik nga maluwas kadtong mosinati sa pagka-mortal, dili igsapayan sa indibidwal nga gusto, kabubut-on, o boluntaryong pagpahinungod” (“War in Heaven”). Sa laing pagkasulti, laing interpretasyon mao nga si Satanas mitanyag sa pagluwas natong tanan, bisan unsa pa ang atong gihimo. Kini molaglag sa kabubut-on pinaagi sa paghimo niini nga walay gamit. Kon walay mga sangputanan sa atong mga pagpili ug ang tanan makadawat sa samang ganti, ang atong mga pagpili mahimong walay kahulugan ug ang atong kabubut-on nalaglag.
Kini nga interpretasyon kon giunsa pagtanyag ni Satanas sa pagluwas kanato makita usab diha sa daghan niyang mga paningkamot ug taktika nga pamilyar nato karon. Si Satanas kanunay nagsaad sa mga tawo nga mahimo silang magkinabuhi diha sa sala ug maluwas ra gihapon o sila makakaplag og kalipay diha sa pagkadautan. Kining makapadani nga mensahe sa sayon nga kaluwasan ug estilo sa kinabuhi sa sala popular kaayo karon, sama sa sugyot ni Satanas diha sa Gubat sa Langit diin “daghan ang misunod kaniya” (Abraham 3:28).
Atong makita pinaagi niining mga ehemplo nga ang pamaagi ni Satanas wala kaayo mausab sukad sa kinabuhi sa wala pa dinhi sa yuta. Si Satanas nagpadayon sa pagpamakak sa mga tawo pinaagi sa pagsaad nila nga kon sila mosunod kaniya sila maluwas, o magmalipayon, o bisan unsay ilang gusto nga madungog. Nagpadayon usab siya sa pagpugos aron sa pagpatuman sa iyang dili matarung nga mga panglantaw ug binuhatan ngadto sa uban. Busa, “ang gubat nagpadayon dinhi sa pagka-mortal … nakiggubat kabahin sa samang mga problema, ug ang samang kaluwasan ang girisgo” (Bible Dictionary, “War in Heaven”).
Usa ka Plano sa Pagrebelde
Tingali ang pinakayano nga paagi sa paghulagway sa plano ni Satanas wala makabasi sa pangagpas sa mga teyoriya kon unsay gustong buhaton ni Satanas apan unsay tinuoray nga nabuhat niya ug sa iyang mga sumusunod tungod sa iyang plano—kana, ang pagrebelde. Ang kasulatan mibalik-balik og pahayag nga si Satanas dayag nga mirebelde batok sa Dios. Sama pananglit, ang Ginoo mideklarar nga si “Satanas misukol batok kanako” (Moises 4:3); “ang anghel sa Dios kinsa may pagtugot diha sa atubangan sa Dios … misupak batok sa Bugtong Anak” (D&P 76:25); ug “siya misukol batok kanako, nag-ingon, Ihatag kanako ang imong dungog, diin mao ang akong gahum” (D&P 29:36).
Gikan niining mga bersikulo klaro nga ang sugyot ni Satanas dili inosente nga sugyot sa pag-usab sa plano sa Dios. Kini usa ka pagrebelde, pagsukol, pagsulay sa pag-alsa aron sa pagpalagpot sa Dios ug mopuli sa kalangitan. Kadtong misunod ni Satanas mideklarar og gubat sa langit ug mihimo sa ilang kaugalingon nga mga kaaway sa Dios. Ang ilang kabubut-on nalaglag tungod kay sila wala mopili sa “kalingkawasan ug sa kinabuhi nga dayon, pinaagi sa halangdon nga Tigpataliwala,” apan mipili sa “pagkabihag ug sa kamatayon, sumala sa pagkabihag ug sa gahum sa yawa; kay siya nagtinguha nga ang tanan nga mga tawo unta mahimo nga mauyamot sama ngadto kaniya” (2 Nephi 2:27). Isip resulta, “ikatulo nga bahin sa mga panon sa langit siya mipabiya gikan [sa Dios] pinaagi sa ilang kabubut-on” (D&P 29:36).
Buot ipasabut, ang yanong paagi sa pagtan-aw sa plano ni Satanas mao ang plano sa pagrebelde ug pagsupak sa Dios. Agig pagtandi, ang Dios mi-summarize sa Iyang plano niining mga pulonga: “Kita mosulay kanila dinhi, aron pagsuta kon sila mobuhat ba sa tanan nga mga butang bisan unsa ang isugo sa Ginoo nga ilang Dios ngadto kanila” (Abraham 3:25). Agig dugang, “Kami nagtuo nga pinaagi sa Pag-ula ni Kristo, ang tanan nga mga katawhan mahimo nga maluwas, pinaagi sa pagsunod sa mga balaod ug mga ordinansa sa Ebanghelyo” (Mga Artikulo sa Hugot nga Pagtuo 1:3). Ang plano sa Dios mao ang plano sa pagkamasulundon ug pagkamatarung, samtang ang plano ni Satanas mao ang pagkamasinupakon ug pagrebelde.
Pag-ila sa Plano
Ang husto nga pagsabut sa kalainan sa plano sa Dios ug sa tumong ni Satanas makatabang nato nga mas klarong mailhan kon si kinsa gyud ang nagsunod ug wala magsunod ni Satanas. Kini makatabang nato sa paglikay sa pag-akusar nga nagsunod sa plano ni Satanas kadtong nagdasig sa pagkamatarung ug nagpasiugda nga magmasulundon nga sa tinuoray sila nagsunod sa plano sa Dios. Kini makapadayag usab sa tinuod nga mga sumusunod sa plano ni Satanas karon.
Kadtong nagprotesta ug nagrebelde batok sa Dios ug sa Iyang mga propeta, kadtong nagtinguha sa pag-usab sa plano sa Dios, kadtong nagbungat nga paubsan ang mga sumbanan sa pagkamatarung ug nagtinguha sa pagpugos sa uban nga dawaton ang dili moral nga pamatasan, ug kadtong nagtinguha sa paglingla sa mga tawo nga ang pagkadautan mao ang kalipay ug nga kita makakaplag og kaluwasan diha sa sala, ang tanan nagsuporta sa lain-laing mga elemento sa estratehiya ni Satanas sa pagrebelde.
Unta kita nagsunod sa tinuod nga plano sa Langitnong Amahan, ang plano sa kaluwasan “pinaagi sa Pag-ula ni Kristo” ug pinaagi sa “pagsunod sa mga balaod ug mga ordinansa sa Ebanghelyo” (Artikulo sa Hugot nga Pagtuo 1:3).