Pagmalinawon
Manghinaut ako nga kamo mogahin og panahon niining Pasko sa paglingkod sulod sa pipila ka hilom nga mga gutlo ug tuguti ang Espiritu sa Manluluwas nga mohupay kaninyo ug mopasalig kaninyo pag-usab sa katakus sa inyong serbisyo, sa inyong paghalad, ug sa inyong kinabuhi.
Detalye gikan sa Si Jesukristo Nag-ayo sa Buta, ni Domenico Fiasella, sa maayong kabubut-on sa John andMable Ringling Museum of Art; sa tuo: Ang Balaan nga Gabii, ni Carl Heinrich Bloch
Kanunay kining makadasig alang kanako sa pagpamalandong bahin sa paghalad sa serbisyo ug sakripisyo nga gihimo sa mga Santos sa Ulahing mga Adlaw ngadto sa ilang mga pamilya, sa ilang mga ward, ug sa ilang Langitnong Amahan. Kini usa ka gipahinungod, sagrado nga butang. Dili ko motuo nga aduna pay mas labaw nga pasidungog nga moabut kanato kay sa nianang ikonsiderar sa Ginoo nga atong paghalad isip takus ug tukma ug niana Siya morespeto ug modawat niini.
Mao kana ang talagsaon nga pagdayeg sa Amahan ngadto sa Anak sa dihang Siya mipaila Kaniya isip “ang akong Hinigugmang Anak, kinsa Ako nahimuot kaayo” (3 Nephi 11:7; tan-awa usab sa Mateo 3:17; Marcos 1:11; Lucas 9:35; D&P 93:15; ni Joseph Smith—Kasaysayan 1:17). Pagkaanindot nga ulohan. Unsa pay mas dakong dungog ang anaa kay sa nianang ang Dios moingon nganha kanimo, “Akong hinigugmang anak nga lalaki” o “Akong hinigugmang anak nga babaye,” ug nga kamo makadawat sa Iyang pagdayeg nga ang inyong paghalad Iyang madawat, “kinsa Ako nahimuot kaayo.”
Ako nag-ampo niining panahon sa Pasko nga kamo makabaton og pagbati sa pagtagad sa Ginoo alang sa inyong gihalad, mga pagbati kon unsa kamo kabililhon sa Iyang panan-aw, mga pagbati sa pagkapinalangga isip Iyang anak nga lalaki o Iyang anak nga babaye. Ug ako nag-ampo nga ang kahibalo bahin niana nga kahimtang maghatag unta kaninyo og dakong kahupayan, kasiguradohan, ug pagsalig nga kamo may pag-uyon sa Iyang panan-aw.
Ang Pagkatawo sa Manluluwas
Kon atong hisgutan ang pagkatawo ni Jesukristo, tukma natong pamalandungan ang unsay masunod. Ang Iyang pagkatawo walay kinutuban ang kamakahuluganon tungod sa mga butang nga Iyang masinati ug antuson aron nga Siya mas makatabang kanato—tanan natapos diha sa Iyang Pagpalansang ug Pagkabanhaw (tan-awa sa Alma 7:11–12). Apan ang Iyang misyon naglakip usab sa katahum sa Iyang pagserbisyo, ang mga milagro sa Iyang pagpangalagad, ang kahupayan nga Iyang gidala ngadto sa mga nag-antus, ug ang hingpit nga kalipay nga Iyang gitanyag—ug nagtanyag pa gihapon—ngadto sa nagbangutan.
Ganahan usab ko nga maghunahuna sa unsay moabut sa kaulahian. Duha sa akong paborito nga mga bersikulo nga naghisgut niana nga panahon makita sa katapusan sa kapitulo 7 diha sa basahon sa Pinadayag:
“Sila dili na gutomon, ug dili na usab pagauhawon; dili na sila pagahasulon sa adlaw, ni sa bisan unsang makasunog nga kainit.
“Kay ang Kordero nga anaa sa gitaliwad-an sa trono mamahimong ilang magbalantay, ug siya magatultol kanila ngadto sa mga tuboran sa mga tubig nga nagahatag og kinabuhi: ug pagapahiran sa Dios ang tanang luha sa ilang mga mata” (Pinadayag 7:16–17; tan-awa usab 21:4).
Kana mga paglarawan alang kanako sa balaan nga paglaum kon unsa ang umaabut, sa unsa kahay mahitabo atol sa mahinungdanong Milenyum ug sa celestial nga paghari ni Kristo nga mosunod.
Sa tanan niana nga moabut, tukma lamang niining panahona sa tuig ang paghunahuna lang mahitungod nianang bata sa pasungan. Ayaw kaayo palabi sapagbati nga nabug-atan o maghunahuna pirme sa moabut; hunahunaa lang kanang gamayng bata. Paggahin og hilom, malinawon nga mga gutlo sa pagpamalandong sa pagsugod sa Iyang kinabuhi—ang hinapos sa langitnong panagna apan ang yutan-ong sinugdanan alang Kaniya.
Detalye gikan sa Si Jesukristo Nag-ayo sa Buta, ni Domenico Fiasella, sa maayong kabubut-on sa John andMable Ringling Museum of Art; sa tuo: Ang Balaan nga Gabii, ni Carl Heinrich Bloch
Paggahin og panahon sa pag-relaks, pagbaton og kalinaw, ug tan-awa kining gamay nga bata diha sa inyong hunahuna. Ayaw kaayo og kabalaka o mobati nga nabug-atan sa unsay moabut sa Iyang kinabuhi o diha sa inyoha. Hinoon, gahini og malinawon nga gutlo sa pagpamalandong tingali bahin sa labing hilom nga gutlo sa kasaysayan sa kalibutan—sa dihang ang tibuok kalangitan nagmaya sa mensahe nga “Himaya sa Dios sa kalangitan, ug sa yuta panagdait sa mga tawo nga iyang gikahimut-an” (Lucas 2:14).
Tuguti ang Espiritu nga Mohupay Kaninyo
Pipila ka tuig ang milabay nakadungog ko og interbyu sa radyo nga nagpaila ni Bishop Desmond Tutu, ang arsobispo nga Anglican sa South Africa. Bag-uhay lang siya nga nagmantala og usa ka basahon uban sa iyang anak nga babaye mahitungod sa pagpakig-uli [reconciliation] nga nahitabo sa South Africa human sa apartheid.1 Sa tinuod lang, ang mensahe sa basahon mao nga adunay kamaayo diha sa tanan nga mga tawo.
Atol sa interbyu ang host nangutana og usa ka makahatag og panabut, dinasig nga pangutana ngadto ni Bishop Tutu: “Nakita ba nimo nga ang imong relasyon ngadto sa Dios nausab samtang ikaw nagkatigulang?”
Si Bishop Tutu mihunong og kadiyot ug dayon miingon, “Oo. Ako nagkat-on nga mas maghilom diha sa presensya sa Dios.”
Siya nahinumdom sa iyang pagkabantan-on nga kon siya mag-ampo, iya kining gibuhat uban sa listahan sa mga hangyo ug mga kabalaka. Siya mag-ampo sa langit uban sa unsay iyang gitawag nga “usa ka matang sa listahan sa kumprahon.” Apan karon, siya miingon, “Sa akong hunahuna [ako] naningkamot sa paglambo pinaagi nga anaa lang ko. Sama kon kamo molingkod atubangan sa kalayo diha sa tingtugnaw, anaa lang kamo diha sa atubangan sa kalayo, ug dili na kamo kinahanglan nga magmaalamon o bisan unsa. Ang kalayo moinit kaninyo.”2
Sa akong hunahuna usa kana ka matahum nga pasumbingay—lingkod lang uban sa Ginoo ug tuguti nga Siya mohupay kaninyo sama sa kalayo diha sa tingtugnaw. Dili kinahanglan nga kamo hingpit o ang labing banggiitan nga tawo nga sukad nabuhi sa yuta o ang labing maayo sa bisan unsang butang aron makig-uban Kaniya.
Manghinaut ako nga kamo mogahin og panahon niining Pasko sa paglingkod sulod sa pipila ka hilom nga mga gutlo ug tuguti ang Espiritu sa Manluluwas nga mohupay kaninyo ug mopasalig kaninyo pag-usab sa katakus sa inyong serbisyo, sa inyong paghalad, sa inyong kinabuhi. Hilom nga maglingkod uban nianang gamayng bata ug mobiya nga lig-on sa espirituhanon ug mas maandam alang sa tanan nga moabut sa kaulahian. Himoa kanang mga gutloa nga panagon sa pagpahulay ug makapadasig ug kasiguroan ug makapabag-o.
Ang Dios moganti kaninyo nianang panalangin niining Paskoha samtang kamo, uban kanako, mosaksi sa Manluluwas nga si Jesukristo—Iyang importansya sa atong mga kinabuhi, sa tanang tawhanong kinabuhi, ug ngadto mismo sa labing tumong sa kinabuhi.
Kita mosimba Kaniya, kita moserbisyo Kaniya, ug kita mohigugma Kaniya. Unta ang inyong kinabuhi mopakita nianang gugma pinaagi sa inyong halad niining panahon sa Pasko ug sa kanunay.